Isaías 49 - La'aqtaqa Ñim Lo'onatac 'Enauacna 2013

Som lamaxashec Ñim Nataxala'

¹ Ñaq aỹem qanaxa'axaỹaxaña qami' maye qoñiitalec ana ỹaqauga 'alhua aso auaxai, qataq aỹem qanaxaỹaxañiỹa qami' ỹotta'a't shiỹaxauapi maye qami' qaỹoqtalo. Ñim Nataxala' aỹem iỹaxana co'ollaq saxanaxa da aỹem ñiguiñi nasaxauec da ỹe'enaxat co'ollaq ñaq sootaigui na lauel aso ỹate'e.

² Nache ỹo'ot da naua ỹa'aqtaqa 'eeta'ama ca ỹeelonec ỹaxaraic, qataq aỹem ỹapolec na lhuaq, nache sheeta'am naqa'en aca checna ỹaxarai qataq aỹem ỹoxotoigui so lchecna laỹe'.

³ Nache aỹem 'enapega 'eeta': «'Am Israel, 'am ỹamaxashec, qaq nache 'am sachegoqchigui qome da sachaxan da ỹo'oxoyec.»

⁴ Qalaxaye aỹem shenapec': «Aỹem ỹataqta qaica ca naigui da ỹo'onataxanaxac, choche semetaxateuo da ỹa'añaxac qalaq qaica ca sachegoxotaigui.» Qalaxaye nam so'otpi hueto'ot Ñim Nataxala', qaq cam ñesheetanaguec qalaq chegoqo'ot qome Ñim Lo'onatac 'Enauacna.

⁵ Qaq aỹem saconeguet da ỹa'amaqchec chegoqo'ot Ñim Nataxala' maye Ñatamnaxala', cha'aye Ñimaye nacheñi ñi ỹa'añaxac. Ñim Nataxala' maye aỹem ỹo'ot co'ollaq ñaq sootaigui na lauel aso ỹate'e da yaqto' aỹem lamaxashec, qataq da yaqto' so'ot da na Israel le'ecpi maye chegoxoguet so Jacob ñe'eguelaq da yaqto' hueta'aguet Ñimaye,

⁶ Ñimaye 'eeta': «Saishet da nacherata da 'am ỹamaxashec da yaqto' nauaqsheguem 'anqa'en na llalaqpi so Jacob, qataq da 'añe'eguelaxat na lca'alaxaicpi Israel le'ecpi, maye nataqa'en 'am sanem da 'am lcoỹaraqte na ỹotta'a't shiỹaxauapi, da yaqto' 'auache da ica'alaqtaxanaxac nache 'aviraxata'a cam ỹataqta pa'atec ana 'alhua.»

⁷ Ñim Nataxala' maye Ca'alaqtaxanaxaic, Ñim Qui'itta natamnaxala' na Israel le'ecpi, 'enapega na shiỹaxauapi maye ỹataqta saq qaiyacnapec, nam lqaigaxat na laỹepi shiỹaxauapi, nam l-latac co'ollaxa nam qaica ca ireetacpi Ñimaye, 'eeta': «Qom 'am ila'a na nta'alpi qataq nam 'amaqtaqaicpi, nache nachaañi qome qataq 'am ỹa'aroto naua l-llecte, cha'aye Aỹem Nataxala', maye Qui'itta natamnaxala' na Israel le'ecpi, 'am lleca'aguishec co'ollaxa, qaq sepacchigui qome nam sachaxanapecpi.»

Qaỹa'axata'a da qaltaq qano'oxoosheguem ye Jerusalén

⁸ Ñim Nataxala', 'eeta': «Co'ollaq ivita so laloqo' da sachaxan da ỹauotaxanaqtaic, nache 'am sasateguet, ivita so laloqo' da nca'alaxa nache 'am setauan. Aỹem 'am ñepaxaalec co'ollaxa, da yaqto' 'am sachegoxotchigui da ñaỹamaxate' na nhuo' le'ecpi, qataq yaqto' 'avi'eguelaxata da lataxac ne'ena 'alhua, qataq 'auo'ot da qanayenalec nam 'alhua maye toolec,

⁹ qataq da yaqto' qonapega na ncoñeteguishecpi: ‹Qapa'aiuec›, qataq na huetaigui na napalaxa: ‹Qanachaxañi qome› qaq 'enauaque naua loiguiye na nqa'aicpi qalaq qauanachiỹa qome na 'auaqpi qataq camachaqaca anam qasoxonaxapi maye toolec, qalaq huo'o qome na aloq na qareloipi.

¹⁰ Qaq huaña qome nache qaica ca qarqouaqai qataq saishet da qaviñiitaique ca qaraquipi, qataq saishet da qami' sa ỹalemaxa't na le'eraxa añi nala', qataq na napaxaỹaxa, cha'aye aỹem qami' sauoteque, nache qami' sauecta'agueta, qataq qami' sauegalo ca huaña na npaxaatasheguem 'etaxat.

¹¹ So'ot qome ca nqa'aic taalec ana qasoxonaxapi, qataq so'ot da nalochiguiñi na nqa'aicpiolec.

¹² ¡Ñaq qauloỹa! Namayepi chegaqa'a cam ỹataqta qaỹoqta, huo'o na chegaqa'ague da sheu' qataq huo'o na chegaqa'ague da nala' lliguiñi qataq huo'o na chegaqa'a ye 'alhua Asuán.»

