Isaías 10 - La'aqtaqa Ñim Lo'onatac 'Enauacna 2013

¹ ¡Choxoraxaso' nam ỹo'ottac na nqataxacpi maye saỹaỹamaxañi qataq ỹa'axatec nam lataxac maye sa qanalo'oguet,

² qataq saishet da ỹo'otec ca ỹaỹamaqchiguiñi lataxac cam qaica ca la'añaxac, qataq saishet da ỹo'ot nam no'on lataxacpi maye huetalec na choxoraqpi maye ỹalamaxatpi, qataq nhuo' ana pa'aipi qataq decachiỹot na saploqpi!

³ Qaq ¿hua'ago' ca 'eetec qom ivita da ỹaneuo da lo'onataxanaxac, qom ilota'aguet da ña qaỹoqteguet cam nhuaxanaguec namayepi? Qataq ¿negue't ca ỹe'eguenot da yaqto' itauan? Qataq ¿hua'ague qome ca ỹacha'ague da lsallaxa?

⁴ Da saishet qome da nman nache qaỹauec da qaicoñe' qataq cañe' qanqa'en cam qaỹalauatpi. Qalaxaye ñaqaiyeta da layeloxo Ñim Nataxala' saishet da vi'iiguet, Ñimaye nache queto'ot da darenaxaatac.

Ñim Nataxala' do'onataxana ye Asiria

⁵ ¡Ñim nta'a ye Asiria! Nacheñi ñim so'ogoxona qome 'eeta'am ñaqa'en ca 'epaq qom sauo'o ca iuaxanaxanaxac, qataq nacheñi ñim nashelte maye seuen qom salemata.

⁶ Samaxalec qome da iloquiaxan nam shiỹaxauapi maye qauemaicpi, nam shiỹaxauapi maye aỹem inogoqchet, yaqto' decachiỹa qataq deuotaxanec da lsallaxa, qataq yaqto' petapigui 'eeta'am ca nshaxa maye huetangui na nqa'aicpi.

⁷ Qalaxaye ñi nta'a ye Asiria, saishet da lhuennataxa de'era, qataq saishet da nachera da tatapigui lauel, maye nacherata da tatapigui lauel da nlaxaañi qataq nmatchiguiñi nam qalota ỹotta'a't shiỹaxauapi.

⁸ Ỹoqo'oye ñimaye 'eeta': «'Enauac na nta'alpi ỹalaxaguet na ỹamaxasoxonaxacpi da samaq.

⁹ Cha'aye aỹem, nache 'eeta'a't ñaqa'en yem huaqta'a't nỹecpi ye Calno qataq ye carquemis, Amat qataq ye Arpad, ye Samaria qalaq 'eeta'am ye Damasco.

¹⁰ Aỹem ỹoxonec co'ollaxa so ỹotta'a't shiỹaxauapi maye qalota so natamnaxala'pi, napacalec so natamnaxala'pi ye Jerusalén qataq ye Samaria.

¹¹ Qaq ỹoqo'oye dam so'otec co'ollaxa ye Samaria qataq som natamnaxala'pi, ¿peta'a saisheto' da so'otec nataqa'en ye Jerusalén qataq nam natamnaxala'pi?»

¹² Qaq Ñim Nataxala' qom imat 'enauac nam ỹo'otecpi qome añi qasoxonaxa Sión qataq ye Jerusalén, nache ỹauo'o ca nhuaxanaguec ñi nta'a ye Asiria souaxat da na'amaqchengui nam ỹo'otpi, qataq da ño'oxonnaxac qataq da napagaqaanaxac.

¹³ Cha'aye ñimaye 'enapec: «Nam so'otpi chegoqchigui da maiche ỹa'añaxac, qataq chegoqchigui da ỹaỹaanec cha'aye aỹem ỹaanataxanaxaic, qataq seuotaxanec nam na'alhuapi nam shiỹaxauapi, qataq sacona da lsallaxa namayepi, qataq sheeta'am cam 'añaxaic da ỹoxonec so nta'alpi.

¹⁴ Qataq sauota'a na ihuaq da sacona da lsallaxa 'enauac na nhuo' le'ecpi, qataq seuotaxanec 'enauac na 'alhuapi sheeta'am ca ỹaconalo caua qaỹala't maỹo lco'oue'ete ỹachegoxotanguilo ca maỹo lpata'c, nache qaica ca iraxa'n naua laua't, qataq qaica ca ỹauachigui na alap da ỹa'alaq.»

¹⁵ Qaq ¿ishet peta'a aca qachepe da 'eetega ỹactec da la'amaqchec napacalec cam do'ogoxootega acamaye? Qataq cam nchegaxanaxat ¿napacalec peta'a cam dechegaxaatega camaye? ¡'Eeta'am aca nashelte, ye acamaye chochaq 'epaq qaq saishet da nachaca aca iraxaatapigui' cam shiỹaxaua maye ỹachetac acamaye!

¹⁶ Qaq ỹoqo'oye Ñim Nataxala' maye Qaica ca Ỹaqalanapec qaica qome ca la'añaxac naqa'en nam ỹataqta 'añaxaicpi, qataq ỹo'ot da 'eroigui na lo'oc souaxat na le'eraxa ca napaxa.

