Isaías 16 - La'aqtaqa Ñim Lo'onatac 'Enauacna 2013

Na Moab le'ecpi ỹe'eguena ye Judá

¹ Qaq so nataxala'pi yi'iye 'alhua chegoqchiguiña naqa'en ye Selá maye huaña ye toolec 'alhua, so qagueta llalaqpi da ỹamaxa añi qasoxonaxa ye Sión, da yaqto' lachetaqtaxanaxat.

² Qaq na lma' ye Moab qalaq ỹa'axasoxoolec qome so tala Arnón, 'eeta'am ca qoỹo da qaỹo'oraxat, nache datauec ca'ai ca lpata'c.

³ Nache 'enapega ye Sión, 'eeta': «Ñaq 'auauo'o ca 'alapaxañi lataxac, qaq nache 'am qome da 'am qarpaqtaxanaxat. Qomi' 'apelteeleguete qome ye na'a'q laiñi, 'eeta'am 'anqa'en ye pe, qataq 'oxooñi qome nam ca'ai qanqa'en ca na'alhua, qataq saishet da 'aỹa'anec nam 'eltaxaicpi.

⁴ Ñaq 'aua'aqta'a da 'am ỹe'eguenot nam 'eltaxaicpi maye chegaqa'a ye Moab, 'ampaxaalec qome da 'auataỹa'aguet nam huotaique da ilaxachigui namayepi.» Qaq qom ime de'era que'eenaxac qataq vi'iiguet da nlaqtaguec namayepi, qataq ca'ai nam 'alhua som nlaxatteguiñi namayepi,

⁵ nache huo'o qome ca 'oonolec maye chegoxoguet so David, ca ivira'a da nta'a, qaq dam lo'onataxanaxac maye saldaỹai', qalaq na'attalec qome da nchoxonnataxanaxa, qataq huo'o naq 'enec qanqa'en da huo'o ca nmit nasouaxashet, qataq lapaxañi qome nam no'on lataxacpi, qataq saỹaỹaloxon da ỹo'ot ca nalochiguiñi lataxac.

⁶ Qomi' saỹaanaq da lta'araic ño'oxonnaxac ye Moab, da na'amqaanaxac, da napagaqaanaxac qataq da ño'oxonnaxac, qataq nam qaica ca naigui ltaxaỹaxacpi.

⁷ Qaq ỹoqo'oye 'enauac na lma' ye Moab nỹeelec qome ye na'alhua, qaq ỹataqta lta'araic qome da laquicoxo, qataq da nqui'ic souaxat nam shiỹaxauapi ye Quir Jaréset.

⁸ Ye uva lma'pi ye Hesbón qataq ye Sibemá qalaq ỹataqta deqaqa, cha'aye ilaxachigui nam lta'alpi na ỹotta'a't shiỹaxauapi, ana lcouepi co'ollaxa qalaq ivira'a ye Jazer, qataq imattalec ye toolec 'alhua, nache ivitta'a ye pa'aicra'a aye auaxai.

⁹ Qaq ỹoqo'oye nagui ñeỹen souaxat yem uva lma'pi ye Sibemá, qataq ye Jazer, qataq secoldec naua ỹache' souaxat ye Hesbón qataq ye Eleale, cha'aye da ivita da qanqat na ala na nañiguishec, qalaq nda'a't da na'alaxac da alaataxac qaỹa'aqtega.

¹⁰ Da tonaxac qataq da namaicỹaxac, maye huaña naxa nam no'onaxapi qalaq imeuo qome qataq qaica qome ca ỹa'alaqtai' souaxat da ntonaxac, qataq ca do'onaxaatai' da huaña na nanaxanaqa'pi, qataq qaica ca qanlom ana uva da ỹo'ot ca lataxa, huaña nache imeuo qome 'enauac da na'alaxac.

¹¹ Añi iquiyaqte qalaq cholaxan 'eeta'am aca nvique arpa, souaxat ye Moab qataq ye Quir Jaréset.

¹² Qaq na'aictaxa ye Moab da tasheguema ana lcomaraxalatepi, da huaña da nqouagaxauen ivitta'a da nasamñi, qataq na'aictaxa da taua'a añi natamnaxaqui da natamen, qalaxaye nache 'ena'am qaica qome ca ỹachegoxotaigui damaye.

¹³ Qaq 'enaua co'ollaxa naua nasaxarec la'aqtaqa Ñim Nataxala', soua qaỹoqteguelo vi'iye da dataỹa'aguet ye Moab.

¹⁴ Qalaxaye nagui detaqa Ñim Nataxala', 'eeta': «Qom ivildec naua tres vi'iye, maye 'eeta'ama naua vi'iye maye qoỹanema da do'onataxan ca 'onataxanaxaic, nache da la'amaqchec ye Moab qaiqaiga qome, qataq na'aictaxa da qalota na hueta'a shiỹaxauapi, qalaxaye saq 'amaqtache qataq qaica ca la'añaxa'c caua no'oirañi maye lca'alaxaiqa.»