Hechos 7 - La'aqtaqa Ñim Lo'onatac 'Enauacna 2013

Da ltaxaỹaxac so Esteban

¹ Nache so lta'a na ntaxaỹaxanaxanecpi da qaitaxaỹapegue' Ñim Lo'onatac 'Enauacna, somaye inattac so Esteban, 'eeta': –¿Peta'a 'eesa 'enauac de'era qaỹa'axattac?

² Nache so Esteban 'enapeco': –Qami' ỹaqaỹarolqa, qataq qami' maye qauloitague' ne'ena 'alhua, ñaq aỹem qana'axaỹaxañiỹa. Ñim 'añaxaic maye Lo'onatac 'Enauacna nachaxana so hua'au qarta'a Abraham co'ollaq huaña ye 'alhua Mesopotamia, co'ollaq somaye saxanaxa da taỹa ye nỹecpi ye Jarán da naña.

³ Nache Ñimaye 'enapego' somaye, 'eeta': «Qoca'ai na 'ana'alhua, qataq 'enauac nam 'arhuo' le'ecpi, nache 'anqo'ona qome ye 'alhua maye 'am sachaxana.»

⁴ Nache so Abraham ca'ai ye 'alhua Caldea, nache taỹa ye Jarán da nalec. Qaq co'ollaq qaỹata'ague, nache so lta'a ileu, nache Ñim Lo'onatac 'Enauacna nauega so Abraham ne'ena 'alhua maye qoñiitalec nagui.

⁵ Qaq na'aictaxa da somaye hueta'a ne'ena, qalaxaye Ñim Lo'onatac 'Enauacna saishet da ỹashenem da ỹauo'o ca ỹoqta lalamaxat lma'. Qalaxaye ỹachaxanapecot somaye da ỹanem ne'ena 'alhua, qaq da ivita da ileu, qalaq nacheca ca llalaqpi ca talec. Qaq na'aictaxa da se'eso na'a'q so Abraham saxanaxa da huo'o ca llalaqpi.

⁶ Ñim Lo'onatac 'Enauacna nataqa'en 'enapego' somaye da ca llalaqpi qome taỹa'a da netalec ca ỹaqa'a 'alhua, 'eeta'am ca ỹaqa'a ca chegaqa'ague, nache choche nlatacpi qataq ỹataqta huo'o da ne'enaguec, choche ivittraue'c caua cuatrocientos vi'iye.

⁷ Qalaxaye Ñim Lo'onatac 'Enauacna nataqa'en 'enapeco': «Aỹem qome sauo'o ca nhuaxanaguec que'eca shiỹaxauapi maye ỹauo'o l-latac camayepi. Qaq qom ime, nache ca'ai que'eca hueta'a. Huaña, nache camayepi Aỹem natamnot da huaña ne'ena 'alhua.»

⁸ Nache Ñim Lo'onatac 'Enauacna naỹamaxate' so Abraham, nache 'enapega somaye da 'enauac na ỹalleppi na Israel le'ecpi da ỹauo'o ca la'anaxat na lo'oc da la'anaxat de'era aỹamaxataxac. Qaq ỹoqo'oye co'ollaq ñiguiñi so llalec Isaac, nache so Abraham ỹauo'o so na'anaxat na lo'oc co'ollaq mashe ivi' naua ocho na'axa'te. Qataq nache 'ena'am so Isaac co'ollaq huo'o so llalec Jacob, nache nataqa'en ỹo'ot de'era. Nataqa'en so Jacob ỹo'otec de'era soua doce llalqa.

⁹ Qaq se'esoua llalqa so Jacob maye sachegoxosoxoiguilo, soomaye co'ollaxa ỹataqta nquiỹalo so lqaỹa José. Nache ime'n, da yaqto' qaỹauega ye 'alhua Egipto. Qalaxaye Ñim Lo'onatac 'Enauacna ỹataqta ỹauotec somaye,

¹⁰ Nache ỹeltaxaneguet 'enauac na nque'eenaxaguesat, qataq ỹanem da laỹaanec qataq ỹo'otec so Faraón da ỹataqta ỹaỹamaxareeta somaye, ỹoqo'oye ỹanagui so José da nta'a da ilo'ogue ye 'alhua Egipto, qataq ilo'ogue so lma' somaye.

