Isaías 13 - La'aqtaqa Ñim Lo'onatac 'Enauacna 2013

Qaỹa'axata'a dam talec qome ye Babilonia

¹ Da nauanaqchec maye ỹa'axata'a dam talec qome ye Babilonia, dam qaỹachaxana co'ollaxa so Isaías, som llalec so Amós.

² «¡Qanauaxaỹaxañiisheguem qome qaỹa'añiỹalec aca toolec qasoxonaxa aca la'anaqte ca alaataxac! ¡Qataq qauamaqai qome na alleppi da yaqto' deloqui! ¡Qauoita'a na qarhuaqai da qoñiỹapega da inoxoneuo tateua'a na lasompi maye llegueuo nam 'amaqtaqaicpi nta'alpi!

³ Mashe seỹaxana nam ỹa'añaxanecpi, qataq mashe samaq na ñalleppi maye seỹotauga co'ollaxa, nam huo'o da lamaicỹaxac souaxat da ỹauegaxanaxac, da yaqto' ỹacoolec da ỹo'ot da iuaxanaxanaxac.»

⁴ Qaỹa'aqtega na na'alaxacpi lamaqteguelec aye qasoxonaxapi, 'eeta'am da la'alaxac ca qalota shiỹaxauapi. Qataq qaỹa'aqtega da l-lamaxa na ỹotta'a't shiỹaxauapi, nam nhuo' le'ecpi maye laỹootega't. Qaq Ñim Nataxala' maye Qaica ca Ỹaqalanapec naloqna't na le'enaxatpi nam nalleppi maye lhuotta da nalat.

⁵ Chegaqa'a ye ỹataqta qaỹoqta 'alhua, maye pa'aỹa'ague da nala' lliguisheguem. Ñim Nataxala' anacta nachetac na lo'ogoxonaxat souaxat da lalemataic, da yaqto' ilaxachigui 'enauac ana 'alhua.

⁶ Ña qanỹeñi qome, cha'aye mashe saqaỹapeque cam na'a'q maye lviraxaqui Ñim Nataxala', qom nvi' camaye nache qami' nlaxaayiñi Ñim Qaica ca Ỹaqalanapec.

⁷ Qaq huaña nache 'enauac qome na shiỹaxauapi choche ñaxanguilo naua lhua'q, qataq 'enauac namayepi deqat qome da na'añaxataxac.

⁸ Nache nlaxagui qome da lcolanaxa, qataq lta'araic da lachetataic qataq da nqui'ic, nache ncocateguiñi 'eeta'am aca 'alo da deco'otapigui', qaq ñi 'oonolec da ilota'a ñi lỹa qalaq ỹe'elaq, qataq napaqhuec na lashec souaxat da la'agaxa.

⁹ Mashe anacta ca na'a'q maye lviraxaqui Ñim Nataxala', na'a'q maye chaqaic qataq nactaigui da nnogoxonaxac, qataq da 'ettaigui layeloxo Ñimaye nache ỹo'ot qome da toolec ana 'alhua, qataq imeuo naqa'en nam 'etaxaloxoicpi maye huetalec anamaye.

¹⁰ Huaña nache ana huaqaañipi qataq aso dapiche' saishet da 'eroigui, qataq añi nala' da nnoxoosheguem qalaq naue', qaq ñi ca'agoxoic nataqa'en qaica ca le'eraxa.

¹¹ Qaq Ñim Nataxala' 'eeta': «Sauo'o qome ca nhuaxanaguec na shiỹaxauapi souaxat nam qauem maye ỹo'ottac, qataq nam qauemaicpi souaxat da lalaataxanaxac. Imeuo ñaqa'en da napagaqaanaxac na ño'oxonnaxaicpi, qataq qaica ñaqa'en ca la'amaqchec na na'amqaanaxaicpi qataq nam qaica ca iren.

¹² Aỹem so'ot qome da huo'o da lvic na shiỹaxauapi, napacalec da lvic ana oro maye huaña ye Ofir.

¹³ Huaña nache cholaxan ñaqa'en na piguem, qataq ana 'alhua ca'ai ye hueta'a souaxat da inogoxonaxac que'eca na'a'q, qataq dam 'ettaigui ỹalemataic.

¹⁴ Na shiỹaxauapi qalaq 'eeta'am qome aca ñi'imshe da qaicaatac, huo'otaq aca qaguetapi da nlagaxattac nache qaica ca ishet da laỹona't. Nache ñi 'oonolec ỹe'eguelaxa ca maiche lma', qataq ỹe'eguena ca maiche na'alhua.

¹⁵ Qaq da huo'o ca qailalec nache qaỹa'arapec, qataq da huo'o ca nañan da qaỹaconeua'a, nache camaye qaỹalauat.

¹⁶ Qataq ỹauaachigui qanqa'en da qaiuaxaneguet na 'alhua cam qapio'olec llalaqpi, qataq qui'itchiguilo qanqa'en naua lma'ate qataq qancat ana lhuapi.

¹⁷ Aỹem samaxalec qome na Medos le'ecpi da iloquiaxan namayepi, nam Medos le'ecpi maye saishet da nmitta'a ca lcat plata, qataq saishet da qochetega ca lcat oro.

¹⁸ Namayepi irolec qome aca lchecnapi da huañi naqa'en na nsoxoppi, qataq saishet da ichoxonnai' natai' ñaq cheta'ague da ñiguiñipi, qataq sa ichoxoreetac na laỹepi ñaqpiolec.

¹⁹ Qaq ye Babilonia maye llo'oxonnatac na ỹotta'a't shiỹaxauapi qataq ỹo'ot da llo'oxoyec qataq da ño'oxonnaxac na caldea le'ecpi, yemaye 'eeta'am qome ñaqa'en ye Sodoma qataq ye Gomorra co'ollaq selaxachigui.

²⁰ Nache saishet qome da qaltaq qaỹe'eguelaxa da qanayenalec, qataq yemaye qaica qome ca ishet da qaltaq nalec. Na Arabia le'ecpi saishet qome da qaltaq ỹe'eguelaxa yemaye da nalec, qaq ivira'a na qagueta lo'opi da saishet da nmataqa' naqa'en yemaye aca lalo qaguetapi.

²¹ Nacherata da hueta'a qome yemaye ca copaicpi, qaq na nỹecpi qalaq nlaxagui qome aca chiyetpi, qataq hueta'a qome yemaye ca mañecpi qataq nquishesteguelec yemaye aca huauec quetaqpi.

²² Na nỹecpi maye qanpaxattaua'a qalaq dalacotapoigui qome aca huaxaỹaxapi, qataq nam ỹataqta 'onaxaic nỹecpi lta'araicpi qalaq hueta'a qome ca qa'alaqpi. 'Am Babilonia mashe nayeetai' ca 'araloqo', qaq mashe saqaỹarauec naua na'axa'te maye qouetaiguilo.»