Isaías 20 - La'aqtaqa Ñim Lo'onatac 'Enauacna 2013

Ye Asiria loxonec qome ye Egipto qataq ye Etiopía

¹ Qaq huo'o so huaña, nache so nta'a Sargón maye lma' ye Asiria, ỹamaxa ye huaqta'a't nỹecpi Asdod som 'amaqtaqaic lataxala' so alleppi. Nache somaye iloquiaxan yemaye, nache loxonec.

² Qaq nache huaña co'ollaxa da Ñim Nataxala' detaqa, 'enapega so Isaías, som llalec so Amós, 'eeta': «'Anqa't naua sansattegueta 'ogo maye 'aỹa'aatrañi, qataq naua 'arapela'ate maye 'aỹa'aatrañi.» Nache so Isaías ỹo'ot damaye, huaña nache huac da huetauec qataq qaicaua caua lapela'ate.

³ Qaq huaña, nache Ñim Nataxala', 'eeta': «Ñi ỹamaxashec Isaías huac da huetauec qataq qaicaua caua lapela'ate soua tres vi'iye, qaq damaye nache la'anaxat qataq ỹa'axata'a da 'eetec qome ye Egipto qataq ye Etiopía.

⁴ Qaq nache 'eetec qome ñi nta'a ye Asiria da loxonec ye Egipto le'ecpi qataq ye Etiopía le'ecpi nache ỹauec da icoñi', na ỹa'axaiquipi qataq na nsoxoppi, nache huetauec qome qataq qaicaua caua lapela'ate naqa'en, qataq chetaleguete naua nate' laỹel da yaqto' nlaxagui da lcoxo.

⁵ Qaq nam shiỹaxauapi nlaxagui qome da lli'iỹaxa qataq da lcoxo souaxat ye Etiopía maye naquittalec co'ollaxa, qataq ye Egipto maye llo'oxonnatac co'ollaxa.

⁶ Qaq que'eca na'a'q nache 'enauac qome na netaña yi'iye loigue, 'eeta': ‹Ña qauloỹa da ivireguet nagui yem ñaquitaqtalec naxa, yem seỹaxanaqtega naxa da qomi' itaua'n da yaqto' qomi' isoueeguesopa ñi nta'a ye Asiria. Qaq nagui ¿ca 'eeteco' da ñeca'alaxauec?›»