Isaías 42 - La'aqtaqa Ñim Lo'onatac 'Enauacna 2013

So lamaxashec Ñim Nataxala'

¹ «'Ena na ỹamaxashec maye ñasoqtañi, nam ica'aguishec maye saỹamaxareeta, namaye sanagui so Saqcha'a ỹa'añaxac da yaqto' nda'a ca nalochiguiñi lataxac na ỹotta'a't shiỹaxauapi.

² Namaye saishet qome da ỹa'alaq, saishet da deqaqnaxaatai', qataq saishet da qaỹa'aqtega da lavilỹaxac da quetague' ca nqa'aic,

³ saishet da qaltaq ỹacagaxachigui aca coqta maye mashe huacagaxai, qataq saishet da ỹalamat ca ncoỹaraxanaxat maye mashe qaica ca la'añaxac na le'eraxa. Camaye 'eesa qome da ndoi' ca nalochiguiñi lataxac.

⁴ Camaye saishet qome da nmatec qataq saishet da nasamñi, choche ivitta'a da na'arelec naqa'en ana 'alhua da nalochiguiñi lataxac. Nam netalec na ỹaqauga 'alhuapiolec aso auaxai, qalaq ỹataqta na'axaỹaxana qome na lapaxaguenataxanaxacpi.»

⁵ Ñim Lo'onatac 'Enauacna maye Nataxala' ñim lo'onatac na piguem qataq ilagaxaañi, qataq lo'onata ana 'alhua qataq nam ñaxattalec anamaye, qataq ỹami' da nachaalataxac qataq da lca'alaxa nam shiỹaxauapi maye netalec ana 'alhua, 'enapega so lamaxashec, 'eeta':

⁶ «Aỹem Nataxala', 'am seỹaxana, nache sacoota'a na 'arhuaq, yaqto' 'am so'onataxana da 'am chegoqchigui da nca'alaxa, 'am saỹamaxaañi cha'aye sauotaique da 'am la'anaxat da ñaỹamaxataxac, da ñaỹamaxate' na nhuo' le'ecpi qataq 'am lcoỹaraqte na ỹotta'a't shiỹaxauapi.

⁷ Sauotaique da nauaañi 'anqa'en na qanamaicpi, qataq 'ausoueeguesop ana ncoñetaxanaxaquipi na ncoñeteguishecpi, qataq na ncoñeteguishecpi maye huetaigui na napalaxa.

⁸ Aỹem, nachaỹem Nataxala', 'era da ỹe'enaxat, saishet da qaỹa'añim da ỹo'oxoyec ca camachaqca, qataq da qavio'oxoreñi ca lỹa atamnaxala', da nmeneguet qanqa'eñi Aỹem.

⁹ Ña qaumichiñi da ipacchigui nam sa'axata'a co'ollaxa, qaq nagui nache sa'axata'a cam dalaxaic lataxac, nache qami' saỹaanaxanaxaneque nagui, da ñaq saxanaxa da yo'oq.»

Dam ño'oxonnataxanaxac souaxat dam lca'alaqtaxanaxac Ñim Lo'onatac 'Enauacna

¹⁰ Qauo'oñi ca dalaxaic no'onec da qauo'onaxañiito'ot Ñim Nataxala', nam netaña nam qaỹoqta 'alhua qalaq ỹo'oxoren qome Ñimaye, qataq nataqa'en nam quetalec aso auaxai qataq nam shiguiỹacpi maye huetangui asomaye, qataq nam netalec nam ỹaqauga 'alhuapiolec aso auaxai.

¹¹ Ña ntonapigui' qome na toolec 'alhua qataq nam huaqta'a't nỹecpi maye hueta'a namaye, qataq na lanataqa'pi nam chegoxoguetpi so Quedar. Qataq na lma' ye Selá do'onaxan qome souaxat da ntonaxac, qataq nlamaxaren qome da huetalec na pa'asheguem ana qasoxonaxapi.

¹² Ña qaỹa'añim qome da llo'oxoyec Ñim Nataxala', qataq qaua'axacheuec da llo'oxoyec da qoviita'a na ỹaqauga 'alhuapiolec aso auaxai.

