Isaías 57 - La'aqtaqa Ñim Lo'onatac 'Enauacna 2013

¹ Nam shiỹaxauapi maye no'on da lataxac da ileu qalaq qaica ca qochetegue', qataq na shiỹaxauapi soxoraicpi imeuo, qalaq qaica ca ỹaỹateeta da namayepi ileu souaxat na qauemsat ana 'alhua,

² qalaxaye namayepi inoxoneua'a da nlagaxayec. Cha'aye quetegue co'ollaxa da no'on ñecỹaxac, qaq nagui qalaq huetangui añi nhuachiqui da nmatteguec.

³ Ña qanquiquiiuo qami' maye qami' llalaqpi da ñi'iyaqnataxanaxac, maye qauachegoqoiguet nam ncachetague' ana sa lhua qataq aca quisheguetaxai:

⁴ Qaq ¿negue't cam qavi'iñiitac qami'? ¿Negue't cam qauachaxañiỹa da qare'enaxanaxaqui? ¿Negue't cam qauachaxañiito'ot ñim qarachaxachi? Ye qami' llalaqpi da ñe'etaxaloxo qataq qami' tenataxanaxaicpi,

⁵ qataq huaña naxa na la'a' ana rooblepi qataq 'enauac ana qo'oipaqpi maye qalochiguiñi ana lcouepi, da qauo'oche nam qauempi, qataq qaỹa'añeeuo da qarachetaqtaxanaxache na ñaqpiolec da huaña na loigue na la'auaxacpi qataq na lpoxoỹaxapi ana coma'pi.

⁶ 'Am Israel, 'am 'anqopita da 'aỹa'anot da 'ayo'oxonnataxanaxac na salleeta coma' maye chegaqangui so la'auaxac, qaq nacheye yemaye da 'aỹa'a da 'arma' qome. Qaq nachena namayepi da 'aucorelec na 'arachetaqtaxanaxat lataxa qataq 'aỹa'anem ana ala na 'añiguishec. Qaq ¿peta'a 'aupi'itaxaatega da samachiguiñi da ime 'enauac de'era?

⁷ Qaq añi qasoxonaxa maye qaỹoqotcheguemec, qataq nashecañi nache 'anaña so 'armala', qataq nacheye nataqa'en ye 'asheguema naxa da yaqto' 'aỹa'anema ana 'arachetaqtaxanaqtepi.

⁸ Qaq na pa'auo ñi lasom ñi 'arma' qalaq 'anaña so 'arqolac. Nache 'aucoua'ai Aỹem, qataq 'anqa't naua 'ogo nache 'annalec so qalotegue 'armala', qataq 'anaỹamaxate' nam ỹalleppi maye huotaique da 'arauañi', nache 'aualleto'ot som 'arqolac.

⁹ «Ime qataq 'anqalgoqta'a so atamnaxala' Melec 'auachetac so aceite qataq som qalota coraxatpi, qataq 'auamaxa so ỹataqta qaỹoqta som 'artaxaỹaxanaxanecpi qataq iviraña 'anqa'en nam ỹataqta pa'aguiñi aso huachiqui.

¹⁰ Nache ỹataqta 'anasamñi souaxat da 'arqueuoxoc, qalaxaye saishet da 'auaỹaaneguet damaye da qaca ca naigui. Cha'aye 'am hueto'ot nam nhueneguesat, qaq ỹoqo'oye saishet da 'anasamñi.

¹¹ Qaq ¿negue't se'eso atamnaxala'pi maye 'añe'etega qataq 'avio'oxoreetac, da yaqto' aỹem qoca'ai qataq imauec da aỹem 'aucoua'ai? Co'ollaq saishet da aỹem 'avio'oxoreetac nache Aỹem choche ñe'emaxat, qataq 'eco' sa sauatonaxan.

¹² Qalaxaye sa'axat qome da 'arataxac maye 'aupettega da ỹaỹamaqchiguiñi.

¹³ Qaq qom 'aua'alaq da 'aỹaxaataique ca 'antaunaguec, nache na 'arqolacpi saishet qome da 'am itauan qataq saishet da 'am nca'alaxatec. Qaq 'enauac qome namayepi da ỹache na la'at, da choche 'onoolec da ỹasheerelec nache deqat naqa'en. Qalaxaye cam aỹem pi'iỹa'a qalaq nache 'eetai' qome da netalec ne'ena 'alhua, qataq nache hueta'a añi qui'itta ñeqasoxonaxa.»

Da nhuaxanaguec qataq da natannaguec na Israel le'ecpi

¹⁴ Qaq huaña nache qaỹa'axaỹa qome ca na'aqtac maye, 'eeta': «Qauaỹamaxachiiñi qome ca nqa'aic maye nalochiguiñi qanqacheeua'a na huetangui na nqa'aic maye nanaxattac na ỹalamaxat nhuo' le'ecpi.»

¹⁵ Cha'aye Ñim Qaỹoqotcheguemec, Ñim chochaq tatec da nca'altauec maye le'enaxat Qui'itta, 'eeta': «Aỹem maye soota'a ye ỹataqta qaỹoqotcheguemec qataq sa qaishetapec, qalaxaye nataqa'en soota'aguet ca qaica ca la'amaqchec qataq ca huo'o da laquicoxo, nache samem da la'añaxac qataq sa'añaqchet.

¹⁶ Qaq saishet qome da nache shecto'ot da sheetega huo'o ca lasouaxashet na ỹalamaxat nhuo' le'ecpi, qataq saishet qome da nache 'eetai' da senotac, cha'aye da sheetec de'era nache nam shiỹaxauapi maye so'ot co'ollaxa ishet da deqat da na'añaxataxac da aỹem nachatto'ot.

¹⁷ Qaq souaxat nam qauem lqopitaxanaqtaic na ỹalamaxat nhuo' le'ecpi, nache salemata co'ollaxa qalaq saqaỹauec so ỹalemataic, nache seuaxan co'ollaxa qataq sheca'ai namayepi, qalaxaye namayepi sa ỹalaq co'ollaxa nache quegue na maiche lhuennataxacpi.

¹⁸ Aỹem sauaachigui co'ollaxa da lataxac namayepi qalaxaye Aỹem ñataren qome qataq sanem da nmataxac qataq da lle'emaxa. Aỹem sa'añaqchet qome nam daquicotacpi,

¹⁹ nache ỹo'on ñaqa'en namayepi da no'onec maye, 'eeta': ‹¡Huo'o da l-lagaxayec nam hueta'a ca qaỹoqta, qataq huo'o da l-lagaxayec nam hueta'a ca saqaỹapeque! ¡Aỹem ñataren qome na ỹalamaxat nhuo' le'ecpi!›

²⁰ Qalaxaye na qauemaicpi 'eeta'am aso auaxai da ỹasheerelec na lta'araic la'at, nache na 'etaxat saishet da namaañi, nache ana lapaxa ilagaxattac na nshaxa qataq na lshepaxanaxa.

²¹ Nam qauemaicpi saishet da hueto'ot ca nlagaxayec.» Qaq 'era da la'aqtac Ñim Nataxala'.