Isaías 48 - La'aqtaqa Ñim Lo'onatac 'Enauacna 2013

Ñim Nataxala' ỹa'axata'aguet cam dalaxaic

¹ Ña qana'axaỹaxañiỹa de'era qami' maye qami' llalaqpi so Jacob, maye qauacheetac da le'enaxat so Israel qataq qauachegoqoiguet so Judá, qami' maye qaỹa'añim naxa da qara'aqtaqui Ñim Nataxala' qataq qanatamñiitacot Ñim Natamnaxala' so Israel, na'aictaxa da saishet da ỹataqta qami' 'eesora qataq saishet da no'on da qarataxaqui,

² qataq qoñiitega naxa da qarma'ai na qui'itta huaqta'a't nỹecpi, qataq qaua'amaqchiñiitac ñim Natamnaxala' so Israel, maye le'enaxat Nataxala' Qaica ca Ỹaqalanapec.

³ Qaq som yo'oq co'ollaxa mashe sa'axatta'aguet soua hua'au' vi'iye, qaq nachaỹem maye sachaxan co'ollaxa, qaq sa ñaỹaloxon co'ollaxa da so'ot nache somaye ỹataqta ipacchigui.

⁴ Qaq Aỹem ye saỹaten da ỹataqta qaramchigui na 'arqaic, ỹataqta 'am qaramta qoneta'am ca lcat qataq na 'aratap 'eeta'am ca lcat bronce,

⁵ qaq ỹoqo'oye mashe 'am sa'aqtaxaateguem soua qaỹoqteguelo vi'iye, mashe 'am sachaxana namayepi co'ollaq saxanaxa da yo'oq yaqto' saishet da qonapec: «Nacheñi ñim iqolac ñim ỹo'ot ne'enapi, ñim ne'enaqtac maye ỹo'onatac nacheñi ñi ỹauo'o namayepi.»

⁶ 'Am 'aua'aqchigui co'ollaxa 'enauac de'era, qaq ña 'aumeten namaye yaqto' ishet da 'aua'amaqten da 'eesa. Qaq nagui 'am sa'axatem nam dalaxaicpi qome, nam saq cha'api maye sa 'auauatton co'ollaxa,

⁷ nam qaỹo'otpi nagui, maye saishet da huaiguilo soua hua'au' vi'iye, nam saishet da 'aua'aqteguelec co'ollaxa choche ivitta'a nagui. Yaqto' saishet da qonapec: «Mashe saỹateetac namaye.»

⁸ 'Am saishet co'ollaxa da 'aua'aqteguelec namayepi da qaỹa'axattac, qataq saishet da 'auauatton, cha'aye nache 'eetai' naxa da saishet da 'aua'aqa. Qaq Aỹem mashe saỹateetac da saishet da 'aualaq, cha'aye nache chegoqta'a co'ollaq 'auañiguiñi da 'am qailonec da saishet da 'aualaq.

⁹ Qalaxaye Aỹem huo'o da ñeualaxaunaxac souaxat da ỹauotaxanaqtaic da ỹe'enaxat, qataq souaxat da ỹo'oxoyec nache saishet da 'am selaxachigui.

¹⁰ Aỹem 'am sequi'itaxatta co'ollaxa, qalaxaye saishet da 'eeta'am ñaqa'en ca lcat plata, nacherata da 'am she'eguenec na le'eraxa aso nqatelaxanaxaqui maye nachera da que'eenaxac.

¹¹ Qaq maiche Aỹem, maiche Aỹem da so'ot damaye, cha'aye da ỹe'enaxat sa saỹamaxaren da qaỹa'ashaxaatac. Qaq saishet da sanen da ỹo'oxoyec camachaqca lỹa.

Ñim Nataxala' nca'alaxatec qome na lalamaxat nhuo' le'ecpi

¹² Ñaq Aỹem 'aua'axaỹa 'am Jacob, qataq 'am Israel maye 'am seỹaxana co'ollaxa: Aỹem nachaỹemta Atamnaxala', Aỹem sa'auchiguiñi co'ollaxa qataq sepa'atec.

¹³ Aỹem sauota'a na ihuaq co'ollaq so'ot ana 'alhua qataq sauota'a na ihuaq co'ollaq selagaxaañi na piguem, qaq co'ollaq ñasaxauec da le'enaxat nache namayepi huo'o.

¹⁴ Ña qalaỹoñiỹa't 'enauac qami' nache qana'axaỹaxañi. Da qoñiita ¿negue't co'ollaxa ca ỹa'axatta'aguet nam yo'oq nagui qataq som ỹale maye lleca'aguishec da ishet da ỹo'ot da seuennatega da so'otec ye Babilonia qataq na caldeopi?

¹⁵ Qaq nachaỹem co'ollaxa da setaxaỹot somaye qataq seỹaxana, Aỹem so'ot da anac, qaq cam dataigue qome qalaq no'on da na'aqtaguec.

¹⁶ Ñaq Aỹem qanquiquiiua'a, nache qana'axaỹaxañiỹa de'era: Aỹem sa ỹauanego' da soxottañi ca sa'axat, chegoqta'a co'ollaq cheta'ague da huo'o nam huetalecna, qaq co'ollaq yo'oq 'enauac namayepi nache Aỹem ñachattauo. Qaq nagui Aỹem Nataxala', sanem da ỹa'añaxac qataq samaq.

¹⁷ Qaq 'era da la'aqtac Ñim Nataxala' maye 'arca'alaxaqui, Ñim Qui'itta Natamnaxala' na Israel le'ecpi: «Aỹem nachaỹem Nataxala' maye 'Anatamnaxala', Aỹem 'am sapaxaguenec dam chegaqaigui da 'araỹamaxa, Aỹem 'am sauecteuga so nqa'aic maye iuen da qoquegue.

¹⁸ 'Am taxa da 'ana'axaỹaxanalo naua ỹamaxasoxonaxaco, nache da 'al-lagaxayec 'eeta'am taxa ca tala, qataq dam 'araỹamaxa nquictauec, 'eeta'am ana lapaxa aso auaxai.

¹⁹ Qataq nam 'am chegoxoguetpi ỹataqta qalota taxa, 'eeta'am na 'alhua lsoche maye huetangui aso auaxai qataq Aỹem saishet taxa da 'am selaxachigui qataq saishet taxa da 'am ñeloguiisop.»

²⁰ Qoquiỹa'ai na babilonia qautaiueguesop na caldeopi. Qaua'axachiiuec de'era na'axaỹaxac nache qaua'alqai souaxat da qantonaxaqui, qataq qaviraxacha'a nam hueta'a na pa'atec ana 'alhua, qoñeeta': «¡Ñim Nataxala' isouec so Jacob maye lamaxashec!»

²¹ Qaq na'aictaxa co'ollaxa ỹauecteuga ye toolec 'alhua qalaq saishet da ilem na laquip, Ñimaye depoqogui naqa'en so coma' nache chegaqaigui somaye so 'etaxat da yaqto' nỹom somayepi.

²² Qalaxaye na qauemaicpi, saishet da hueto'ot ca nlagaxayec. 'Era da la'aqtac Ñim Nataxala'.