Isaías 40 - La'aqtaqa Ñim Lo'onatac 'Enauacna 2013

Ñim Lo'onatac 'Enauacna ỹa'añaqchet nam lalamaxat nhuo' le'ecpi

¹ Ñim Lo'onatac 'Enauacna maye Qanatamnaxala'ai, 'eeta': «Qaua'añaqchichi, qaua'añaqchichi nam ỹalamaxat nhuo' le'ecpi,

² da qaua'aqtaxañim na hueta'a ye Jerusalén qalaq huesotte' naua qara'aqtaqalle', qataq qaua'aqtaxañim da mashe ime da nlataguec, qataq mashe ime da isheeten nam lasouaxashetpi, qataq 'eeso'oya' da mashe ỹapacauec da nhuaxanaguec maye chegoqchigui da lhuaqỹaxac Ñim Nataxala' souaxat nam lasouaxashetpi.»

³ Huo'o so na'alaxac 'eeta': Qauqataxañeetai' ca nqa'aic maye taalec ye toolec 'alhua da yaqto' llec qome Ñim Nataxala' qauauo'oi ca 'eetegue nqa'aic maye taalec yem qaica ca ñaxaalec 'alhua da yaqto' llec Ñim Qanatamnaxala'.

⁴ Qamichingui 'enauac na ca'ameguepi, qataq nalochiguiñi qanqa'eñi ana qasoxonaxapi qataq ana lcomaraxalatepi, qataq nam 'alhua maye sa naloguiñi qataq na huaña ana qasoxonaxapi, qalaq qavi'iguelaxachiỹa qome da ỹataqta nalochiguiñi.

⁵ Qaq huaña nache Ñim Nataxala' ỹachaxan qome da llo'oxoyec, nache 'enauac qome na shiỹaxauapi da ỹauaachigui damaye. Cha'aye Ñim Nataxala' maiche la'aqtac damaye.

⁶ Huo'o so nvilỹaxac, 'eeta': «'Anlamaxaren», nache aỹem senataxan sheeta': «¿Negue't cam sa'axat da ñelamaxaren?» «'Aua'axat da 'enauac na shiỹaxauapi 'eeta'am aca huoue, qataq 'enauac da llo'oxoyec 'eeta'am aca lauoxo maye huetalec na no'onaxa.

⁷ Ana huoue deqaqa qaq ana lauoxo qalaq deqat da lyac da ỹasheerelec anamaye na la'at Ñim Nataxala'. Qaq ỹoqta 'eesa da na shiỹaxauapi 'eeta'am ana huoue.

⁸ Ana huoue deqaqa qaq ana lauoxo qalaq deqat da lyac, qalaxaye naua la'aqtaqa Ñim Qanatamnaxala' nache 'eetai'salo, chochaq tatrec.»

⁹ 'Am Sión maye 'auachetac da no'on na'axaỹaxac 'aunotsheguemec qome añi ỹataqta qaỹoqotcheguemec qasoxonaxa, nache ỹataqta 'anlamaxaren qome da 'aua'axat dam no'on na'axaỹaxac. 'Am Jerusalén, saishet da 'añe'etac da 'ana'axannec da 'arvilỹaxac da 'aua'aqtaxanem ye huaqta'a't nỹecpi maye ỹotta'a't naua nañalo ye Judá, qoneta': ¡'Ena nam Qanatamnaxala'ai!

¹⁰ Mashe nvi' Nam Nataxala', nactaigui da la'añaxac, qaq na lhuaq huetaigui da la'añaxac da ilo'ogue na lalamaxatpi. Qataq ñe'eguelaxat na lalamaxat nhuo' le'ecpi da ime da nca'alaxatec.

¹¹ Qaq namaye anac 'eeta'am ca qagueta lo'o da ilotague' ana lalo qaguetapi, qataq nsoqteuo da ỹachetac na qagueta llalaqpi ỹachetelec ana ltogue, qataq ntela'a da huetague' ana cheta'ague da deco'otac.

Da la'amaqchec Ñim Natamnaxala' na Israel le'ecpi

¹² ¿Negue't cam ishet co'ollaxa da naloqten aso auaxai da ỹauota'a na lhuaq lauel, huo'otaq da ỹauota'aisalo naua llaxaata da naloqten ye lcachiguiñi na piguem? Qataq ¿negue't ca ỹauo'o co'ollaxa aca laỹe' da naloqten na lsoche ana 'alhua huo'otaq da ỹauo'o aca laloqnaxanaxaqui da naloqten ana lcomaraxalatepi qataq ana qasoxonaxapi?

¹³ Qataq ¿negue't co'ollaxa ca ishet da detaxaỹaua'a Ñim Nataxala', huo'otaq da ỹapaxagueetac co'ollaxa Ñimaye?

¹⁴ ¿Negue't co'ollaxa ca ỹanem ca lqataxac qataq da laỹaanataxanaxac Ñimaye? Qataq ¿negue't ca ỹapaxaguenec da huo'o ca nmit qalaq do'onataxana da nalochiguiñi lataxac? Qataq ¿negue't ca ỹapaxaguenec da nauattonaxanaxac? ¿Negue't cam ỹapaxaguenec da naỹaanec?