¹⁷ Ñim Lo'onatac 'Enauacna maye Qui'itta, ñim icoỹattalec na Israel le'ecpi, Ñimaye 'eeta'am qome na le'eraxa ca norec, nache huaigui ca 'oonolec na'a'q da ỹavigaxat qataq nlaxaañi ana ỹaxat qataq na huouesat maye netalec ne'ena 'alhua.

¹⁸ Nache imauec qome da nlaguiñi naqa'en da lyac nam lalamaxat aviaqpi qataq nam lanaxanaqa'pi. Nache 'eeta'am naqa'en ca dalolaxaic da mashe qaica ca la'añaxac.

¹⁹ Nache ỹataqta saq 'amaqtaq qome aca no'onañi qo'oipaqpi ne'ena aviaq, qaq ivira'a catai' nogotolec da ishet da naloqten ye lcata.

²⁰ Qaq que'eca na'a'q, nache cam saq 'amaqtaq maye no'onañi na Israel le'ecpi, nam chegoxoguetpi so Jacob maye lca'alaxaicpi, saishet qome da ỹe'eguelaxa da naquitto'ot nam nlaxaañi co'ollaxa namayepi, nacherata da deuaxaỹot Ñim Nataxala', Ñim Qui'itta Natamnaxala' na Israel le'ecpi.

²¹ Qaq huo'o qome ca saq 'amaqtaq nam chegoxoguetpi so Jacob, cam ỹe'eguelaxa qome Ñim Lo'onatac 'Enauacna maye 'añaxaic.

²² Qami' Israel le'ecpi, na'aictaxa da qami' qalote' qome da qoñiita'am na lsoche na 'alhua maye huetangui aso auaxai, qalaxaye saq 'amaqtache qome caua ñe'eguela'q. Qaq dam nasataxac da qami' qanlaxaayeñi, damaye ỹo'ot qome da ỹaatec naqa'en dam nalochiguiñi lataxac.

²³ Cha'aye Ñim Nataxala' maye Qaica ca Ỹaqalanapec, mashe ime da lapaxañi da ilaxachigui namayepi, nache ỹacoolec qome dam huotaique da ỹo'otec 'enauac ne'ena 'alhua.

²⁴ Ñim Nataxala' maye Qaica ca Ỹaqalanapec, 'eeta' da la'aqtac: Qami' ỹalamaxat nhuo' le'ecpi maye qoñiitaña na Sión, saishet qome da qayi'iitega ye asiiriopi, na'aictaxa da qami' ira'alo aca lashelte da qami' iuaxa'n, qataq da nauaxaỹaxaasheguem ca npon da qami' dataỹa'agueta, 'eeta'am da 'eetec co'ollaxa ye Egipto le'ecpi.

²⁵ Cha'aye mashe saqaỹapeque ye laloqo' da ỹayeloxo, nache da ỹayeloxo nlaxaañi qome ye 'anpa'aguenaxauapi.

²⁶ Ñim Nataxala' maye Qaica ca Ỹaqalanapec ỹauo'o qome ca nhuaxanaguec yemayepi, 'eeta'am da 'eetec co'ollaq loxonec so Madián le'ecpi co'ollaq huaña añi coma' maye le'enaxat Oreb, qataq ỹachaxana da la'añaxac da dataỹa'aguet ye Asiria, 'eeta'am co'ollaq ỹachaxana da la'añaxac da dataỹa'aguet ye Egipto.

²⁷ Qaq que'eca na'a'q nache 'am ñeqateeguesop qome, nam qapa'atta 'aya'ac maye huetalec na 'arallac, qataq sacagaxachigui qome na nauegaxanaxaqui 'epaq maye huetalec na 'arana'q.

²⁸ So alleppi asiiriopi nlectot ye Rimón, nache ivira'a ye Ayat, qataq nlectot ye Migrón nache ipatanaña so lla'ac ye Micmas,

²⁹ qataq ỹa'axasoxoolec so la'auaxac nache hua'a da lanataqa' ye Geba. Qaq ye Ramá qalaq ỹataqta iviloxolaqchet da lcolanaxa, qataq datauec so shiỹaxauapi ye Gabaa, maye lma' co'ollaxa so Saúl.

³⁰ ¡'Ana'alaxañi 'am Bat Galín! ¡Ña 'aua'aqa 'am Lais! ¡Choxoraxaso' 'am Anatot!

³¹ Qaq na lma' ye Madmena qalaq datauec, qataq nqañoxooñi na lma' ye Guebín.

³² Qaq nachena na na'a'q da vi'iiguet na asiiriopi hua'a ye Nob, qaq damaye la'anaxat da iloquiaxan añi qasoxonaxa Sión, qataq añi lcomaraxalate ye Jerusalén.

³³ Ña qauloỹa, Ñim Nataxala' maye Qaica ca Ỹaqalanapec, ỹa'axasoxooñi ana qo'oipaqpi irolec da la'añaxac maye huo'o da lchec, ana logorai qo'oipaqpi qalaq hua'axañi ana qaỹoqotcheguemec qalaq naañi.

³⁴ Ỹauota'a aso qachepe da iquesoq ana qo'oipaqpi ye sansattec aviaq, ana qo'oipaqpi maye ỹoqta 'onaxai ye Líbano qalaq 'enauac da hua'axañi.