Isaías 35 - La'aqtaqa Ñim Lo'onatac 'Enauacna 2013

So nhuo' le'ecpi ỹe'eguelaxa ye Sión

¹ Qaq machiguiñi qome nam toolec qataq nam deqaqta 'alhua, ña nlaxagui qome da ntonaxac qataq dasovi qome anam huetalec huoue,

² qataq ñaxatec qome ana lauoxo 'eeta'am ana nañiguishe lirio, qataq nlaxagui qome da ntonaxac qataq da lamaicỹaxac. Cha'aye Ñim Lo'onatac 'Enauacna ỹo'otec qome da ỹataqta huo'o da lyac 'eeta'am ye Líbano, qataq ỹataqta no'on 'eeta'am ye Carmelo qataq ye ca'amegue ye Sarón. Qaq huaña qome nache 'enauac na shiỹaxauapi da ila'a da llo'oxoyec Ñim Nataxala' qataq da la'amaqchec Ñim Qanatamnaxala'.

³ Ña qaua'añaqchichi nam qaica ca la'añaxac, qataq qaỹa'añem da la'añaxac nam mashe nasamñi,

⁴ qataq qoñiỹapega nam colanqaicpi, qoñeeta': «¡Qana'añaxache, saishet qome da qayi'iitac! ¡Cha'aye Ñim Qanatamnaxala'ai mashe anacta da yaqto' qami' nca'alaxatrec qataq ỹauo'o cam 'itchiguiñi nhuaxanaguec na qampa'aguenaxauaipi!»

⁵ Qaq huaña nache nam qanamaicpi qaltaq nauaachiguiñi qome, qataq nam sa hua'aqapi qaltaq hua'aqa qome,

⁶ qaq na sara'añeeguelo naua lchel qalaq parenaxaatai' qome 'eeta'am aca chegaxango, qaq na 'apaicpi qalaq ỹa'alaqtagui qome. Qaq yem toolec qataq yem deqaqta 'alhua qalaq npaxaasheguem qome na 'etaxat.

⁷ Qaq yem toolec 'alhua qalaq 'eeta'am qome aca lapel, qaq yem 'alhua maye deqaqta qalaq nlaxalec qome ana 'etaxat laỹe'pi maye npaxaatasheguem. Qaq yem hueta'a nagui ana huaxaỹaxapi qalaq ñaxaalec qome ana coqta qataq ana na'aate.

⁸ Qaq yemaye nache ỹa'axasosoolec qome ca nqa'aic maye le'enaxat «Nqa'aic Qui'itta». Qaq nam shiỹaxauapi maye saishet da qui'itta, qalaq saishet qome da ỹañoxot da quegue camaye, qataq nataqa'en nam qaica ca ỹaỹaana'a saishet qome da quetague' camaye.

⁹ Qataq yemaye qaica qome na llonpi, qataq saishet da nhuogoua'a nam laỹepi shiguiỹacpi maye chaqaicpi. Qaq nachenata nam qanca'alaxatecpi maye quetague' qome se'eso nqa'aic.

¹⁰ Qaq nam nca'alaxatecpi Ñim Nataxala', do'onaxaatagui qome souaxat da ntonaxac qom inoxoneua'a ye Sión, qataq nache 'eetai' qome da machiguiñi. Qaq huaña nache ỹanata da ntonaxac qataq da lamaicỹaxac. Nache da naquicoxo qataq da qui'ic imeuo qome.