Isaías 25 - La'aqtaqa Ñim Lo'onatac 'Enauacna 2013

No'onec da qaỹo'oxoren Ñim Nataxala'

¹ 'Am Nataxala', maye 'am Ñatamnaxala'; aỹem so'ot da 'ara'amaqchec qataq sho'oxoren da 'are'enaxat, cha'aye 'auo'ot co'ollaxa na ỹo'ot da na'aalaxa, qataq naua togosha'ape 'arqataxaco sa nqui'c qataq 'eesora.

² Qataq logosheguem 'anqa'en so coma'pi maye lsoche so huaqta'a't nỹecpi, qataq nlaguiñi 'anqa'en som qanpaxattaua'a huaqta'a't nỹecpi, qataq nlachiguiñi 'anqa'en so lma' lta'araicpi so qampa'aguenaxauapi, qaq nache saishet qome da qaltaq qaỹe'eguelaxa da qano'oxoosheguem.

³ Qaq ỹoqo'oye na 'añaxaicpi nhuo' le'ecpi 'am ỹo'oxoren qome, qataq nam qauemaic shiỹaxauapi maye netaigui na huaqta'a't nỹecpi 'am ỹalaxaguet qome.

⁴ Cha'aye nache 'am da 'am lle'eguenaxala' na choxoraqpi, qataq 'am lpaqtaxanaxat nam huo'o da lhuenaxanaxa da huo'o da lhuogoxo, qataq 'am ỹe'eguenot da huo'o na lta'araic la'at, qataq 'am lpe'l da huo'o na lta'araic ntap. Qalaxaye naua la'a'che na qauemaic shiỹaxauapi 'eeta'am na lta'araic la'at ye latomaxa,

⁵ qataq 'eeta'am na napaxaỹaxa da qanayeuta'a ca deqaqta 'alhua. 'Am 'avia'axaneguet da ño'oxonnaxac nam chegaqauecpi, 'eeta'am da vi'iiguet na napaxaỹaxa da huo'o na napo. Qataq qonapega na qauemaic shiỹaxauapi da ỹe'emaqtom.

⁶ Ñim Nataxala' maye Qaica ca Ỹaqalanapec huaña qome añi qasoxonaxa Sión da iqataxanai' da ỹo'ot da yaqto' ỹalegueua'a na ỹotta'at shiỹaxauapi ca nquia'axac da qanallec ca ỹataqta ama nallec, qataq qanỹomigui ca ỹataqta togoshaapec lataxa, qataq ca ỹataqta no'on nallec qataq cam ỹataqta no'on lataxa.

⁷ Qaq nache huaña qome aña'añi qasoxonaxa da Ñim Nataxala' nlaxaañi som ipelteetalec 'enauac na nhuo' le'ecpi, so npo' maye ỹapotalec 'enauac na ỹotta'a't shiỹaxauapi.

⁸ Ñim Nataxala' nlaxaañi qome da la'añaxac da nleuaxa, huaña nache iỹorec naua lache' 'enauac na shiỹaxauapi, qataq nqateeguesop da ne'enaguec nam lalamaxat nhuo' le'ecpi 'enauac ana 'alhua. Qaq 'era da la'aqtac Ñim Nataxala'.

⁹ Qaq que'eca na'a'q qoỹenapec qome: «'Eñi Ñim Qanatamnaxala', Ñimaye sepi'iỹaqa'a nache Ñimaye qomi' nca'alaxatrec. Nache qaramachiguiñi qataq ñetonaqtapigui', cha'aye Ñimaye qomi' nca'alaxatrec.»

¹⁰ Da lhuaqỹaxac Ñim Nataxala' npaxaalec qome añi qasoxonaxa Sión, qalaxaye Ñimaye petapigui qome ye Moab 'eeta'am ca 'auaqpi da qaỹapetapigui da huetaigui ca lasogoñi.

¹¹ Qaq ye Moab ỹachaxaare'c qome naua lhua'q 'eeta'am ca shiỹaxaua daloxootac, qalaxaye da ldaxac naua lhuaxaye nachera da ỹo'ot da nquictañi da napagaqaanaxac.

¹² Ñim Nataxala' hua'axañi qome naqa'en yem qaỹoqotcheguemec qataq qaramta lpaqtaxanaxatpi, nache ỹataqta dolachigui naqa'en ivitta'a da ndotec lsoche da hueta'aguet naqa'en na 'alhua.