Biblia Todo Logo
Bìoball air-loidhne

- Sanasan -

Isaías 5 - La'aqtaqa Ñim Lo'onatac 'Enauacna 2013


Qaỹaloqnaxana aso nañiguishe uva

1 Nagui so'onaxan souaxat so ñauochaxaua, so'on dam no'onec maye ỹa'axat so lanaxanaqa' uva lma' so ñauochaxaua. So ñauochaxaua huo'o co'ollaxa so lanaxanaqa' uva lma', maye huaña so ỹataqta no'on 'alhua.

2 Nqalagoxotsheguem so 'alhua qataq nqateeguesop so coma'pi, nache ỹaalec aso ỹataqta no'on nañiguishe ala, qataq no'oxoosheguem aso nalloxolate ỹanangui na laiñi so lanaxanaqa', qataq ỹo'ot nataqa'en so no'onataqa' na lataxa. Nache so ñauochaxaua iuatta'a aca ỹataqta ama ala aso lañiguishe uva, qalaxaye aso ala aso lañiguishe uva ỹataqta ñe'eua.

3 Qaq nagui, qami' maye qarmaye na Jerusalén, qataq qami' ỹalleppi maye qarmaye na Judá, ña qaua'axache nagui ¿negue't ca huo'o ca lasouaxashet? Nam ỹanaxanaqa' qalqo' aỹem.

4 ¿Negue't ca lỹa ishet da so'ot na ỹanaxanaqa' uva lma'? ¿Peta'a huo'o ca lỹa maye saxanaxa da so'otec namaye? Aỹem seuatta'a co'ollaxa da huo'o aca ỹataqta ama ala ana uva, qalaxaye ¿ta'ainco' da ỹataqta ñe'eua aso ala ana uva?

5 Qaq nagui qami' sa'aqtaxanema da iuennataxac da so'otec na ỹanaxanaqa' uva lma': Ñeqat qome na lpaqtaxat yaqto' qailaxachigui, qataq samaxañi qome so lpaqtaxanaxat coma' yaqto' qaỹapetapigui.

6 Nache so'otec qome da qanayeca'ai, qataq saishet da qaichec ana lcouepi ana uvapi, qataq saishet da qaimettacot, nache ñaxaalec aca ỹaxat. Qataq shenapega na lo'oc na piguem da saishet da naañi naqa'en ca auot da talec yemaye.

7 Qaq som lanaxanaqa' uva lma' maye lauotaxat Ñim Nataxala' maye Qaica ca Ỹaqalanapec, nachena nam Israel le'ecpi, qataq nam nhuo' le'ecpi maye lma' ye Judá. Ñim Nataxala' iuatta'a co'ollaxa namayepi da ỹalaxaguet na lqataxacpi Ñimaye, qalaxaye nacherata da ilalec da nalaataxanaxac, qataq iuatta'a da ỹo'ot da nalochiguiñi lataxac, qalaxaye nacherata da hua'aqtega da na'alaxac souaxat da qui'ic.


Da nasauaqtaguec na qauemaicpi

8 ¡Choxoraxaso' qome nam desheenaxatega na qalota lma'pi, qataq nquigaxattauec na na'alhuapi, nache qaica ca lma' naqa'en ca lỹa shiỹaxaua, qaq 'eco' da nachaqnata namayepi da netalec na 'alhua!

9 Ñim Nataxala' maye Qaica ca Ỹaqalanapec aỹem ỹanem da la'aqtac, 'eeta': «Qalota na nỹecpi na nlachiguiñi qome, qaq na'aictaxa da lta'araicpi qataq 'onaxaicpi na nỹecpi qalaxaye qaica qome ca netaigui.

10 Cam qalochiguiñi 'alhua maye ñaxattalec ana uva, da qanqat nache 'oonole acatai' nlaxachigui laỹe' ca lataxa, qataq caua diez laỹe' ana ala aca nañiguishe da qanqat nache 'oonolec ca nlaxachigui laỹe' na trigo.»

11 ¡Choxoraxaso' nam no'ottasheguem ye nte'eta da yaqto' no'otta'ai' da nỹomaxac na lataxa, nache choche ivitta'a ye pe da nỹomtac nache ivitta'a da ỹataqta taxaic.

12 Nam la'ashaxacpi qalaq nda'a't ana nviquepi arpapi, salteriopi, qataquipi, qataq ana nasheerepi qataq na lataxa, qalaxaye saishet da ila'a nam ỹo'otpi Ñim Nataxala', qataq saishet da iuennata'a nam lo'onatacpi Ñimaye.

13 Qaq ỹoqo'oye na ỹalamaxat nhuo' le'ecpi qaỹauega qome ca ỹaqa'a 'alhua souaxat da saishet da aỹem ỹauatton, 'enauac na nhuo' le'ecpi qataq na lataxala'pi ilem qome na lqouaxa qataq na laquip.

14 Qaq ỹoqo'oye aca huachiqui nquigaxatec qome na lauel, qataq qaica ca loga't da ỹauattagui na alap da yaqto' iuoxonañi na nhuo' le'ecpi qataq na lataxala'pi, nam shiỹaxauapi maye ỹo'ottac na qauem qataq na la'ashaxacpi.

