Isaías 52 - La'aqtaqa Ñim Lo'onatac 'Enauacna 2013

Qaỹa'axata'a da qaisouec ye Jerusalén

¹ Ñaq 'anlouec 'am Sión, ñaq 'anlouec, ñaq 'auauo'o da 'ara'añaxac, 'am Jerusalén, huaqta'a't nỹecpi maye qui'itta, 'aỹa'aayiñi naua 'ogo maye ỹataqta 'onaxaiqa, cha'aye na shiỹaxauapi maye ỹaqa'a da la'amqaanataxanaxac qataq nshepaxan da lataxac, namayepi saishet qome da ỹe'eguelaxalec da 'am huenoxoneua'a.

² Ñaq 'anachaañi 'am Jerusalén, 'achegoxouec na namoxoỹaxa, nache 'anso'oñigui añi so'onaxaqui. 'Am Sión, 'am qa'añole maye 'am ncoñeteguishe, ña 'anqat na lcoñetaxat na 'arqosot.

³ Ñim Nataxala', 'eeta': «Ỹataqta qaca co'ollaxa aca saconeguet lasheue da qoñiita co'ollaq qami' qaỹaue'c da yaqto' qami' nlatacpi, qaq ỹoqo'oye nagui saishet qome da huo'o aca sanec, da lasheue da qami' ñeca'alaxatrec.

⁴ Soua hua'au' vi'iye, nam ỹalamaxat nhuo' le'ecpi taỹa co'ollaxa ye Egipto, nache namayepi 'eeta'am ca chegaqauec co'ollaq hueta'a yemaye, qaq ime co'ollaxa nache na Asiria le'ecpi sa iyacnapec namayepi na'aictaxa da qaica ca ỹasouaxat.

⁵ Qaq nagui, ¿negue't cam seuatta'a? Ye nam ỹalamaxat nhuo' le'ecpi qaica ca huasoilec da qaỹauega ye Babilonia. Qaq nam ỹamaqtac namayepi ỹa'alaqtai' da ño'oxonnaxac, qataq nache queto'ot da Aỹem isheueetac.

⁶ Qalaxaye mashe natauo cam na'a'q da na ỹalamaxat nhuo' le'ecpi Aỹem ỹauattoota qome, qataq ỹaỹaten da aỹem maye setaqtacot co'ollaxa namayepi, nachaỹem Nataxala'.»

⁷ ¡Maye sa no'onolec da qailota'aguet da nactalec ana qasoxonaxapi cam nachetac da no'on na'axaỹaxac cam ỹa'axatec da nlagaxayec, qataq ỹa'axata'a da qaisouec na shiỹaxauapi qataq 'enapega na Sión, 'eeta': «Ñim 'Anatamnaxala' nacheñi Nta'a!»

⁸ ¡Ña 'ana'axaỹaxaañi! Na 'arauanaxanaxanecpi ỹataqta nlamaxaren qataq nmasheguem da ỹa'alaq souaxat da ntonaxac cha'aye ỹataqta ỹauaachigui da lle'eguelaxasoxoc Ñim Nataxala' da ñe'eguelaxa na Sión.

⁹ ¡Qami' maye qarmaye na nlachiguiñi Jerusalén, ña qanmiỹasheguem da qauo'onaxañi souaxat da qantonaxaqui cha'aye Ñim Nataxala' huo'o da lchoxonnataxanaxa na lalamaxat nhuo' le'ecpi qataq nca'alaxatec na Jerusalén!

¹⁰ Ñim Nataxala' ỹachaxan da la'añaxac ỹauaachigui naqa'en 'enauac na ỹotta'a't shiỹaxauapi. Qaq 'enauac nam netalec ana 'alhua, ỹaỹaten qome da Ñim Qanatamnaxala' qomi' nca'alaxatrec.

¹¹ ¡Qoquiỹa'ai, qoquiỹa'ai nagui na Babilonia, nache saishet da qauashilleeua'a ca nshepaxan da lataxac, qoquiỹa'ai nagui na Babilonia! ¡Qanchilỹa'a da qui'itta qarataxaqui qami' maye qauachiitac nam no'onataxanaxatpiolec maye lalamaxat Ñim Nataxala'!

¹² Qalaxaye saishet da qaỹalleetapigui' da qoquiỹa'ai namaye, qataq saishet da qauataiuec, cha'aye Ñim Nataxala' maye Natamnaxala' na Israel le'ecpi qami' mpaxattaleguete qome.

Da nque'eenaxac cam lamaxashec Ñim Nataxala'

¹³ Ña qaumichiñi, ñim ỹamaxashec dauegaxan qome, nache huo'o da la'amaqchec qataq qaỹo'oreetac qome.

¹⁴ Qaq dam 'eetec da qalota nam ỹa'aalac ñimaye, co'ollaq ỹauaachigui da sa nateneuo da lasheguiỹaxac, qataq deqat 'enauac dam lataxac cam shiỹaxaua,

¹⁵ qaq nache 'eetec nataqa'en qome da qalota na ỹotta'a't shiỹaxauapi nam huo'o da la'aalaxa, qaq na nta'alpi qom ila'a nache 'eco' qaicaua naua la'aqtaqa, cha'aye ỹauaachigui qataq ỹaỹaten qome dam sa ỹauanega da hua'aqchigui.