Isaías 51 - La'aqtaqa Ñim Lo'onatac 'Enauacna 2013

Na'aqtac maye ỹa'añaqchet ye Jerusalén

¹ Ñim Nataxala' 'enapec: ñaq aỹem qana'axaỹaxañiỹa 'enauac qami' maye qoquiitague' da no'on lataxac qataq aỹem qanmicheetaique ña qaumichiñi ñim coma' maye qami' qaỹachegoxotraña co'ollaxa, qataq ñim auac añi coma' maye qami' qaỹachegoxotchiguinguilo co'ollaxa,

² ña qauloichigui so Abraham maye qarta'ai qataq aso Sara maye qarachi'i. Co'ollaq seỹaxana so Abraham qalaq 'oonolec somaye qalaxaye sanem somaye da ichoxonnataxanaxa nache qalota ñaqa'en so llalaqpi.

³ Aỹem sa'añaqchet qome ye Sión, yem huaqta'a't nỹecpi maye nlachiguiñi co'ollaxa. Yem toolec 'alhua maye deqaqta qalaq she'eguelaxata qome da no'on nanaxanaqa', 'eeta'am som lanaxanaqa' Ñim Nataxala' maye huaña ye Edén. Qaq yemaye qome huo'o da namaicỹaxac qataq da tonaxac, qataq hueta'a da no'onaxanaxac qataq da l-lamaxa ana nvique.

⁴ Ña Aỹem qana'axaỹaxañiỹa qami' ỹalamaxat nhuo' le'ecpi, qataq qami' ỹotta'a't shiỹaxauapi, ñaq Aỹem qana'axaỹaxañiỹa Aỹem sa'axatec qome da ỹapaxaguenataxanaxac qaq naua ỹamaxasoxonaxaco qalaq icoỹarelec qome na shiỹaxauapi.

⁵ Mashe saqaỹapeque da ỹauegaxanaxac, mashe anacta da ica'alaqtaxanaxac, so'onataxana qome da ỹa'añaxac da selo'ogue na nhuo' le'ecpi. Qaq nam netalec na ỹaqa'ata 'alhuapiolec qalaq aỹem iuatta'aguet qome, qataq pi'iỹa'a da ỹa'añaxac.

⁶ Ña qauamachiỹo'ot na piguem, qataq qauamachiỹalec ana 'alhua: na piguem qalaq nlagaxatapec qome 'eeta'am na lmala'q, qaq ana 'alhua qalaq lto qome 'eeta'am aca npoto, qataq na netalecpi anamaye ileu qome 'eeta'am aca 'aỹat. Qalaxaye da ica'alaqtaxanaxac chochaq tatec qome, qataq da ỹauegaxanaxac saishet da huo'o ca loga't.

⁷ «Ñaq Aỹem qana'axaỹaxañiỹa qami' maye qauaỹachiñi da no'on lataxac, qami' nhuo' le'ecpi maye ỹataqta qauacheetaigui da qarquiyaqteỹaxaqui naua iqataxaco. Saishet qome da qayi'iitega da larenaxanaxac nam ỹalleppi, qataq da qaica ca qara'añaxaqui naqa'en nam lsheunaxanaxacpi namayepi,

⁸ cha'aye namayepi 'eeta'am qome ca nogoxot da ichec na nogoxot lalaxat, qataq 'eeta'am ca qagueta laue da ichec na qoche'lpi. Qalaxaye da ỹauegaxanaxaxac chochaq tatec qome qataq da ica'alaqtaxanaxac nache 'eetai' qome qaica ca loga't.»

⁹ Ñaq 'anlouec, ñaq 'anlouec, 'am lhuaq Ñim Nataxala', ñaq 'auauo'o da 'ara'añaxac. Ñaq 'anlouec 'eeta'am 'anqa'en som hua'au, som na'a'q maye mashe qaỹoqtegue. 'Am 'aucolaxattac co'ollaxa so Rajab som shiguiỹac maye 'etaxat le'ec,

¹⁰ 'Am, deqaqa co'ollaxa 'anqa'en aso auaxai, som 'etaxat maye huetangui aso qaỹoqchiguingui, nache na laiñi aso auaxai 'auo'ot co'ollaxa so nqa'aic da yaqto' llegueta 'anqa'en som 'anca'alaxateecpi.

¹¹ Qaq 'era da 'eetec nataqa'en qome nam lca'alaqtacpi Ñim Nataxala', ỹa'alaqtagui da ntonaxac qom inoxoneua'a ye Sión, da lasheguiỹaxac qalaq nache 'eetai' qome da machiguiñi, cha'aye ỹanata da lamaicỹaxac qataq da na'achecỹaxac, qaq imeuo qome da nqui'ic qataq nnoinaxac.