¹³ ¡'Am piguem, ña 'aua'alaq qome souaxat da 'aramaicỹaxac! ¡'Am 'alhua ña 'am nlaxagui qome da 'antonaxac! ¡Qami' qasoxonaxapi qa'aua'alqaitai' qome souaxat da qauamaichiguiñi! Cha'aye Ñim Nataxala' ỹa'añaqchet nam lalamaxat nhuo' le'ecpi, qataq huo'o da lchoxonnataxanaxa souaxat da lta'araic lhuogoxo.

¹⁴ Qalaxaye ye Sión, 'eeta': «Ñim Nataxala' aỹem ca'ai, Ñim Ñatamnaxala' aỹem icoua'ai.»

¹⁵ Qalaxaye, ¿ishet peta'a aca nate'e da icoua'ai ca llalec, huo'otaq da vi'iiguet da lauoche cam lalamaxat llalec? Qaq na'aictaxa da acamaye icoua'ai ca llalec, qalaxaye Aỹem saishet da 'am secoua'ai.

¹⁶ Aỹem, shettalec da 'are'enaxat na ihuaq lauel, qataq nache 'eetai' da saishet da secoua'ai nam 'arpaqtaxanaxatpi.

¹⁷ Nam qaltaq 'am no'oxoosheguem qome namayepi ỹataqta iỹalapigui', saq 'ena'am nam 'am nlaxaañi co'ollaxa, qaq mashe jec som 'am nlaxatchiguiñi co'ollaxa.

¹⁸ Ñaq 'anamatasheguem, qataq 'ameenaxanapiguiñi, ñaq 'aumeten da 'eetec da laỹootega't 'enauac namayepi nache 'am ỹe'eguelaxa. Aỹem ñeca'altauec 'enapec Ñim Nataxala', qaq san da ỹa'aqtac da 'enauac namayepi, 'eeta'am qome aca nqola da 'am qoỹanaxanaxangui, qataq 'eeta'am aca llo'oxoraqte aca auonaxaua.

¹⁹ Na 'ana'alhua qailaxachigui co'ollaxa, ỹataqta qanlaxatchiguiñi qataq ivira'a da toolec, qalaxaye nagui 'eeta'am da saq 'amaqtaq souaxat da qalota na shiỹaxauapi maye netalec namaye. Qaq som 'am ilaxachigui co'ollaxa qalaq mashe qaỹoqta.

²⁰ Qaq nam 'aỹa'alaqpi maye mashe qonetega deqat co'ollaxa qalaq 'am 'enapega qome, 'eeta': «Ne'ena 'alhua ỹataqta sa ñaloxolec, ña 'auauo'o qome ca qarma' da yaqto' sonaqtalec.»

²¹ Qaq 'am 'auennataxaatac qome nache qoneta': ¿negue't co'ollaxa cam aỹem ỹanem ne'ena ỹalaqpi? Ye aỹem qaica co'ollaxa ca ỹalaqpi qataq saishet da seco'o, qataq aỹem qaỹauec co'ollaxa nache aỹem qaiỹotauga. Qaq ¿negue't co'ollaxa ca ỹaqchet namayepi? Aỹem qaỹalata'a't co'ollaxa, ¿qaq cam chegaqa'ague namayepi?

²² Ñim Nataxala', 'eeta': Sanem qome ca ỹamaxasoxonaxac nam ỹotta'a't shiỹaxauapi, qataq sanasheguem aca ỹa'anaxanaqte da yaqto' ila'a na nhuo' le'ecpi, yaqto' nachetasheguem qome da 'am nauegueua'a na 'aỹa'alaqpi ỹalleppi qataq ỹachetalec na lallac da 'am nauegueua'a ana 'aỹa'alepi.

²³ Na nta'alpi qalaq ỹauo'o qome da 'am llalec, qaq ana lhuapi qalaq 'arsoquiaxanaxanapi. Qataq 'am ỹa'atto'oto qome naua l-llecte, qataq ichegoxouec na 'alhua naua 'arapia'ate. Qaq huaña qome nache aỹem 'auauattoota da nachaỹem Nataxala', qaq nam aỹem ỹa'amaqteetac saishet qome da hueto'ot ca lcoxo.

²⁴ ¿Ishet peta'a da qaiuotaxanec cam hueto'ot nogoxoshet cam ỹale 'añaxaic maye ỹachegoxotaigui ca alaataxac? Qataq ¿ishet peta'a ca ncoñeteguishec da no'otaiguesop cam ỹale maye qaica ca iren?

²⁵ Qalaxaye Ñim Nataxala' 'eeta' da la'aqtac: «Ca shiỹaxaua 'añaxaic, ishet da qaiuotaxanec cam loxonec qataq cam qaica ca iren ishet da qaiuotaxanec cam laueguec. Qaq Aỹem sataỹa'aguet qome nam 'am icogaxaatacpi, Aỹem ñeca'alaxatec qome na 'aỹa'alaqpi.

²⁶ Qataq nam 'am ique'eteetalec naxa so'otec qome da chec na maiche lapat qataq da nỹomgui na maiche ltago'q 'eeta'am naqa'en ca lataxa. Qaq 'era da 'eetec qome da 'enauac na shiỹaxauapi ỹaỹaten da Aỹem, Aỹem Nataxala' nachaỹem 'arca'alaxaqui. Qataq da Aỹem maye la'añaxanec so Jacob, nachaỹem 'arca'alaxaqui.»