Isaías 58 - La'aqtaqa Ñim Lo'onatac 'Enauacna 2013

Dam 'eesa qouaqchetaxac

¹ Ñim Nataxala' aỹem 'enapega, 'eeta': «'Anlamaxaren qome da 'aua'alaq saishet da 'añe'etac, 'ana'axannec da 'arvilỹaxac 'eeta'am 'anqa'en aca nasheere, ỹataqta sa 'auala'ac da qonapega na ỹalamaxat nhuo' le'ecpi souaxat da saỹalaq, nam chegoxoguetpi so Jacob souaxat nam lasouaxashetpi.

² Namayepi, 'eetega 'enauaque naua na'axa'te da Aỹem nmittaique, qataq machiguiñi da ỹauatton da ñeqa'aicỹaxac, 'eeta'am ca nhuo' le'ecpi maye ỹo'ottac da nalochiguiñi lataxac, qataq da saỹauanega da ca'aisalo naua lqataxaco Ñim Natamnaxala'. Qaq namayepi aỹem dequicto'ot da sanem na no'on ỹamaxasoxonaxacpi, nache namayepi ỹachaxan da machiguiñi naxa da aỹem nquigueua'a,

³ qalaxaye namayepi, 'eeta': ¿Ta'ainco' da ñeqouaqchetaq, ye Ñim Lo'onatac 'Enauacna, qomi' sa ỹauanguilo? ¿Ta'ainco' da sauoqo'o da qanque'eenaxac ye Ñimaye sa qomi' nomalo? Qaq ye na'a'q maye huaigui naxa da qanqouaqchichi, qalaq nache huaigui qanqa'eñi da qanmiñeetac, qataq da qauchoxoyiñi nam qami' do'onataxaatacoto,

⁴ yem na'a'q maye qanqouaqchetaxaqui, qalaq nda'a't da huaigui da qancotaxaqui qataq da qal-loquiaxaqui, qataq sa qanasaguenñiỹa't da qanasacñeetega't qauauoita'aisalo naua qanapocnalli'. Qaq cam na'a'q qouaqchetaxaqui maye 'eeta'am de'era qalaq saishet da chegoqchigui da sa'axaỹa ca qanatamnaxaqui.

⁵ ¿Qalqo' qaupichiitega da saỹamaxareeta da qouaqchetaxac maye qaỹo'ot naxa da naquicoxo, qataq da naqtañi ca shiỹaxaua 'eeta'am aca na'aate, qataq da qoỹaatrañi naua nogo maye sansattegueta da qannaatangui na alo? ¿Qaq nachera peta'a dam qauamachiỹa'ac qouaqchetaxac, qataq na'a'q maye ỹaỹamaxareeta Ñim Nataxala'?

⁶ 'A'i, saishet. Dam qouaqchetaxac maye saỹamaxareeta, 'eeta': Qaisouec nam lcoñetaxat lcat cam qaica ca ỹasouaxat, qataq qaisogui ana ncoñetapi maye nlletañi cam nauegaxanaxaqui, qataq qaisouec nam qaipataqta'a'tpi, qataq imeuo qanqa'en 'enauac nam qaica ca iren,

⁷ qataq 'aỹa'anem ca laỹe ca 'oq cam huo'o na lqouaxa, qataq ca qaica ca lma' qalaq 'auaconeguet da naua'a ca 'arma', qataq ca qaica ca logoxot qalaq 'aỹa'anem ca logoxot, qataq saishet da 'axanec da 'autauaatac cam qoneta'am 'arỹa.

⁸ Qaq da qonetec de'era, nache 'eroigui aca 'arcoỹaraxanaxaqui 'eeta'am da mashe nvi' na yo'oxoñi, qataq nam 'arque'emaxapi sa qaỹaloq qome da no'oita. Dam no'on 'arataxac qalaq hua'auta'ague da 'ata'ague, qataq da ỹo'oxoyec 'am ca'attaueegue qome.

⁹ Qaq huaña nache da Aỹem 'aỹaxana nache 'am sasateguet qome, Qataq da 'aua'alaq da 'auỹaxanaique ca 'antaunaguec, nache Aỹem shenapec, qome: ‹Aja', Aỹem soota'a ne'ena.› Da 'am 'aỹa'axaañi da 'aupataqta'a't ca 'arỹa, qataq saishet da 'aunogoqchettac ca 'arỹa qataq saishet da 'anqañoxotta'a da 'auasaqteguelec cam saq 'en,

¹⁰ qataq da 'anañaneguet da 'auquia'axan cam huo'o na lqouaxa, qataq da 'autauan cam ỹaquicoqchettac ca lhuenaxanaxa, nache 'eroigui qome aca 'arcoỹaraxanaxaqui da huaigui na napalaxa, qataq nam 'arpaqal 'eeta'am qome na le'eraxa ye na'a'q laiñi.

¹¹ Qaq Aỹem, nache shecto'ot qome da 'am selotague', qataq qalota ñaqa'en na 'oq qom qoueta'a ye toolec 'alhua, qataq sanem da la'añaxac da 'aro'ocỹaxac, nache qoneta'am ca nanaxanaqa' maye qaicottalec, qataq qoneta'am aca mpa'axaatasheguem 'etaxat laỹe' maye saimeuo na 'etaxat.

¹² Qaq nam 'arhuo' le'ecpi no'oxoosheguem qome nam togoshec maye qailaxachigui co'ollaxa, qataq no'oxoosheguem nam togoshaapec lo'oxonaxala'pi. Huaña nache nam 'arhuo' le'ecpi qaỹamata'ac qome da le'enaxat ‹Ỹaỹamaxaañi na npaqtaxanaxatpi maye hua'axauec co'ollaxa›, ‹qataq ñe'eguelaxatsheguem da no'oxoosheguem na nỹecpi maye nlaguiñi co'ollaxa›.

Da 'eetec ye na'a'q mataxaqui

¹³ Huo'o naq 'enec 'anqa'en ye na'a'q mataxaqui, saishet da 'aume'eguet da 'anmenaxac da huaigui ye ỹalamaxat na'a'q maye qui'itta. Yi'iye na'a'q ỹataqta laloxoqui 'anqa'en da namaicỹaxac, qataq nacheye yem qui'itta na'a'q maye lalamaxat Ñim Nataxala' qataq taiguet da ño'oxonnataxanaxac, ỹataqta huo'o naq naigui 'anqa'en, nache saishet da 'auo'ottac nam 'aro'onatacpi qataq da 'anmittaique nam 'aralamaxatpi qataq da 'auo'ottac da 'anmenaxac.

¹⁴ Qaq da 'auo'ot de'era, nache 'auanata qome da 'aramaicỹaxac maye hueto'ot Aỹem, qataq 'am sanem qome da 'anauec nam netalec na ỹataqta qaỹoqotcheguemec 'alhuapi, qataq so'ot da 'antonaxac qom 'am taỹot nam lalamaxatpi co'ollaxa so 'arta'a Jacob.» Qaq 'era da la'aqtac Ñim Nataxala'.