Isaías 2 - La'aqtaqa Ñim Lo'onatac 'Enauacna 2013

Ñim Nataxala' ỹanem qome da nlagaxayec na shiỹaxauapi

¹ Da lauanaqchec so Isaías, som llalec so Amós, co'ollaq ila'a som naỹa'a ye Judá qataq ye Jerusalén.

² Que'eca pa'atec na'a'q, nache añi qasoxonaxa añim netalec añi atamnaxaqui maye lalamaqte Ñim Nataxala', añimaye ỹataqta qaỹoqotcheguemec qome, napacalec aca camachaqaca lỹa qasoxonaxa. Nache 'enauac qome na ỹotta'a't shiỹaxauapi da taỹa añimaye.

³ Qaq anac qome na qalota shiỹaxauapi, nache 'eeta': «Qauanaqui, ñeqo'onaxasheguema añi nqasoxonaxa Ñim Nataxala', añi atamnaxaqui maye lalamaqte Ñim Natamnaxala' so Jacob, yaqto' Ñimaye qomi' ỹapaxagueneque da nqa'aicỹaxac, huaña nache ishet da qolaqtegueto qome naua lleco Ñimaye.» Cha'aye Ñim Nataxala', chegoqchiguiña qome ye Sión da lapaxaguenataxanaxac, qataq chegoqchiguiñalo qome ye Jerusalén naua la'aqtaqa.

⁴ Ñim Nataxala', nmit qome 'enauac na ỹotta'a't shiỹaxauapi, nache ỹaỹamaxaañi na ncotaxacpi nam qalota nhuo' le'ecpi, nache namayepi qome nlaxaañi na lainecpi nache ỹo'ot na'arau, qataq nlaxaañi qome ana lataquiaxaipi nache ỹo'ot ca lchegaxanaxatpi. Nache na nhuo' le'ecpi qaica qome ca ỹe'eguelaxa da ỹacona ca lo'ogoxonaxat da delogui' ca laỹepi shiỹaxauapi, qataq saishet qome da napaxagueetega da nalaataxac.

⁵ ¡Qolaq, qami' Jacob llalaqpi, qolaqtaigui qome da lcoỹaraxanaxac Ñim Nataxala'!

Da nhuaxanaguec na ño'oxonnaxaicpi

⁶ 'Am Nataxala', mashe qoca'ai co'ollaxa na 'aralamaxat nhuo' le'ecpi nam chegoxoguet so Jacob, cha'aye namayepi nlaqchigui na 'onataxacpi, maye ỹachegoxota'ague da nala' lliguisheguem, nam ilaviigui ca lỹa maye 'eeta'am na filisteopi, qataq naỹamaxate' nam chegaqauecpi.

⁷ Ỹoqo'oye na na'alhua namayepi ỹataqta nlaxagui na lcat plata, qataq na lcat oro, qataq na laỹamaqtacpi sa qaivi' da qanaloqten. Na na'alhua ỹataqta nlaxalec na caipi qataq ana nnaigonapi maye sa qaivi' da qanaloqten.

⁸ Qataq na na'alhuapi nlaqaalec nam saq 'en atamnaxala'pi, nache na shiỹaxauapi natameetacot nam atamnaxala'pi, maye ỹauota'aisalo naua lhuaxaye qataq naua llaxaata co'ollaq ỹo'ottacpi.

⁹ Namayepi ỹacona da qaica ca la'amaqchec qataq qaica ca 'enec. ¡Qaq ỹoqo'oye saishet qome da 'auchoxoren 'Am Nataxala'!

¹⁰ Nam shiỹaxauapi ỹe'eguenot qome na pa'aguiñi ana coma'pi, qataq na pa'aguiñi ana 'alhua souaxat da lchec da lviraxac Ñim Nataxala', qataq na le'eraxa da la'amaqchec Ñimaye.

¹¹ Nam na'amqaanaxaicpi qalaq nloguiñi qome, qataq nam napagaqaanaxaicpi qaica ca 'enec. Cha'aye nacheñita Ñim Nataxala' da qaỹo'oxoren qome que'eca na'a'q,

¹² ca na'a'q maye Ñim Nataxala' maye Qaica ca Ỹaqalanapec, anac da dataỹa'aguet 'enauac na ño'oxonnaxaicpi, na'amqaanaxaicpi qataq na napagaqaanaxaicpi, da yaqto' qaica naqa'en ca la'amaqchec namayepi,

¹³ qataq dataỹa'aguet 'enauac nam 'eetega 'eeta'am ana 'epaqpi cedro maye huaña ye Líbano, nam 'eetega 'amaqtaqaicpi qataq qaỹoqotcheguemecpi, qataq nataỹaña 'enauac ana robles maye huaña ye Basán,

¹⁴ qataq da dataỹa'aguet 'enauac nam 'eetega 'eeta'am ana qaỹoqotcheguemec qasoxonaxapi, qataq napacalec ana qaỹoqotcheguemec lcomaraxalatepi,

¹⁵ qataq 'enauac nam 'eetega 'eeta'am ana qaỹoqotcheguemec nalloxolatepi, qataq na sa nsattec npaqtaxanaxatpi,

¹⁶ qataq dataỹa'aguet 'enauac nam 'eetega 'eeta'am ana notaxaquipi da qanayiguingui na 'etaxat maye chegaqa'a ye Tarsis, huo'otaq ana notaxaquipi maye ỹataqta huo'o da lyac.

¹⁷ Na ño'oxonnaxaicpi qataq na na'amqaanaxaicpi ỹataqta imauec qome da qaica ca 'enec. Nacheñita Ñim Nataxala' da qaỹo'oxoren qome que'eca na'a'q,

¹⁸ Qaq huaña qome nache imeuo 'enauac nam ne'enaqtac atamnaxala'pi.

¹⁹ Qom ivita da nachaañi Ñim Nataxala', da imattalec naqa'en ana 'alhua da lchec, nache na shiỹaxauapi nqañoxotoigui qome na lauacpi ana coma'pi qataq na lpoxoỹaxapi ana 'alhua, souaxat da lchec da lviraxac Ñim Nataxala' qataq na le'eraxa da llo'oxoyec Ñimaye.

²⁰ Qaq que'eca na'a'q nache ca shiỹaxaua ỹasaxauec qome ca ne'enaqtac maye natamnaxala', ỹanem aca chegoxonaxapi qataq micaipi, cam ne'enaqtac atamnaxala'pi maye chegaqaigui na oro qataq na plata, maye maiche lo'onatac co'ollaxa da yaqto' natameetacot.

²¹ Nache camayepi nqañoxotoigui qome na lauacpi ana coma'pi, qataq na lpoxoỹaxapi ana lcomaraxalatepi, souaxat da lchec da lviraxac Ñim Nataxala' qataq na le'eraxa da llo'oxoyec Ñimaye qom ivita da nachaañi, da imattalec naqa'en ana 'alhua da lchec.

²² Qaỹa'axañiiñi qome da qaua'amaqchiñiitac cam shiỹaxaua maye qaica ca naigui, cha'aye da nachaalataxac cam shiỹaxaua 'eeta'am da 'oonolec da qanaue'c naua na'a'che.