Isaías 3 - La'aqtaqa Ñim Lo'onatac 'Enauacna 2013

Da nhuaxanaguec ye Judá qataq na Jerusalén

¹ ¡Ña qauloichigui de'era! Ñim Nataxala' maye Qaica ca Ỹaqalanapec nqateeguesop qome na Jerusalén qataq ye Judá, 'enauac da ntaunaguec qataq da qoỹaata'am na nallec, qataq na 'etaxat.

² Ca 'añaxaic qataq ca alaataxaic, qataq ca nmit ca nasouaxashet, qataq ca na'aqtaxanaxanec, qataq ca ilaviigui ca lỹa qataq ca nqueroxonec,

³ ca nataxala', qataq ca ỹale 'amaqtaqaic, qataq ca chegoqtecot na nqataxacpi, qataq ca huo'o dam no'onataxac, qataq ca pio'oxonaq,

⁴ qalaq nsoxoppi qome naqa'en ca lataxala'pi namayepi, qataq ca lta'alpi namayepi nda'a't ca nsoxoppiolec.

⁵ Nache na nhuo' le'ecpi qaica qome ca qairen, ñi 'oonolec qalaq npa'aguene' ca maiche lỹa, qataq ca lỹa npa'aguene' ca maiche nauochaxaua, qataq ca nsoxoppi npa'aguene' ca ỹa'axaiquipi, qataq cam no'otanecpi npa'aguene' ca 'amaqtaqaicpi.

⁶ Qaq huo'o qome ca ỹacona na lhuaq ca lqaỹa, nache 'enapega, 'eeta': «'Am maye ñaq huo'oi naua 'ogo, qaq nache 'am qome da 'am qarataxala' da 'aulo'ogue 'enauac ne'ena lapoosheguem coma'pi maye qailaxachigui co'ollaxa.»

⁷ Qalaxaye camaye ỹan qome ca la'aqtac, 'eeta': «Aỹem sa seshet qome da saỹamaxaañi na mashe qauem, cha'aye ye ima' qaica ca anoq qataq cam ỹogoxot da saañi. Qaq ỹoqo'oye saishet qome da aỹem lataxala' qanqa'aiñi na shiỹaxauapi.»

⁸ Cha'aye ỹoqta 'eesa da na Jerusalén hua'axañi qome, qataq ye Judá nlachiguiñi qome, cha'aye nache huaña yemaye nam ntaxaỹaxacpi qataq na qaỹo'otpi da qaỹataỹa'aguet Ñim Nataxala', da qaisheueetac da la'amaqchec Ñimaye.

⁹ Cha'aye da maiche lashiguiỹaxac nachera da ỹa'axat da lataxac namayepi, qaq saishet da ỹoxooñi nam lasouaxashetpi 'eeta'am co'ollaxa so Sodoma da imauec da ỹa'axat na lasouaxashetpi. ¡Qaq choxoraxaso' qome namayepi cha'aye iqataxaatapigui' da maiche nhuaxanaguec!

¹⁰ Qaq machiguiñi qome cam no'on da lataxac cha'aye no'on qome da llecỹaxac, qataq huo'o da ntonaxac cha'aye no'on da alaỹaxac da lo'onataxanaxac.

¹¹ ¡Qaq choxoraxaso' ca qauemaic! Cha'aye ỹataqta qauem qome da llecỹaxac, cha'aye Ñim Lo'onatac 'Enauacna isheeten qome, ipacchigui naqa'en nam ỹo'otpi camaye.

¹² Qaq choxoraxaso' nam ỹalamaxat nhuo' le'ecpi, souaxat da ñaq ñaqpiolec ca sa iyacnapec qataq da 'alpi ca ilotague' qome namayepi. Qami' ỹalamaxat nhuo' le'ecpi, nam qarataxala'aipi qami' ỹatenache't nache qami' ỹauecta'alo so qauem nqa'aic.

¹³ Qaq Ñim Nataxala', mashe naỹamaxat da nmit namayepi, da yaqto' nmit na lalamaxat nhuo' le'ecpi.

¹⁴ Ñim Nataxala' anac qome da nmit na nqueroxonecpi qataq na lataxala'pi nam lalamaxatpi nhuo' le'ecpi. Nache 'enapega qome 'eeta': «Qami' maye qanlaxacheetapiguiñi co'ollaxa na ỹanaxanaqa' uva lma'pi, qataq qaucacheetacot na choxoraqpi, na qarcachaxache qalaq qaỹo'oxochiỹoiguilo naua qarma'achilli'.

¹⁵ ¿Negue't ca qami' ỹamaxaleguete da qavi'iñiỹai' nam ỹalamaxat nhuo' le'ecpi, qataq da sa qauyacñiỹapec na choxoraqpi?» Qaq 'era da la'aqtac Ñim Nataxala' maye Qaica ca Ỹaqalanapec.

Da nhuaxanaguec na 'alpi maye lma' na Jerusalén

¹⁶ Ñim Nataxala' nataqa'en, 'eeta': «Na 'alpi maye Jerusalén lashepi maye na'amqaanaxaipi, da queuotapigui' qalaq ỹataqta nlotcheguem, qataq ño'oxonnaxaic da lmeenaxanaxac, qataq sa qaỹara'ache naua lqauaxaqui' da ỹo'ot da l-lamaxa na llo'oxoraxatpi naua lapia'ate,

¹⁷ Ñim Nataxala' ỹo'otec qome da qui'it na lqaic anamayepi, qataq ỹachaxan qome da huetauec anamayepi.»

¹⁸ Qaq que'eca na'a'q, Ñim Nataxala' ỹo'ot qome da imeuo 'enauac na llo'oxoraxat naua napia'ate qataq ana llo'oxoraqtepi na nqaic, qataq ana llo'oxoraqtepi ana nqolapi,

¹⁹ qataq ana nshetepi, nhuaxashecpi, qataq na nqaic lapoxotpi,

²⁰ qopaxa qataq na npaqtacpiolec lcat maye llo'oxoraxat naua napia'ate, qataq na saataxaquipi, qataq ana laỹe'piole na coraxat, qataq na nqolacpi atamnaxala'pi,

²¹ qataq ana chiguishaqtepi, qataq ana llo'oxoraqte na nmic,

²² qataq ana no'on npotopi, qataq na npo'pi, qataq na lapoxot naua nallaco, qataq na noxoiquipi,

²³ qataq ana tannaxaipi, qataq na no'on hualoq laỹepi, qataq na nqaic laxataxatpi, qataq na npo'piolec.

²⁴ Qaq na coraxat qalaq nmeneguet qome ca ỹotta'a't nalolaxapi, qaq na saataxaquipi qalaq nmeneguet ca nañecpi, qaq na no'on qoue qalaq nmeneguet qome da qui'it na nqaic, qaq ana no'on npotopi qalaq nmeneguet ca sansatta nogoxot, qaq da lyac da no'ogoỹaxac qalaq nmeneguet qome ca lque'emaxa souaxat ca lcat dapaqa.

²⁵ Na 'analleppi qalaq huañi qome huaigui ca alaataxac, qaq na 'ara'añaxanecpi qalaq ileu qome huaigui ca loquiaxac.

²⁶ Qaq na huaqta'a't nỹecpi nỹen qome da ỹo'ot ca lasouaxac, nache ỹataqta imauec qome da qaỹalata'a't.