¹¹ Qaq co'ollaq qaỹata'ague, nache anac so nqouaxa, nache ỹataqta qalota da nachoxoyec ye 'alhua Egipto qataq ye 'alhua Canaán. Nache som qarta'alpi qaica ca aloq qataq qaica ca ỹachegoxota'ague da desheenaxanaique.

¹² Qalaxaye so Jacob co'ollaq huo'o da la'axaỹaxac da ye Egipto huo'o na nallec, nache ỹamaxalo yemaye soua llalqa da desheenaxaraique ca alo'q. Qaq de'era llecỹaxa'c soomaye, nachera da hua'auchiguiñi llecỹaxa'c.

¹³ Qaq soomaye co'ollaq qaltaq ỹe'eguela'q, nache so José nchoxotalo soua lqaỹa't. Huaña, nache so lta'a nam netaña ye Egipto ỹauatton so lqaỹañecpi so José.

¹⁴ Nache so José damaxasoxona so lta'a Jacob qataq so lqaỹañecpi. Qaq somayepi ivi' setenta y cinco ye lcata da ima'a't,

¹⁵ somayepi hueta'a ye Egipto choche ivitta'a da ileu.

¹⁶ Qaq 'enauac somayepi qairo'ogue da Siquén da qailareña som 'alhua maye desheenaxana co'ollaxa so Abraham, ỹachegoxotaigui so llalaqpi so Jamor.

¹⁷ Qaq co'ollaq mashe yaqta'a da ivita so laloqo' da ipacchigui dam ỹachaxanapec Ñim Lo'onatac 'Enauacna co'ollaq ỹanem da la'aqtac so Abraham, nache nam Israel le'ecpi maye netaña ye 'alhua Egipto ỹataqta nquictauec ye lcata.

¹⁸ Qaq ye Egipto co'ollaq dalaxaic som ilo'ogue nta'a, somaye saishet da hua'axaỹapeguelec da na'aqtaguec so José.

¹⁹ Qaq se'eso nta'a ỹataqta nquiỹa na Israel le'ecpi, nache ỹatenachet. Nataqa'en, sa icherapec da 'enapega namayepi da ỹalat na ñaqpiolec maye cheta'ague da ñiguiñi da yaqto' ileu.

²⁰ Qaq se'eso na'a'q, nache huetoigui da ñiguiñi so Moisés. Qaq se'eso nogotolec, somaye ỹataqta lauotaxat Ñim Lo'onatac 'Enauacna, nache soua lta'al ivi't naua tres ca'agoxoiqa da ilotrague' ỹaatraña ca lma't.

²¹ Ime, co'ollaxa nache ỹala't somaye, nache aso maiche llale som lta'a na netaña ye Egipto, asomaye ilalec se'eso nogotolec, nache ỹacona, nache ỹaqchet, 'eeta'am ca maiche llalec.

²² Qaq ỹoqo'oye so Moisés qaỹapaxaguenec 'enauac nam no'on laỹaanec nam netaña ye Egipto. Nache somaye ivira'a da ỹataqta 'amaqtaqaic ỹale qataq 'añaxaic cam 'enapec qataq cam ỹo'ot.

²³ Qaq so Moisés co'ollaq mashe ivi't naua cuarenta vi'iye da llaxa, nache namaqtega so Israel le'ecpi cha'aye maiche lauo'.

²⁴ Huaña, nache somaye ỹauaachigui som Egipto le'ec da iuaxaatac so 'oonolec na Israel le'ecpi. Nache iueelec somaye, qataq ỹalauat se'eso Egipto le'ec.

²⁵ Cha'aye so Moisés ipi'itaxaatega co'ollaxa da na Israel le'ecpi ishet da ỹaỹateeteguet da nacheñi Ñim Lo'onatac 'Enauacna ñi do'onataxana somaye da isouec somayepi. Qalaxaye somayepi saishet co'ollaxa da ỹaỹaaneguet de'era.

²⁶ Qaq so lỹa na'a'q, nache so Moisés ilaleguete soua dos Israel lashe' deloctega't. Nache somaye nshetaique da nmanaqche't, nache 'eetegalo', 'eeta': «Qami' maiche qami' nqaỹa't. Qalaq ¿ta'ainco' ye maiche qauloquiitega't?»