¹² «Qaq Aỹem, nachaỹem da 'am sami' da 'ara'añaxac. ¿Qaq negue't qone' ca 'añe'etega? ¿Nachena peta'a nam shiỹaxauapi? ¿Nam shiỹaxauapi maye huo'o ca loga't, 'eeta'am ana huoue?

¹³ ¿Qaq 'aucoua'ai peta'a qome Ñim Nataxala', Ñim 'am lo'onatac, Ñim ilagaxaañi co'ollaxa na piguem qataq ỹo'ot ana 'alhua? ¿Qaq peta'a nache tatec qome da 'aviloxoltai' souaxat da nnogoxonaxac nam 'am sairen, maye 'am iyaqtalec da 'am ilaxachigui? Qalaxaye ¿ca hueta'ague que'eca nnogoxonaxac?

¹⁴ Mashe saqaỹaloq da huesouec nam ncoñeteguishecpi, qaq saishet qome da ileuaigui aca ncoñetaxanaxaqui, qataq saishet qome da iueetaique ca aloq.

¹⁵ Cha'aye Aỹem Nataxala' maye Aỹem 'anatamnaxala' da ỹe'enaxat 'eeta': Nataxala' maye Qaica ca Ỹaqalanapec. Aỹem seraxan aso auaxai, nache ỹataqta dauaxan ana lapaxa.

¹⁶ Naua ỹa'aqtaqa qalaq sanaiguilo na 'ap, qataq 'am ỹapotalec ñaqa'en na lpaqal na ihuaq, Aỹem selagaxaañi co'ollaxa na piguem, qataq so'ot ana 'alhua, qataq shenapega ye Sión sheeta': ‹'Am maiche 'am ỹalamaxat.›»

¹⁷ Ñaq 'anlouec, ñaq 'anlouec 'am Jerusalén, ña qoñesheguem. 'Am 'anque'etaxangui co'ollaxa da nnogoxonaxac Ñim Nataxala', qoneta'am ca nỹomgui aca ỹomaxaqui nache ivitta'a da qui'itchigui naqa'en, nache ivitta'a da ỹataqta da taxaic.

¹⁸ Qaq 'enauac nam huo'o 'aỹa'alaqpi qaica ca 'oonolec da 'am ỹaueca'aguet, 'enauac nam 'aỹa'alaqpi maye 'aỹa'aqchet, qaica ca ỹacoota'aguet na 'arhuaq.

¹⁹ Qaq ne'enaua dos qauema 'am taleguete, na 'ana'alhua qailaxachigui qataq qanhuotta co'ollaxa, so 'analleppi qalaq ilem na lqouaxa, qataq ileuaigui so alaataxac. Qaq ¿negue't ca 'am ichoxoreetac qome? Qataq ¿negue't ca 'am ỹa'añaqchet qome?

²⁰ Na 'aỹa'alaqpi qalaq decopche co'ollaxa huetaña ana lamaqaipi na nqa'aicpi, qataq 'eeta'am aca chegaxango da noxona da huetaigui ca naleguec. Qaq 'enauac da que'emaq souaxat da layeloxo Ñim Nataxala' qataq da lhuogoqtaxanaxac Ñim 'Anatamnaxala'.

²¹ Qaq ỹoqo'oye 'am maye 'auaquicotac ñaq 'ana'axaỹaxana de'era, 'am maye 'am taxai qalaxaye saishet da nachena na lataxa da 'autaxac,

²² Ñim 'Arataxala' qataq 'Anatamnaxala' maye iuetteguelec nam lalamaxat nhuo' le'ecpi, 'eeta': «Aỹem, ñeqateeguesop qome na 'arhuaq ana ỹomaxaqui maye ỹo'ottac da 'artaxa, nache saishet qome da 'avi'eguelaxa da 'anỹomtapigui ana ỹomaxaqui maye huetaigui da ỹayeloxo.

²³ Qaq sanem qome nam ỹo'ottac da 'anque'eenaxac, nam 'am 'eetega naxa, 'eeta': ‹¡'Anqapaxanguet na 'alhua yaqto' 'am sapiaqteguelec!› ¡Qaq 'am 'anqapaxaneguet co'ollaxa na 'alhua, da yaqto' namayepi 'am petapigui 'eeta'am naqa'en ca namoxoỹaxa!»