Isaías 12 - La'aqtaqa Ñim Lo'onatac 'Enauacna 2013

No'onec da qoỹan da 'achecỹaxac

¹ Qaq que'eca na'a'q, nache 'am qonapec qome «'Am sanot da ña'achecỹaxac 'Am Nataxala', cha'aye na'aictaxa da aỹem 'aualemataỹa co'ollaxa, qalaxaye da 'aralemataic mashe vi'iiguet, nache aỹem 'avi'eguelaxatem da ilagaxayec.

² Ñim Lo'onatac 'Enauacna, nacheñi ñim aỹem nca'alaxatec, aỹem ñaquita'a Ñimaye nache saishet da she'etac. Ñim Nataxala' nacheñi ñim ỹe'eguenaxala' qataq nacheñi ñi ỹa'añaxac, qataq nacheñi ñi ica'alaxaqui.»

³ Nataqa'en qami' ishet da qauamaichiguiñi qome da qanỹomiigui acam laỹe' da nca'alaxa,

⁴ nache que'eca na'a'q qoñeeta' qome: «Qaỹa'añiỹot da qana'achecỹaxaqui, qataq qavio'oxoreñi Ñim Nataxala', qaua'aqtaxañim na ỹotta'a't shiỹaxauapi 'enauac nam huo'o maye ỹo'otpi co'ollaxa Ñimaye, qataq qauennataxanaxañic namayepi da Ñimaye imattalec 'enauacna.

⁵ Qauo'onaxañeeto'ot Ñim Nataxala', cha'aye ỹataqta lta'araic nam ỹo'otpi co'ollaxa, qaq iuen da ỹaỹaten 'enauac nam huetalec ana 'alhua.

⁶ Qauo'onaxañi qataq qantoñiỹapigui' qami' maye qarma'ai na Sión, cha'aye Ñim Qui'itta Natamnaxala' so Israel maye qami' netanguilo ỹataqta lta'araic da la'amaqchec.»