Isaías 55 - La'aqtaqa Ñim Lo'onatac 'Enauacna 2013

Da nchoxonnataxanaxa maye qaca aca lasheue

¹ 'Enauac nam ilem laquip, anac qome da yaqto' nỹomgui na 'etaxat, qataq nam qaca aca alom anac qome da ỹache na trigo maye qoỹaatem da yaqto' aloq, qataq yaqto' ỹanata na lataxa qataq na huaca lche' maye qoỹaatem.

² ¿Ta'ainco' da qaỹa'añeeuec ana qo'omi da nmeneguet qanqa'eñi cam saishet da qanallec? ¿Ta'ainco' da qaỹa'añeeuec ana lasheue da qaro'onataxanaxaqui da nmeneguet qanqa'eñi cam saishet qami' icomaraqche't? Ñaq Aỹem qana'axaỹaxañiỹa yaqto' qolliqui qome ca no'on nallec, qataq cam nallec maye ỹataqta no'on da lamaic.

³ Ñaq Aỹem qauanaiua'a nache qana'axaỹaxañiichiguiñi, Aỹem qana'axañiỹa nache qanca'alleeuec. Aỹem so'ot qome cam chochaq tatec ñaỹamaxataxac da qami' ñaỹamaxateto, yaqto' sepaqueelec dam sachanapeguem co'ollaxa so David, souaxat da ỹauotaxanaqtaic somaye.

⁴ Aỹem sanem somaye da yaqto' aỹem ỹa'axat da da'aqtaxanem nam ỹotta'a't shiỹaxauapi, qataq nataxala' qataq ỹapaxaguen na ỹotta'a't shiỹaxauapi.

⁵ Qaq 'Am nagui, 'aỹaxana qome na shiỹaxauapi maye sa 'auauatton, qaq nam shiỹaxauapi maye saishet da 'am ỹauatton co'ollaxa qalaq 'am nqalgoqta'a qome, cha'aye Aỹem 'Arataxala' qataq Aỹem Qui'itta natamnaxala' na Israel le'ecpi, huo'o naq 'enec ñaqa'en 'am.

⁶ Ña qanmichiỹaique Ñim Nataxala' nagui da ñaq ishet da qauanachiỹa, ña qauỹaxañiỹa nagui da ña sa qaỹapeque.

⁷ Cam qauemaic qalaq ñaq ỹaxanec qome da ỹo'ottac na qauem, qataq cam 'etaxaloxoic ñaq ỹaxaarec qome naua qauema lhuennataxaco, ñaq qavi'iguelaqaỹot Ñim Nataxala', yaqto' ñimaye qami' ichoxore'n, ñaq qavi'iguelaqaỹot Ñim Qanatamnaxala', maye choxonnataxanaxaic yaqto' qami' ichoxore'n.

⁸ «Cha'aye naua iuennataxaco saishet da 'ena'ama naua qarhuennataxacolli', qataq da ỹecỹaxac saishet da 'eeta'am da qoyecỹaxaqui, qaq 'era da la'aqtac Ñim Nataxala'.

⁹ 'Eeta'am na piguem da ỹataqta qaỹoqotcheguemec, qaq nache 'eetec nam ỹecỹaxacpi da ỹataqta qaỹoqotcheguemec saq 'ena'am da qoyecỹaxaqui, qataq naua iuennataxaco saq 'ena'ama naua qarhuennataxacolli'.

¹⁰ Qataq 'eeta'am da 'eetec na auot qataq na 'aỹa da naañi chegaqasheguema na piguem, nache saishet da ỹe'eguelaq, nacherata da ỹapapiaxat ana 'alhua, nache ñaxachigui ana ala qataq ñaxatsheguem naqa'en, da yaqto' huo'o aca lañiguishe cam danaxaatac qataq huo'o ca aloq camaye.

¹¹ Qaq 'era da 'eeteque naua ỹa'aqtaqa maye chegoqraigui na aỹap, da saishet da qui'itchiguilo da Aỹem ñe'eguelqoto, nacherata da ỹo'ot cam sheetapeguec qataq ipacchigui cam ỹamaxasoxonaxac maye sanem.

¹² Qami' qoquiỹa'ai qome yemaye qauachiitec da qaramaicỹaxaqui, qataq nache qavi'iguelaqaỹa yem qana'alhuai qauachiitec da qarlagaxayiqui. Qaq qom qami' ỹauaachiguilo ana qasoxonaxapi qataq ana lcomaraxalatepi, nache ỹataqta na'axannec da lo'onaxanaxac souaxat da ntonaxac, qataq 'enauac ana qo'oipaqpi maye huetalec na no'onaxa iuaxana't qome naua lhuaxaye.

¹³ Qaq ñaxat qome ana piinopi da nmeneguet ana qo'oipaqole maye huo'o ana le, qataq ñaxat ana arrayanes da nmeneguet ana huoue le'enaxat poqo, qaq de'era ỹataqta ỹo'ot qome da llo'oxoyec dam le'enaxat Ñim Nataxala', qataq nachera qome dam chochaq tatec la'anaxat maye saishet da nlaguiñi.»