Isaías 56 - La'aqtaqa Ñim Lo'onatac 'Enauacna 2013

Da nmeỹaxac cam ipaqueelec da aỹamaxataxac

¹ Ñim Nataxala', 'eeta': «Qanapaxagueñiỹa da nalochiguiñi lataxac, qataq qauo'oche can no'on lataxac, cha'aye mashe sa qaỹaloq da nvi' da ica'alaqtaxanaxac, qataq sachaxan qome da ỹa'añaxac maye deca'alaqtaxan.

² Qaq ỹataqta machiguiñi qome ca ỹale maye ỹo'ot ne'ena namaxasoxonaxacpi, qataq da ỹalaxalec da ipaqueelec, qataq huo'o naq 'enec naqa'en ye na'a'q mataxaqui, qataq ỹataqta ntelañi da ỹo'ot ca qauem.»

³ Da huo'o ca shiỹaxaua maye chegaqauec da nañanot Ñim Nataxala', nache saishet qome da, 'eeta': «Ñim Nataxala' saishet qome da aỹem ỹalecnoigui na lalamaxat nhuo' le'ecpi.» Nache 'ena'am ca qaicaua naua lola saishet qome da, 'eeta': «Aỹem shena'am aca qo'oipaq deqaqta.»

⁴ Cha'aye Ñim Nataxala', 'eeta': Nam qaicaua naua lola da huo'o naq 'enec naqa'en ye na'a'q mataxaqui, qataq da ipacchigui da ỹo'ot ca sheetapeguec, qataq saishet da ca'ai da ñaỹamaxataxac,

⁵ nache sanem qome da ỹactec da no'on qaq saq 'ena'am da huo'o ca ñalec qataq aca ñale, qataq namayepi sanem qome da nache 'eetai' da nanettañi na le'enaxatpi na pa'auo aca ỹalamaqte atamnaxaqui qataq nam ipaqtaxanaxatpi, nache sanem qome ca ne'enaxat maye chochaq tatec qataq saishet da qaỹapalaxat.

⁶ Qaq na chegaqauec shiỹaxauapi maye aỹem nañanot da aỹem do'onataxanot qataq Aỹem ỹauotec, da yaqto' ỹamaxashecpi, namayepi da huo'o naq 'enec naqa'en ye na'a'q mataxaqui qataq saishet da ca'ai da ñaỹamaxataxac,

⁷ nache Aỹem sauega qome añi sa qaishetapec ñeqasoxonaxa nache so'otec da machiguiñi da hueta'a añi ỹalamaqte atamnaxaqui. Qataq saconeguet qome da ỹachalec añi ỹalamaqte nca'atoxonaxalate ana lachetaqtaxanaqtepi qaỹavigaxatta qataq ana sa imauaq da qaỹavigaxat, cha'aye ñim ima' qaỹamata'ac qome da natamnaqa' 'enauac na shiỹaxauapi.

⁸ Qaq 'era da la'aqtac Ñim Nataxala', ñim laỹona't nam qaỹauec co'ollaxa Israel le'ecpi, 'eeta': «Aỹem llaỹona't qome nam ỹalamaxat nhuo' le'ecpi, qataq nam laỹe nhuo' le'ecpi da yaqto' huaxaiguet ñaqa'en nam mashe llaỹona't co'ollaxa».

⁹ Qauanaqui qami' huauec shiguiỹacpi, qataq 'enauac qami' shiguiỹacpi maye qami' aviaq le'ecpi, qauanaqui da qollequi ana nlopi qaguetapi,

¹⁰ cha'aye nam lauanaxanaxanecpi nam ỹalamaxat nhuo' le'ecpi, 'eco' qanamaicpi nache qaica ca nanomaxa. Qataq 'enauac namayepi 'eeta'am ca pioq maye saishet da detoxon, nda'a't da nnanaxac qataq da lchoxonaxac, namayepi ỹataqta nqopita da do'ocheta.

¹¹ Namayepi 'eeta'am nam pioxoppi maye saishet da icoma', namayepi qagueta lo'opi qalaxaye qaica ca ỹaỹaten, ñi 'oonolec qalaq quetague' cam maiche llecỹaxac, qataq nmitta'a da maiche laỹamaxa.

¹² Qaq 'enapec naxa namayepi: «Qolaq selaqaique ca lataxa, qataq cam lataxa maye ỹataqta chem da yaqto' ishet da qomi' taxaicpi. Qaq nache shenaqtec nataqa'en qonte' qalaxaye ỹactec qome ca qanỹomaxac.»