Isaías 32 - La'aqtaqa Ñim Lo'onatac 'Enauacna 2013

Ca nta'a maye no'on da lo'onataxanaxac

¹ Huo'o qome ca nta'a maye ỹataqta no'on da lo'onataxanaxac, qataq ca ltauapi nta'alpi maye nalochiguiñi qome da lo'onataxanaxac.

² Ñim 'oonolec camayepi qalaq 'eeta'am qome ca ñe'eguenaxaqui da huo'o ca la'at, qataq npaqtaxanaxat da huo'o ca la'at lta'araic, qataq 'eeta'am na la'auaxacpi da icorelec na 'etaxat ca deqaqta 'alhua, qataq 'eeta'am na lpaqal aca late'erai coma' maye naña ca toolec 'alhua.

³ Qaq camayepi ỹataqta nlotec qome, qataq ỹataqta lhuotta da na'axaỹaxana ca ntaxaỹaxac.

⁴ Qataq saishet da iỹalatapigui' nacherata da ntelañi da huo'o ca ỹo'ot, qataq da huo'o ca ỹa'axategue lataxac qalaq ỹataqtegue naqa'en.

⁵ Qaq nam shiỹaxauapi saishet qome da ỹamata'ac no'on da lataxac nam qauemaicpi, qataq saishet da huo'o naq 'enec naqa'en nam tenataxanaxaicpi.

⁶ Cha'aye cam qauemaic da detaqa qalaq ipacchigui da qauema naua la'aqtaqa, qataq nache iuennatega da ỹo'ot na qauempi, qataq nmitta'a da ỹo'ot da lalaataxanaxac, qataq datenataxan da dataỹa'aguet Ñim Nataxala', qataq saishet da iquia'axan cam huo'o na lqouaxa, qataq saishet da nỹomaxan cam huo'o na laquip.

⁷ Qaq cam tenataxanaxaic qalaq lo'ogoxonaxat na qauempi, qataq ỹo'ot nam qauem latenataxanaxacpi, nache da latenataxanaxac na'aqchet nam choxoraqpi, qataq nam huo'o da lhuenaxanaxa da qaỹo'otec ca nalochiguiñi lataxac.

⁸ Qaq cam no'on da lataxac qalaq ipacchigui da iuennatega da ỹo'ot ca no'on, qaq cam lapaxañi lataxac qalaq nache 'eetai' da quetalec.

Qaitaxaỹot na 'alpi ye Jerusalén

⁹ Qaq qami' 'alpi maye qaica ca qarhuogoqoi, ña qana'axaỹaxañiỹa da qami' sa'aqtaxanema. Qami' 'alpi maye qaica ca qandaqaitaique, ña qaua'aqaỹalo naua ỹa'aqtaqa.

¹⁰ Qami' 'alpi nagui qaica ca qandaqaitaque, qalaxaye qom mashe ỹapacauec ca 'oonolec vi'i, nache qami' cholaxa'n qome souaxat da qarcolanqai, cha'aye ime qome da nqataxanaxac, nache saishet da qaltaq qanqat ana uva.

¹¹ Qami' 'alpi maye qaica ca qarhuogoqoi, ña qaviloxolli qome, qami' maye qaica ca qandaqaitaique, ña qami' cholaxa'n qome, qanqache' qome naua qarpotolli' nache qaỹa'añiiyiñi caua qarpotolli' maye sansattegueta maye la'anaxat da qanqui'iqui.

¹² Ña qauachaxañi qome da qanqui'iqui souaxat nam huo'o da lyac no'onaxapi, qataq anam ỹataqta no'on nañiguishe uvapi.

¹³ Cha'aye ne'ena na'alhua nam ihuo' le'ecpi ñaxaalec qome ana ỹaxat qataq na huouesat, qataq 'enauac na nma'pi maye hueta'a naxa da namaicỹaxac, yem huaqta'a't nỹecpi maye lqopitaxat da na'ashaxac.

¹⁴ Qataq ñi lma' lta'araic ca nta'a qanayeca'ai qome, qataq yem huaqta'a't nỹecpi maye qalota na hueta'a toolec qome, qataq na sansattec npaqtaxanaxatpi nataqa'en qanayeca'ai qome, nache nmataqa' qome yemaye nam huauec 'ashenapi, qataq lquia'aqa' qome yemaye na nlopi shiguiỹacpi.

¹⁵ Qalaxaye dam saqcha'a la'añaxac Ñim Nataxala' qaltaq qomi' ñe'eguelaxalo qome nache na toolec 'alhua ỹe'eguelaxa qome da ishet da qoỹanaxaalec, qataq nam no'on 'alhua ñaxaalec qome ana qalota qo'oipaqpi.

¹⁶ Nache da nalochiguiñi lataxac hueta'a qome na toolec 'alhua, qataq da no'on lataxac hueta'a qome nam no'on 'alhua.

¹⁷ Nache dam nalochiguiñi lataxac chegoqchigui qome da nlagaxayec, ñe'emaxa qataq chochaq tatec da qaica ca qandaqtaique.

¹⁸ Nache nam ihuo' le'ecpi hueta'a qome cam hueta'a da nlagaxayec, qataq netaiguilo naua na'atchiyiñi nỹaqa, qataq nam nma'pi maye ỹe'emaqtac,

¹⁹ na'aictaxa da qanchiguiñi na aviaq qataq qaica ca 'enec qanqa'en na huaqta'a't nỹecpi.

²⁰ Qalaxaye qami' qauamaichiguiñi qome, cha'aye na qa'anaxanaqa'aipi qaicottalec qome na qalota 'etaxat, qataq saqoue qome na 'auaqpi maye aloq nam qareloi 'ashenapi qataq nam qarauegaxanala'ai huacapi.