Isaías 46 - La'aqtaqa Ñim Lo'onatac 'Enauacna 2013

¹ Ñim atamnaxala' Bel qalaq mashe qaica ca la'añaxac, qaq ñi atamnaxala' Nebo qalaq hua'axañi nache hueta'aguet na 'alhua. Ñiimaye qaỹacheleguete qome nam shiguiỹacpi, qalaq ỹataqta qapa'atte' da ỹacheta'ape nam shiguiỹacpi maye nasamñi.

² Ñeua ne'enaqtaqa atamnaxala'ate qalaq mashe qaica ca la'añaxa'c, qataq hua'axareñi hueta'agueta na 'alhua, nache saishet da nca'alde'c, qaq ñiimaye qaỹauegalo qome ca lỹa 'alhua.

³ Ñaq aỹem qana'axaỹaxañiỹa qami' maye qauachegoqoiguet so Jacob, qataq 'enauac nam no'onañipi nam nhuo' Israel le'ecpi. Aỹem qami' sacheta'ape co'ollaq saxanaxa da qami' ñiguiyiñi, qami' ñachetrashegue'm co'ollaxa,

⁴ qaq choche ivitta'a qome da qami' ỹa'axaiquipi da saishet da ñaralaxat da ỹataxac, qom huo'o ana lapagaxai naua qarqaigolli' qalaq nache shecto'ot qome da qami' ñelletrañi. Aỹem so'ot co'ollaxa de'era qaq nache shecto'ot qome da qami' ñachetrashegue'm, Aỹem qami' ñelletrañi qome qataq qami' ñeca'alaxatrec.

⁵ Qaq ¿negue't cam ishet da Aỹem qanaloqñeeguet? ¿Negue't cam qaupicheetega da sheeta'am?

⁶ Qaq huo'o na ỹachegoxotangui na lachoxonaxaqui na qalota oro, qataq naloqten na lcat plata ỹachangui ana naloqnaxanaxaqui, ime nache iỹaxana cam ỹaỹaten da do'onataxana na lcat plata da yaqto' ỹo'ot ca natamnaxala' qaq da ime nache ỹa'atto'oto naua l-llectel camaye qataq ỹo'oxoreetac.

⁷ Ime nache ỹachalec na lallac da ỹache, da yaqto' ỹanalec cam lmala' naqa'en, qaq nache netaña camaye nache saishet da deraỹapigui'. Qaq na'aictaxa da ỹa'alaqto'ot da iỹaxaataique cam ltaunaxanaxac qalaq saishet da ỹasat, qataq saishet nca'alaxateeguesop da lta'araic nque'eenaxac.

⁸ Qaq ña qauennachiỹa'a qome de'era qami' maye qami' 'etaxaloxoicpi, saishet qome da qauennacheetega cam saq'en, ỹataqta qauennataxañiitelec qome damaye,

⁹ ña qauennachiỹa'a som so'ot co'ollaxa maye huaiguilo soua qaỹoqteguelo vi'iye. Aỹem, nachaỹem Atamnaxala', qaq qaica ca lỹa, aỹem Atamnaxala' qaq qaica ca lỹa da sheeta'am.

¹⁰ Nachaỹem maye sa'auchiguiñi da sa'axatta'a co'ollaxa cam loga't de'era, qataq nachaỹem sa'axata'a co'ollaxa cam ñaq natauo. Qaq shenapec: Nam llapaxañepi ipacchigui qome da huo'o, qataq so'ot qome 'enauac nam maiche seuennategapi.

¹¹ Aỹem, seỹaxana co'ollaxa so ỹale maye chegaqa'ague da nala' lliguisheguem, maye qaỹoqtegue da chegaqa'ague 'eeta'am ca maỹo maye qoỹo lo'o', nache camaye ỹacoolec qome nam llapaxañepi. Qaq 'era da ỹa'aqtac qaq damaye ipacchigui qome ñaqa'en, nam llapaxañepi co'ollaxa qalaq so'ot qome.

¹² Ñaq Aỹem qana'axaỹaxañiỹa qami' maye qaramchiguilo naua qarquiyaqchilli', qami' maye qoñeetega qaỹoqta ca laloqo' da qami' qaisorec.

¹³ Aỹem so'ot qome da saqaỹaloq da qami' qaisorec da ica'alaqtaxanaxac saishet da qaỹaloqteguet, da ica'alaqtaxanaxac saishet da qaỹoqta. Aỹem sanem qome da lca'alaxa ye Sión, qataq sanem da ỹo'oxoyec na israel le'ecpi