²⁷ Nache som iuaxaatac so lỹa, nache ỹamaxañi so Moisés, nache 'eetego', 'eeta': «¿Negue't ca 'am ỹanagui da 'am qarta'a, qataq da yaqto' ishet da 'anmit ca huo'o ca lasouaxashet da shenaqta?

²⁸ ¿Peta'a 'anshetaique da nataqa'en aỹem 'aualauat, da 'aue'enaxattem da 'eetec yem Egipto le'ec maye 'aualauat shecait?»

²⁹ Nache so Moisés co'ollaq hua'axaỹa de'era, nache datauec, nache taỹa ye toolec 'alhua le'enaxat Madián, nache naña, 'eeta'am ca shiỹaxaua maye ỹaqa'a ca chegaqa'ague. Huaña, nache huo'oi soua dos llalqa.

³⁰ Qaq co'ollaq inoxoore'c soua cuarenta vi'iye, qaq so Moisés hueta'a ye toolec 'alhua maye saqaỹapeque añi qaỹoqotcheguemec 'alhua le'enaxat Sinaí. Huaña, nache nachaxana somaye so namaxashec piguem le'ec huetaigui aso qo'oipaq 'ettaigui.

³¹ Nache so Moisés ỹataqta huo'o da lcolanaxa souaxat se'eso lauanaqchec. Nache co'ollaq nqocheneua'a da huotaique da ỹoqta ichemaxata, nache hua'axaỹa so la'aqtac Ñim Qarataxala', 'eeta':

³² «Aỹem maye Nachaỹem ỹo'oxoreetrac co'ollaxa soua hua'au' 'arta'al, so Abraham, qataq so Isaac qataq so Jacob.» Nache so Moisés ỹataqta iviloxolaqchet da lcolanaxa, nache saishet da ỹañoxot da namatasheguem.

³³ Qalaxaye Ñim Lo'onatac 'Enauacna 'enapego' somaye, 'eeta': «'Anqa't qome naua 'arapela'ate, cha'aye ne'ena 'alhua maye 'auapetalec, namaye ỹataqta sa qaishetapec.

³⁴ Aỹem semeteetac da nque'eenaxac ye ỹalaqpi maye hueta'a ye 'alhua Egipto qataq Aỹem sa'aqtega da nqui'ic yemayepi. Ỹoqo'oye Aỹem senotec da yaqto' sesoueeguesop da la'añaxac na Egipto le'ecpi. Qaq ỹoqo'oye 'anaỹamaxat cha'aye 'am samaq da 'anqo'ona ye 'alhua Egipto.»

³⁵ Qaq na'aictaxa co'ollaxa somayepi da ỹo'otan so Moisés, nache 'eetega, 'eeta': «¿Negue't ca 'am ỹanagui da 'am qarataxala', qataq da yaqto' 'anmit ca huo'o ca lasouaxashet?» Qalaxaye Ñim Lo'onatac 'Enauacna ỹachegoxotchigui so lamaxashec Ñimaye maye nachaxana so Moisés co'ollaq huaigui aso qo'oipaqole, da lataxala' naqa'en qataq da isouec na Israel le'ecpi.

³⁶ Qaq nacheso so Moisés so nqateeguesop ye 'alhua Egipto so hua'au qarta'alpi. Qataq nacheso so ỹo'ot nam sa qaỹauanapigui qataq na na'anecpi yi'iye 'alhua, qataq co'ollaq huaña aso Auaxai Togaxarai, qataq so toolec 'alhua se'esoua cuarenta vi'iye.

³⁷ Qataq nacheso se'eso Moisés so da'aqtaxanem co'olloxocheye so Israel le'ecpi, 'eeta': «Ñim Lo'onatac 'Enauacna qami' namaxalo qome ca la'aqtaxanaxanec, camaye maiche qaralamaxache qarhuo'oi le'ec, camaye 'eeta'am aỹem da qami' qanamaxalo. Qaq camaye ỹataqta qaualaqaileco' qome.»

³⁸ Qataq nacheso so Moisés som huetaigui som hua'au qarta'alpi co'ollaq huaña so toolec 'alhua. Qataq nacheso so detaqtague' so lamaxashec piguem le'ec Ñim Lo'onatac 'Enauacna co'ollaq huaña aso qaỹoqotcheguemec 'alhua le'enaxat Sinaí, qataq hueta'aguet som hua'au qarta'alpi. Qataq nacheso so ỹaconeguet co'ollaxa da na'aqtac maye chegaqaigui da nca'alaxa, da yaqto' qomi' ỹanema.

