Isaías 26 - La'aqtaqa Ñim Lo'onatac 'Enauacna 2013

Da no'onec da huo'o ca nauegaxanaxac

¹ Qaq que'eca na'a'q qom huaña ye 'alhua Judá nache qaỹo'on dam no'onec, maye 'eeta': «Qomi' huo'o na qaralamaxat huaqta'a't nỹecpi maye ỹataqta qaramta, 'eeta'am ca npaqtaxanaxat maye huo'o ca pa'aỹauec lpaqtaxat maye ỹataqta sa nsattec, Ñim Nataxala' nauaxaỹaxaasheguem co'ollaxa da yaqto' qomi' nca'alaxatrec.

² Ña qauauachiỹoigui na lasompi yaqto' pa'auo nam shiỹaxauapi maye no'on da lataxac qataq laxaraicpi.

³ 'Am Nataxala', 'am 'aỹa'anem da l-lagaxayec nam sa nquic da lataxac, cha'aye ỹataqta 'am pi'iỹa'a.

⁴ Qami' nache 'eetai' qome da qapi'iitega Ñim Nataxala', cha'aye nacheñi ñim chochaq tatec ñe'eguenaxala'.

⁵ Ñimaye huañi naqa'en so ño'oxonnaxaicpi, qataq qaica naqa'en ca la'amaqchec som na'amqaanaxaic huaqta'a't nỹecpi, nache hueta'aguet naqa'en na 'alhua,

⁶ yaqto' na qaica ca la'amaqchec qataq na choxoraqpi pigui.»

⁷ Da llecỹaxac na no'on da lataxac qalaq no'oitegue, 'Am Nataxala', 'analoqchichiguiñi da llecỹaxac namayepi.

⁸ Qomi' nataqa'en ñanomaqta da ỹataqta qolaqtegue so nqa'aic maye qomi' 'auachaxanalo chegoqchiguilo naua 'arqataxaco, 'Am Nataxala'. Da lhuennataxac añi qarquiyaqte qalaq huotaique da saishet da 'am secouaqa'ai.

⁹ Qaq ỹataqta imauec ye pe da 'am seuennatega, qataq yem ỹataqta pa'auo ivilỹaxac 'am nmittaique. Qaq qom 'anmit ana 'alhua, nache na shiỹaxauapi ỹaỹaten qome da nalochiguiñi lataxac.

¹⁰ Qaq na'aictaxa da qaichoxoren na qauemaicpi, qalaxaye namayepi saỹaỹaten qome da ỹo'ot da nalochiguiñi lataxac, nacherata da ỹo'ottac da qauem da netalec na na'alhua nam no'on da lataxac, qataq saishet da iuennatega da la'amaqchec Ñim Nataxala'.

¹¹ 'Am Nataxala', na 'arhuaq mashe lhuotta da 'auaxan namayepi, qalaxaye namayepi saishet da ila'a, qaq qom ila'a da lta'araic 'arauotaxanaqtaic nam 'aralamaxat nhuo' le'ecpi, nache namayepi huo'o qome da la'aloxo. ¡Qaq 'onaxaictoxo' da na le'eraxa da 'aralemataic ỹavigaxatta qome namayepi!

¹² 'Am Nataxala' qomi' 'aỹa'anema qome ca nlagaxayec, cha'aye nache 'am chegoqchigui da yo'oq nam qaro'onatacpi.

¹³ 'Am Nataxala' maye 'Am Qanatamnaxala', som laỹepi nataxala'pi qomi' ilotegueto co'ollaxa, qalaxaye saỹaanaqta da nache 'amta da 'Am Qarataxala'.

¹⁴ Somayepi mashe ileu nache saishet da qaltaq nca'alec, somayepi 'eco' choche lpaqal, nache saishet da qaltaq nachaañi, cha'aye 'am 'auo'ot co'ollaxa da nhuaxanaguec nache 'aulaxachigui, qataq nache loga't 'anqaq'en da saishet da qaiuennatega somayepi.

¹⁵ 'Am Nataxala', nache 'am co'ollaxa da nquictauec 'anqa'en na nhuo' le'ecpi, 'auo'ot da nquictauec da yaqto' huo'o da 'ayo'oxoyec, qataq 'anquigaxatec 'enauac nam loga'tpi ne'ena 'alhua.

¹⁶ 'Am Nataxala', co'ollaq souaqaigui so qanqui'ic nache 'am ñimitaqaique, qataq 'am seỹaxanaqot co'ollaq qomi' 'auaxaata'ape.

¹⁷ 'Am Nataxala', 'am souaqto'ot co'ollaxa, shenaqta'am aca 'alo hualaxai maye mashe deco'otapigui' da ncocateguiñi, qataq ỹa'alaqtac souaxat da nqui'ic,

¹⁸ Qaq eco' da qomi' hualaxaipi qataq huo'o da qanqui'ic da seco'oq, qalaxaye da qarco'oxoc qui'itchigui 'eeta'am ca la'at, nache saishet da ñeviraxataxa ana 'alhua da nca'alaxa, qataq saishet da ñiguiñi ñaqa'enaq ca shiỹaxauapi da yaqto' netalec ana 'alhua.

¹⁹ Qalaxaye so 'aralamaxatpi maye ileu, somayepi qaltaq nca'alec qome, so mashe qailareñi qalaq ỹoltaq nca'alec qome, qaq nam do'ochetapi maye huetaigui ana 'alhua qalaq nlouec qome nache ỹa'alaqtagui souaxat da ntonaxac, cha'aye 'am 'anamaxa qome ca 'arcoỹaraxanaxac 'eeta'am 'anqa'en na 'aỹa ye nte'etom, nache nam leuaxaicpi chegoqtoigui qome ana 'alhua da qaltaq nachaañi.

²⁰ Qauesomiỹa qami' ỹalamaxat nhuo' le'ecpi, qa'aỹoiguilo naua qarma'achilli' nache qanapoila't, ñaq cara'acolec da qanqañoxochiiñi, nato' qom vi'iiguet da layeloxo Ñim Nataxala'.

²¹ Cha'aye Ñim Nataxala' mashe yaqta'a da ca'ai ñi lma' lta'araic, da anac da yaqto' ỹauo'o ca nhuaxanaguec na shiỹaxauapi maye netalec ana 'alhua souaxat na lasouaxashetpi, nache ana 'alhua ỹachaxan qome na ntago'q maye laguelec anamaye, qataq saishet da nache queto'ot da ỹoxottapiguiñi na leuaxaicpi maye huetaigui anamaye.