Isaías 50 - La'aqtaqa Ñim Lo'onatac 'Enauacna 2013

¹ Ñim Nataxala', 'eeta': «¡Saishet qome da qaupicheetega da salat na Israel maye 'eeta'am aca qarachi'i, da sheeta'am ca ỹale da ỹalat aca lhua, huo'otaq da qami' seme'n co'ollaxa da yaqto' qami' nlataqa souaxat da huo'o ca hueto'ot aca ỹavigaxaiste! Maye qami' qaime'n co'ollaxa cha'aye huo'o da qarasouaxashichi, na Israel maye 'eeta'am aca qarachi'i qaỹalat co'ollaxa, cha'aye qami' sa qaualaqai.

² ¿Ta'ainco' co'ollaq ñevi', nache qaica ca selalec? ¿Ta'ainco' co'ollaq seỹaxan, nache qaica ca ỹasat? ¿Qaupicheetega peta'a da aỹem sañaloua'a da qami' ñeca'alaxatrec? ¿Qaupicheetega peta'a da sa sañoxot da qami' sesore'c? Qamaq aỹem ishet da choche 'oonolec ỹa'aqtac ca san nache deqaqa aso auaxai, qataq ana talapi qalaq ỹe'eguelaxa da toolec 'alhua, yaqto' na nỹaqpi ilem na laquip nache nchega souaxat da qaica ca 'etaxat.

³ Aỹem, sapolec na piguem na napalaxa, 'eeta'am ñaqa'en da ỹaayiñi caua nogo maye nasouaxaqui'.»

Da naquitaxac som lamaxashec Ñim Nataxala' co'ollaq huetaigui da nque'eenaxac

⁴ Ñim Nataxala' aỹem ỹanema naua na'aqtaqa ỹaanaxanaxaiqa, da yaqto' saỹaten da sa'añaqchet cam nasamtañi. Ye nte'eta qalaq aỹem nquetoxon da yaqto' saconegueta naua lapaxaguenataxanaxaco sheeta'am ca no'on napaxaguenatac.

⁵ Ñim Nataxala' aỹem ỹanem da naỹaanataxanaxac qaq aỹem saishet da sataỹa'aguet qataq saishet da sa seqocha'a.

⁶ San na ilaq da yaqto' aỹem qaỹalaqan qataq sa'aqta'a da qanapo'c naua iqa' laue. Qataq saishet da seltaxaneguet na ỹashec nam aỹem isheueetac qataq nam aỹem nqaigoqto'ot.

⁷ Qaq Ñim Nataxala' nacheñi ñim aỹem itauaatac, qaq ỹoqo'oye saishet da aỹem ique'emaqchet na nsheunaxanaxacpi, qataq saishet da huo'o ca aỹem iraxanapigui' sheeta'am ca coma', qataq saỹaten da saishet da aỹem nlaxagui da ỹa'aloxo.

⁸ Aỹem hueta'aguet ñim aỹem npaxattalec. Qaq ¿huo'o peta'a ca 'eetega huo'o ca ỹasouaxashet? ¡No'on da ñeqo'onaxaua'a ñim nmit ca nasouaxashet! ¿Huo'o peta'a ca ipettega da 'eesa, cam 'eetega ỹasouaxashet? ¡No'on da anac camaye, nache aỹem da'aqtaxanem!

⁹ Ñim Nataxala', nacheñi ñim aỹem itauan, qaq ¿negue'to' ca ishet da ỹauo'o qome ca ñeuaxanaguec? 'Enauac nam ñepa'aguenaxauapi deqat qome, 'eeta'am ca nogoxot da ichec na nogoxot lalaxat.

¹⁰ Qaq qami' maye huo'o naq 'enec qanqa'aiñi Ñim Nataxala' qataq qana'axaỹaxañiitega dam lavilỹaxac nam lamaxashec Ñimaye: da qoquiitaigui na napalaxa maye qaica ca le'eraxa maye ỹo'ot da yo'oqchiguiñi, qaq no'on da qauauo'oi ca qarpi'iỹaxaqui Ñim Nataxala' qataq qoviilec Ñim Lo'onatac 'Enauacna.

¹¹ Qalaxaye qami' maye qaualoñi naxa na norec, qataq qauauo'oi ana qarcoỹaraxanaqche 'ettaigui, qataq qoquiitaigui na le'eraxa namaye qataq nam le'eraxa ana qarcoỹaraxanaqche. Qaq 'era qome da qami' taleguete ñaqa'en, nache qoviitangui qome da lta'araic qanque'eenaxaqui.