¹⁵ Ñimaye da ilotalec na ỹotta'a't shiỹaxauapi qalaq 'eeta'am naqa'en aca 'oonole llo'oxo na 'etaxat, qataq 'eeta'am catai' lsocholec na 'alhua da huetangui aca naloqnaxanaxaqui, qataq nam ỹotta'a't shiỹaxauapi maye netalec nam ỹaqauga 'alhuapiolec aso auaxai qalaq 'eeta'am naqa'en ca 'alhua lsoche.

¹⁶ Qataq 'enauac na qo'oipaqpi ye Líbano da saq 'amaqtaq da qaỹalonaxana da qaỹo'ot ca norec añi nca'atoxonaxalate, qataq 'enauac na shiguiỹacpi da saq 'amaqtaq da qaỹauo'o nachetaqtaxanaqtepi.

¹⁷ 'Enauac na ỹotta'a't shiỹaxauapi qaica ca 'enec da nachatto'ot Ñimaye, namayepi ỹataqta qaica ca naigui.

¹⁸ Qaq ¿negue't ca ishet da qanaloqñeeguet Ñim Lo'onatac 'Enauacna? Qataq ¿negue't ca ne'enaqtac cam ishet da 'ena'am qanqa'eñi Ñimaye?

¹⁹ Ca lo'o na ne'enaqtac ỹo'ot ca le'enaqtac, qaq ca ỹo'ottac na lcat plata lapaxalec camaye na oro, qataq ỹo'ot na lpaqtac lcatpiolec maye chegaqaigui na plata.

²⁰ Cam ỹo'ot ca le'enaqtac qo'oipaq qalaq lca'aua'a na qo'oipaq maye sa lto, qataq nmitaique ca sa nqalaate' da ỹa'ayiñi na ne'enaqtac da yaqto' saishet da hua'axañi.

²¹ ¿Qaq peta'a sa qauaỹachiñi damaye? ¿Peta'a saishet da qaua'aqaiỹapeguelec co'ollaxa damaye? ¿Peta'a sa qami' qaỹa'aqtaxanema dam chegoqchiguiña damaye? ¿Peta'a sa qauaỹachiñi damaye co'ollaq cheta'ague da qaỹo'ot ana 'alhua?

²² Ñim Lo'onatac 'Enauacna huo'o añi nso'onaxaqui netalec na ỹataqta pa'asheguem na piguem, nache da nlotaña na shiỹaxauapi nache 'eeta'am naqa'en ana shiiquioxoipi. Ñimaye da ilagaxaañi na piguem qalaq 'eeta'am naqa'en ca npe'l, qataq da ỹa'ara't nache 'eeta'am naqa'en ca nanataxaqui.

²³ Ñimaye ỹe'eguelaxata da qaica ca la'amaqchec na 'amaqtaqaicpi shiỹaxauapi, qataq ỹapalaxat na nataxala'pi ana 'alhua.

²⁴ Namayepi 'eeta'am aca isottac nañiguishe maye cheta'ague da qoỹaañi, maye cheta'ague da ỹa'alyiñi naua lpa'aye ana 'alhua. Qaq Ñim Lo'onatac 'Enauacna da ỹasheerelec na la'at namayepi nache deqaqa, qataq na la'at lta'araic ỹaỹoxonaqchet 'eeta'am naqa'en ca deqaqta 'auaqpi.

²⁵ Qaq Ñim Qui'itta maye Lo'onatac 'Enauacna denataxan, 'eeta': «Qaq qami' ¿negue't cam 'eeta'am qanqa'eñi Aỹem? ¿Negue't ca ishet da sheeta'am?»

²⁶ Ña qauamachiỹo'ot na piguem, nache qaumichiñi: ¿Negue't cam ỹo'ot co'ollaxa 'enauac namaye? Cam naloqchiiñi añi 'oonole ana qalota huaqaañipi, qataq ỹauo'o na le'enaxat añi 'oonole anamayepi. Qaq ỹataqta lta'araic da la'añaxac nache saishet da huo'o aca deqaptauec anamayepi.

²⁷ Qami' nhuo' le'ecpi maye qauachegoqoiguet so Jacob, ¿ta'ainco' da qanỹoñeetac? ¿Ta'ainco' da qoñeeta': «Ñim Nataxala' sa nanoma dam souaqaigui, Ñim Lo'onatac 'Enauacna saishet da qomi' iqocha'alo».

²⁸ ¿Peta'a sa qauaỹachiñi? qataq ¿peta'a saishet da qaua'aqaiỹapeguelec? Ñim Nataxala', Ñim Atamnaxala' maye chochaq tatec, Ñim ỹo'ot co'ollaxa 'enauac ana 'alhua, Ñimaye saishet da nqui'itec, qataq saishet da nasamñi qataq naua laỹaanataxanaxaco qaica ca ivi'.

²⁹ Ñimaye ỹanem da la'añaxac cam nasamñi, qataq nquigaxatec da la'añaxac ca qaica ca la'añaxac.

³⁰ Qaq ivira'a na nsoxoppi da ishet da nasamñi qataq nqui'itec, qataq ivira'a nam ỹataqta 'añaxaicpi ishet da huañi,

³¹ qalaxaye nam ỹataqta pi'iỹa'a Ñim Nataxala', namayepi dalaxaicta'aguet qome da la'añaxac, nache ishet qome da huaỹo 'eeta'am na vi'ic, qataq ishet da chegaqañi qalaxaye sa nqui'itec, qataq queuoỹapigui' qalaq saishet da nasamñi.