³⁹ Qalaxaye som hua'au qarta'alpi co'ollaxa saishet da ỹalaxalec somaye, chaqrata da nshetaique da ỹe'eguelaxague da Egipto.

⁴⁰ Nache somayepi 'enapego' so Aarón maye lqaỹa so Moisés, 'eeta': «So Moisés qomi' nqateeguesopa ye Egipto, qalaxaye nagui sa saỹatenaq cam 'eetec camaye. Qaq ỹoqo'oye no'on da 'auo'ot cam 'are'enaqtac da yaqto' sho'oxorenaq qataq nacheca cam qomi' ỹauecta'agueta qome qataq qomi' npaxattaleguete.»

⁴¹ Nache som shiỹaxauapi ỹo'ot so le'enaqtac, 'eeta'am naqa'en na huaca llalec. Huaña, nache ỹalauat na shiguiỹacpi da ỹauo'o lachetaqtaxanaqte ỹavigaxatta da ỹanot, nache ỹataqta qaño'oxoreetapigui som maiche no'onatac.

⁴² Huaña, nache Ñim Lo'onatac 'Enauacna ca'ai somayepi, nache hua'aqta'a da yaqto' natamnot ana huaqaañipi maye neto'ot na piguem. Cha'aye nachera dam 'eetec da nanettañi la'aqtac Ñim Lo'onatac 'Enauacna maye huetalec ana lere so la'aqtaxanaxanecpi, maye 'eeta': Qami' Israel le'ecpi, co'ollaq qoquiitalec so toolec 'alhua se'esoua cuarenta vi'iye, qaq ¿peta'a co'ollaq qaualauacheetac na shiguiỹacpi da qauauo'oi qarachetaqtaxanaqche, qaq peta'a Nachaỹem da Aỹem qaỹa'añiitacot?

⁴³ 'A'i, saishet, chaqrata da qami' qauacheetac qataq qauauo'oi lpe'l so qare'enaqtaqui maye lqui'i so Moloc, qataq so lỹa qare'enaqtaqui lqui'i so Refán maye 'eeta'am da no'onataxac ana huaqaañi. Qaq se'esoua ne'enaqtaqa qami' qauo'oche' co'ollaxa da yaqto' nachesoua qavio'oxoyiñiita'ape. Ỹoqo'oye Aỹem qami' ñeqateeguesopa nagui ne'ena qarmaye, nache qami' samaxalo ye 'alhua maye pa'aigue da laỹe ye Babilonia.

⁴⁴ Qaq som hua'au qarta'alpi co'ollaq huetalec so toolec 'alhua, nache somayepi ỹachetac so npe'l maye huetaiguilo soua nanettaleguete soua lamaxasoxonaxaco Ñim Lo'onatac 'Enauacna. Qaq se'eso npe'l, somaye qaỹe'enaxatchigui co'ollaxa so ỹamaxalec Ñimaye so Moisés, co'ollaq 'enapega da ỹe'enaxatchigui da no'onataxac som ỹauaachigui.

⁴⁵ Qaq se'eso hua'au qarta'alpi, somayepi co'ollaxa ỹaconeguet se'eso npe'l da chegoqtot som hua'au lta'alpi, nache som nnaictague'pi co'ollaxa so Josué nda'a ne'ena 'alhua se'eso npe'l co'ollaq somayepi loxonec na lma' so laỹepi shiỹaxauapi maye nqatec Ñim Lo'onatac 'Enauacna. Cha'aye ne'ena 'alhua ỹauotaique lma' naqa'en somayepi. Qaq 'era da 'eetec se'eso npe'l, nache choche ivitta'a co'ollaq huo'o so nta'a David.

⁴⁶ Qalaxaye Ñim Lo'onatac 'Enauacna ye ỹataqta lauotaxat so David. Ỹoqo'oye somaye iỹaxanot Ñimaye da ỹo'ot aca no'onaxanaxaqui late'erai da yaqto' huaña da na Israel le'ecpi ỹo'oxoren Ñimaye.