¹³ Ñim Nataxala' qom inoxonec nache 'eeta'am ca alaataxaic, qaq qom deloqui nache 'eroigui da layeloxo 'eeta'am ca alaataxaic, qataq nlamaxaren qataq ỹa'alaqtalec da nalaataxac, nache nauec qome na npa'aguenaxauapi.

¹⁴ Ñim Nataxala', 'eeta': «Ỹataqta qaỹoqteguelo soua vi'iye da ñe'emaxat, aỹem ỹataqta she'emaqtom qataq qaica ca sa'axat, qalaxaye nagui ña'alaqteguiñi qome sheeta'am aca 'alo da deco'otapigui' dachottac qataq ñaxaatrauec naua la'a'che.

¹⁵ Aỹem ñelaxaañi qome ana qasoxonaxapi qataq ana lcomaraxalatepi, nache deqaqa ñaqa'en 'enauac na huetalec qataq nam talapi ỹe'eguelaxa da toolec 'alhua, qataq deqaqa ñaqa'en ana lapelpi.

¹⁶ Qaq na qanamaicpi qalaq quetegue ñaqa'en ca nqa'aicpi qataq na sa lca'ague ñecpiolec maye sa ỹauana namayepi. Qataq ỹauaachigui qome ñaqa'en namayepi da nam napalaxa nmeneguet ñaqa'en na yo'oqchiguiñi, qataq nalochiguiñi ñaqa'en na sa naloguiñi 'alhua. Qaq Aỹem so'ot qome 'enauac ne'enapi cha'aye saishet da salat nam ỹalamaxatpi.

¹⁷ Qaq nam pe'etega cam saq 'en atamnaxala'pi, qataq nam detaxaỹa nam ne'enaqtacpi, 'eeta': ‹Nache qami', maye qami' qanatamnaxala'pi› namayepi jec qome ỹachetec da lcoxo.»

Da lqanamaxa na Israel le'ecpi

¹⁸ «Ña qana'axaỹaxañi qami' lauaxanaxaicpi, qami' qanamaicpi ña qanloitec.

¹⁹ Qaica ca ỹataqta ỹapac da sa nauaañi qataq ca ỹapac da sa hua'aqa, da 'eeta'am so ỹamaxashec maye samaq co'ollaxa, qaica ca ỹapac da sa nauaañi qataq da ỹapac da sa hua'aqa, da 'eeta'am so ỹa'aqtaxanaxanec, som lamaxashec Ñim Nataxala'.

²⁰ Qalota na ỹauaachiguipi qalaxaye saishet da iqocha'a, ishet da hua'aqtega qalaxaye saishet da iqocha'a.

²¹ Qaq Ñim Nataxala', ye ñimaye deca'alaqtaxan, nache huotaique da ỹo'ot da lta'araic naqa'en qataq ỹo'oxoraq dam lapaxaguenataxanaxac,

²² qalaxaye ne'ena shiỹaxauapi ye mashe qaicachiỹot qataq qanhuotta, nache 'enauac namayepi da qaicoñe' qataq qaỹapoua'a qoỹanaigui ana ncoñetaxanaxaquipi, nache maiche qoỹoiqueetac namayepi nache qaica ca ishet da isouec, qataq qaicachiỹa nache qaica ca ishet da qaltaq nca'alaxatec.»

²³ Qalaxaye dam qoñeeta ¿negue't cam qochetega de'era? ¿Negue't cam lhuotta da na'axaỹaxana cam ñaq taỹa'a da yo'oq?

²⁴ Qataq ¿negue't cam ỹaneguet na Israel le'ecpi nam lauo' le'ecpi so Jacob da noxonecpi qataq qaicachiỹa? ¿Saisheto' da nacheñi Ñim Nataxala'? Cha'aye namayepi huo'o da lasouaxashet hueto'ot Ñimaye, souaxat da saishet da quegue so nqa'aic maye ỹachaxanegue co'ollaxa Ñimaye, qataq saishet da ỹalaxagueta naua lapaxaguenataxanaxaco.

²⁵ Qaq ỹoqo'oye Ñimaye dalemataỹa namayepi, nache ỹauo'o da nhuaxanaguec, irolec da 'alaataxac maye huaigui da saishet da qaireetac, qataq hueteguelo naqa'en na norec, qalaxaye ñaqaiyeta namayepi saishet da ỹaỹaaneguet damaye.