Isaías 39 - La'aqtaqa Ñim Lo'onatac 'Enauacna 2013

Soua namaxa'she maye lma't ye Babilonia

¹ Qaq se'eso na'a'q so nta'a Medorac Baladán, som llalec so Baladán, maye nta'a ye Babilonia, la'axaỹaxac co'ollaxa da sa no'on so Ezequías qalaxaye mashe qaltaq no'oita, nache ỹauo'oi soua lamaxa'she da ira'alo so Ezequías aso lere qataq so nme.

² Nache co'ollaq ivildeuo soomaye nache so Ezequías ỹataqta ỹa'amaqchiguiñi nache ỹachaxanalo soomaye so laỹamaqtaxanaxaqui maye huetaigui na lcat plata, oro qataq na no'on coraxatpi qataq na ỹataqta no'on aceite qataq som laỹe' na lo'ogoxonaxatpi qataq 'enauac nam huo'o maye huetaigui som laỹamaqtaxanaxaquipi. Nache qaica ca sa ỹachaxan nam huetaiguipi so lma' lta'araic, qataq 'enauac na lo'onataxanaxacpi somaye.

³ Qaq huaña nache so na'aqtaxanaxanec Isaías nqo'ona so nta'a Ezequías nache inat, 'eeta': ¿Cam chegoqtra'ague se'esoua ỹale't qataq cam 'eetec ca la'aqta'c soomaye? Nache so Ezequías ỹasat, 'eeta': Qomye ỹataqta qaỹoqta yem chegoqra'a 'alhua, soomaye chegoqra'a ye Babilonia.

⁴ Nache so Isaías qaltaq inat somaye, 'eeta': Qaq ¿negue't cam imeteetrac soomaye ne'ena 'arma' lta'araic? Nache so Ezequías 'eeta': Qomye 'enauac nam huetaigui na ima' lta'araic da imeteetrac. Qaica cam sa sachaxana nam huetaigui nam ỹaỹamaqtaxanaxaquipi.

⁵ Nache so Isaías 'enapega so Ezequías, 'eeta': Ña 'ana'axaỹaxana dam la'aqtac Ñim Nataxala' maye Qaica ca Ỹaqalanapec, 'eeta':

⁶ Mashe natrauo caua na'axa'te maye huaiguilo da qaỹache qome 'enauac nam huetaigui na 'arma' lta'araic, qataq 'enauac nam laỹootac co'ollaxa som hua'au 'arta'alpi maye ivitta'a nagui da ñaq huo'o, namayepi qairo'ogue qome da Babilonia. Nache qaica qome ca qano'onaxatañi.

⁷ Qataq nataqa'en nam 'am chegoxoguetpi huo'o qome ca qaỹaueegue da Babilonia, nache qanqa't naua lola, nache qaỹauo'o choche nlatac da hueta'a ñi lma' lta'araic ñi nta'a.

⁸ Nache so Ezequías, 'enapeco': Dam la'aqtac Ñim Nataxala' maye aỹem 'anda'a ỹataqta ỹaỹamaqchiguiñi. Somaye 'enapec de'era cha'aye ipettega da ñaq huo'o da nachaalataxac, nache huo'o da nlagaxayec qataq da ñe'emaxa.