Isaías 11 - La'aqtaqa Ñim Lo'onatac 'Enauacna 2013

Qaỹa'axatta'aguet aca llaxataxa so Jesé

¹ Qaq asa'aso qo'oipaq lamo, maye nacheso so Jesé, huo'o qome aca llaxataxa, qaq aca'aca llaxataxa chegoqtoiguilo qome naua lpa'aye.

² Qaq so Saqcha'a La'añaxac Ñim Nataxala' nache hueta'aguet qome camaye, nache ỹanem da laỹaanec, laỹaanataxanaxac, sanqalat, la'añaxac, lauattonaxanaxac, qataq ỹalaxaguet Ñim Nataxala'.

³ Da huo'o ca nmit qalaq saishet da quetague' da yo'oqchigui lataxac ca shiỹaxaua, qataq saishet da ỹo'ot ca chochaq la'axaỹaxac, cha'aye ỹaỹamaxareeta da ỹalaxaguet Ñim Nataxala'.

⁴ Nacherata da do'ogoxona da nalochiguiñi lataxac da nmit na choxoraqpi, qataq iueelec nam qaica ca la'amaqchec maye netalec ana 'alhua. Naua la'aqtaqa qalaq 'eeta'am ca pon 'epaq da iuaxan ca qauemaic, qataq ỹauota'a na la'at maye chegaqaigui na alap da ỹalauat ca qauemaic.

⁵ Camaye nache 'eetai' qome da ỹaatañi da nalochiguiñi qataq dam 'eesa lataxac.

⁶ Qaq huaña qome, nache ca qa'alaq nhuoteete' ca qagueta llalec, ca quiyoc qataq ca quetaq llalec huaqta'a't da nmattrapeguec, ca huaca llalec qataq ca llon llalec qalaq nache nactasheguema't da llaxa, qaq catai' nogotolec ilotegueto qome caamaye.

⁷ Aca huaca qataq aca 'oosa qalaq auochaxau' qome, qataq caua llalqa huaqta'a't qom nmattrapeguec, qaq ca llon qalaq chectac qome na 'auaqpi 'eeta'am ca nauegaxanaxala' huaca.

⁸ Qaq catai' nogotolec maye ñaq lleptac qalaq ỹa'ashaxaatac ca lauac ca na'araxanaq, qataq ishet qome da ỹasheltapeegue ca lauac camaye.

⁹ Nache cam hueta'a añim qui'itta ñeqasoxonaxa qaica qome ca ỹo'otec ca qauem ca lỹa, cha'aye da nauattonaxanaxac Ñim Nataxala' nlaqchigui qome ana 'alhua, 'eeta'am na 'etaxat da nlaqchigui naqa'en aso auaxai.

¹⁰ Qaq qom ivita que'eca na'a'q, nache aca llaxataxa se'eso lpa'a' maye nacheso so Jesé, nachaañi qome 'eeta'am da la'anaqte na nhuo' le'ecpi, nache na ỹotta'a't shiỹaxauapi jec qome da nmittaique, qaq cam hueta'a camaye qalaq ỹataqta huo'o qome da llo'oxoyec.

¹¹ Qaq que'eca na'a'q Ñim Nataxala' qaltaq ỹachaxan qome da la'añaxac, nache ñe'eguelaxat cam lca'alaxaicpi nam lalamaxat nhuo' le'ecpi, maye hueta'a ye Asiria, Egipto, Patros, Etiopía, Elam, Sinar, Hamat, qataq ana ỹaqa'ata 'alhuapiolec aso auaxai.

¹² Qataq nauaxaỹaxaasheguem qome aca la'anaxanaqte da yaqto' nam ỹotta'a't shiỹaxauapi ila'a, nache laỹona't na Israel le'ecpi maye qaỹauega co'ollaxa ye ỹaqa'a 'alhuapi, qataq chegoqchiguiña naqa'en 'enauaque naua laỹel ana 'alhua, na Judá le'ecpi maye nlagaxattac co'ollaxa.

¹³ Da lquiỹaxanaqtaic ye Efraín imeuo qome, qataq da lalemataic ye Judá vi'iiguet qome, nache ye Efraín saishet qome da nquiỹatega ye Judá, qaq ye Judá saishet qome da dalematatega ye Efraín.

¹⁴ Maye nacherata da ntauna't qome da dataira'aguet ye Filistea le'ecpi maye pa'aỹa'ague da nala' lliguiñi; qataq huaxaỹa't qome da deuotaxanec da lsallaxa yem pa'aỹa'ague da nala' lliguisheguem, qaq da la'añaxac ivira'a qome ye Edom qataq ye Moab, qataq ivira'a da choche ỹamaqtac qome ye Amón le'ecpi.

¹⁵ Ñim Nataxala' ỹauategue qome ca nqa'aic aso Auaxai Togaxarai, qataq nauaxaỹaxaasheguem na lhuaq taalec naqa'en so tala Éufrates, qataq anacot ca la'at maye ỹataqta chaqaic, nache icolaxachigui se'eso tala siete naqa'en caua la'auaxaco, qaq saiuen qome da qanqa't naua pela'ate da qaỹa'axasoxonguilo caamaye.

¹⁶ Qaq yem no'onañi nhuo' le'ecpi maye lalamaxatpi Ñim Nataxala' qom ivita da ñe'eguelaq chegoqchiguiña ye Asiria, nache qalotegue qome ca llec nqa'aic, 'eeta'am so na'a'q co'ollaq so Israel le'ecpi ca'ai ye Egipto.