⁴⁷ Qalaxaye nacheso so llalec Salomón co'ollaxa so ỹo'ot ñi lma' Ñim Lo'onatac 'Enauacna.

⁴⁸ Qaq na'aictaxa da Ñimaye maye 'amaqtaqaic saishet da netaigui ca choche lo'onatac nỹec ca shiỹaxaua. Cha'aye nache 'enapec naua nanettrañi la'aqtaqa som la'aqtaxanaxanec, maye 'eeta':

⁴⁹ Aỹem ñeso'ootalec na piguem da samaxasoxonapec, qaq ana 'alhua qalaq sapetalec. Qaq ¿hua'ago' ca 'eetec ca nỹec maye qauo'oche da ima'?, 'enapeco' Ñim Nataxala'. Qataq ¿hua'ago' ca 'eetec cam ñimataqa'?

⁵⁰ ¿Peta'a sa ỹo'onataco' 'enauac nam huetalecna?

⁵¹ Qaq ñaq queta da ltaxaỹaxac so Esteban, 'eeta': –Qami' nache 'eetai' da ỹataqta sa qaualaqai, qataq da qana'axaỹaxanaxaqui qataq naua qarquiyaqchilli' 'eeta'am ca saxanaxa da ỹauatton Ñim Lo'onatac 'Enauacna. Qataq nache 'eetai' da qanpa'aguiñiitague' So Saqcha'a Na'añaxac Qui'itta qoñiita'am som hua'au qarta'ailpi.

⁵² Cha'aye ¿chaq negue'to' cam la'aqtaxanaxanec Ñim Lo'onatac 'Enauacna da huo'otaq sa iuaxan som hua'au qarta'ailpi? Cha'aye somayepi nache ỹalauat co'ollaxa som hua'auchiguiñi da ỹa'axatta'aguet da lviraxac som ỹale maye no'on da lataxac. Qaq somaye co'ollaq nvi', nache qami' qauacoñiiua'a, nache qaualauache.

⁵³ Qamaq nacheqami' maye qauacoñiiguet co'ollaxa na lamaxasoxonaxacpi Ñim Lo'onatac 'Enauacna maye ndoi' so lamaxashecpi. Qalaxaye qami' saishet da qaualaqaiguet namayepi.

Da l-leuaxa so Esteban

⁵⁴ Nache som nmit na nasouaxashet somayepi co'ollaq hua'axaỹa de'era, nache ỹataqta dalemata, qataq 'eeta'am da inaga't naua lhue da lquiỹaxa so Esteban.

⁵⁵ Qalaxaye so Esteban, somaye ye ỹataqta nlaqchigui So Saqcha'a Na'añaxac Qui'itta, nache ỹamato'ot na piguem, nache somaye ila'a da llo'oxoyec Ñim Lo'onatac 'Enauacna, qataq ila'a So Jesús nachattañi, hueta'ague na aloic Ñimaye.

⁵⁶ Nache somaye 'enapeco': –¡Ña qauloỹa! Aỹem sela'a da nauatoigui na piguem qataq sela'a da Shiỹaxaua Llalec, damaye nachattañi neta'ague da aloic Ñim Lo'onatac 'Enauacna.

⁵⁷ Qalaxaye so nmit na nasouaxashetpi somayepi, lamaaxa ỹapoguilo naua ltelal, nache ỹa'alqagui, ime, nache ỹataqta qaiparenaxaneua'a somaye da qaỹaconeua'a.

⁵⁸ Nache qaỹauogonnaueegue da laỹe so nỹecpi, nache qaira'a na coma' da qaỹasaq. Qaq nam da'aqtaxan co'ollaxa da 'eetega da huo'o ca lasouaxashet, somayepi icotano'oto naua lapo'ote so nsoq le'enaxat Saulo.

⁵⁹ Qaq co'ollaq ña qaỹasaqtalec so Esteban, nache somaye nqouagaxaueetac, 'eeta': –'Am Ỹataxala' Jesús, 'auaconeguet da saqcha'a ica'alaxa.

⁶⁰ Qaq co'ollaq ime, nache ỹa'alyiñi naua l-llectel, nache ỹataqta na'axannec da la'alaxac, 'eeta': –'Am Ỹataxala', saishet qome da 'aulogui da lasouaxashet ne'enapi. Qaq co'ollaq ime da nasaxauec de'era la'aqtac, nache ileu.