15 Na shiỹaxauapi ỹataqta qaica qome ca 'enec, na ño'oxonnaxaicpi qalaq choche nloguiñi qome.

16 Qalaxaye Ñim Nataxala' maye Qaica ca Ỹaqalanapec ỹachaxan qome da la'amaqchec qom nmit na shiỹaxauapi, Ñim Lo'onatac 'Enauacna maye qui'itta ỹachaxan qome da qui'itta lataxac, qom ỹo'ot ca nalochiguiñi lo'onataxanaxac.

17 Na huaqta'a't nỹecpi ỹataqta nlachiguiñi qome, nache ana qaguetapi qataq ana quetaqpi lquia'aqa' qome namaye.

18 ¡Choxoraxaso' nam nỹoqtala't na qauem, souaxat da latenataxanaxac nache ỹauecta'aguet na lasouaxashetpi 'eeta'am ca ỹauecta'aguet aca naigona!

19 Qaq namayepi 'enapec naxa: «Ñim Lo'onatac 'Enauacna, no'on da sa ỹaỹaloxon da ỹo'ot nam lo'onatacpi yaqto' sauanaqchigui, Ñim Qui'itta Natamnaxala' na Israel le'ecpi, ña iỹalapegue' qome da ipacchigui naqa'en da ỹo'ot nam lapaxañipi co'ollaxa yaqto' sauattonaq.»

20 ¡Choxoraxaso' na 'eetega no'on na qauem, qaq na qauem qalaq 'eetega no'on, qaq na yo'oqchiguiñi qalaq nmeneguet naqa'en na napalaxa, qaq na napalaxa qalaq nmeneguet naqa'en na yo'oqchiguiñi, qaq na chem qalaq 'eetega ama, qaq na ama qalaq 'eetega chem!

21 ¡Choxoraxaso' nam 'eetega ỹaanaxanaxaicpi, qataq nam 'eetega ỹaanataxanaxaicpi!

22 ¡Choxoraxaso' nam qaica ca nauec da nỹomtapigui na lataxa, qataq nam ỹalleppi maye 'añaxaicpi da ỹalecna't na lataxa!

23 Na nmitta'a da nmeela't da ỹo'ot da qaica naqa'en ca lasouaxashet nam huo'o na lasouaxashet, qataq saishet da ỹo'otec ca no'on nam no'on da lataxac.

24 Qaq ỹoqo'oye 'eeta'am qome ca norec da ỹavicta naqa'en ca 'auaqpi deqaqta, qataq na le'eraxa camaye da chepchiguiñi naqa'en ana deqaqta laue ana qo'oipaq, qaq nache 'eetec qome namayepi da imeuo, 'eeta'am aca qo'oipaq da lto na lpa'a'pi, qataq ana lauoxo nlaguiñi nache nañigui namoxoỹaxa, cha'aye sa ỹalaxagueta naua lapaxaguenataxanaxaco qataq naua lamaxasoxonaxaco Ñim Nataxala' maye Qaica ca Ỹaqalanapec, Ñim Qui'itta Natamnaxala' na Israel le'ecpi.

25 Qaq ỹoqo'oye Ñim Nataxala' dalemataỹa na lalamaxat nhuo' le'ecpi souaxat de'era, nache nauaxaỹaxaasheguem qome na lhuaq da yaqto' iuaxan namayepi. Qaq ana qasoxonaxapi qalaq cholaxan qome qaq na leuaxaicpi qalaq 'eeta'am ca lasogoñi da huetaiya' huetangui na nqa'aicpi. Qalaxaye da layeloxo Ñim Nataxala' saishet qome da vi'iiguet, nache queto'ot da lasauaqtaxanaxac.

26 Ñim Nataxala' nauaxaỹaxaasheguem qome aca la'anaxanaqte, qataq yo'oxon qome da iỹaxana ca nhuo' le'ecpi maye hueta'a ca ỹaqa'a 'alhua, nache sa naỹaloxon naqa'en da nvi'.

27 Qaq camayepi qaica qome ca nasamtapiguiñi, qataq qaica ca pogolaxaateguiñi, qataq qaica ca do'ochetapigui' qataq qaica ca sa ichiguiñi naqa'en ca nsaataxaqui, qataq qaica ca dachepta'ape caua lque'ete caua lapela'ate.

28 Aca lchecnapi qalaq ỹataqta ỹaxaraipi, qaq ca lchecnecpi qalaq ỹataqta ichegaxattelec. Aca naro'opi ca lalopi caipi qalaq 'eeta'am na coma', qaq naua lasaxanna acam laigonapi qalaq 'eeta'am ana daua'ache,

29 qaq da desoqo qalaq 'eeta'am ca llon maye desoqtai' da huo'o ca loxonec, qaq da ỹache cam loxonec camaye nache qaica ca ishet da deuotaxanec.

30 Qaq que'eca nhuo' le'ecpi qom ivita cam na'a'q maye naloqnec, nache da l-lamaxa dauaxan qome 'eeta'am aso auaxai, qom dataỹa'aguet na Israel le'ecpi, qaq da huo'o ca imeten ana 'alhua, nache ila'a qome da imattalec ca napalaxa, ca lo'oc na piguem qalaq ỹapo'oguet na yo'oqchiguiñi.

Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.

Argentine Bible Society
Lean sinn:



Sanasan