Hechos 3 - La'aqtaqa Ñim Lo'onatac 'Enauacna 2013

So Pedro qataq so Juan natare'n so sa da'añiiguelo naua lchel

¹ Qaq huo'o so na'a'q, nache so Pedro qataq so Juan taresheguema aso no'onaxanaxaqui late'erai co'ollaq mashe dasheta aso nala', cha'aye nache laloxoqui da qaỹo'ot da qouagaxaunaxac.

² Qaq huo'o so ỹale maye nache 'eetai'salo naua na'axa'te da hueta'a aso no'onaxanaxaqui late'erai. Somaye, nache chegoqteuo da sa da'añiiguelo naua lchel. Qaq somaye qaỹe'eguelaxattaua'a so lasom maye le'enaxat 'Onaxaic, da qoỹaataña, da yaqto' somaye ỹashelatac nam inoxootapegueuo.

³ Qaq se'eso ỹale co'ollaq ila'aguet so Pedro qataq so Juan da tairaua'a aso no'onaxanaxaqui late'erai, nache ỹashelata'ape.

⁴ Nache so Pedro qataq so Juan ilotrot somaye. Nache so Pedro 'enapego' somaye, 'eeta': –Ña qomi' 'auamato'oto.

⁵ Nache se'eso ỹale ỹataqta ilototo soomaye, cha'aye ipettega da huo'o aca qoỹanem.

⁶ Qalaxaye so Pedro 'enapego' somaye, 'eeta': –Aỹem qaca aca aỹom plata, huo'otaq aca oro. Qalaxaye 'am sanem da aỹem hueto'ot: 'am serolec da le'enaxat So Jesucristo maye Nazaret le'ec qataq 'am shenapega: «qoñisheguem, 'auqueuoỹapigui'.»

⁷ Nache so Pedro ỹacona na lhuaq aloic somaye, nache naviguisheguem. Huaña, nache da'añiiguelo naua lchel qataq naua nqonacamo somaye.

⁸ Nache se'eso ỹale, somaye ỹataqta nparenaxaasheguem da nachaañi, nache jec da queuoỹapigui'. Nache lỹatreuo soomaye da taua'a aso no'onaxanaxaqui late'erai. Huaña, nache queuotapigui', dasottac, ỹo'oxoreetac Ñim Lo'onatac 'Enauacna.

⁹ Nache 'enauac nam ỹauaachigui somaye da queuotapigui' qataq ỹo'oxoreetac Ñim Lo'onatac 'Enauacna,

¹⁰ somayepi ỹataqta ỹa'aalac qataq ỹe'elaqchet de'era ỹauaachigui. Cha'aye 'enauac da qaỹauatton se'eso ỹale qataq qaỹaỹaten da nacheso som dashelaxaatac naxa maye nso'ootañi, hueta'a ca lasom aso no'onaxanaxaqui late'erai maye le'enaxat 'Onaxaic.

Da la'aqtaxanaxac so Pedro co'ollaq hueta'a cam qaỹamata'ac nasom so Salomón

¹¹ Nache se'eso ỹale maye qanataren, somaye nache saishet da iỹotre'c soua Pedro qataq so Juan. Nache 'enauac na shiỹaxauapi nqalgoqta'a ca huetra'a soomaye maye le'enaxat nasom so Salomón, cha'aye ỹataqta huo'o da na'aalaxa, nache qaicoleesopa.

¹² Nache so Pedro co'ollaq ila'a de'era nqochoxo, nache 'enapego' so shiỹaxauapi, 'eeta': –Qami' Israel le'ecpi, ¿chaq ta'ainco' ye ỹapactec da qarqochoqoi? ¿Ta'ainco' da qomi' qauloito'oto, 'ena'amo' da nacheqomi' da ñatarenaq de'era ỹale, huo'otaq da maiche qara'añaxac da seroxolec damaye da yaqto' queuoỹapigui'?

¹³ Qalaxaye Ñim Lo'onatac 'Enauacna maye ỹo'oxoreetrac co'ollaxa soua hua'au' qarta'al Abraham, qataq so Isaac, qataq so Jacob, Ñimaye nacheñi Ñim ỹanem da lta'araic la'amaqchec So Llalec Jesús, Som qami' qaỹa'añiiua'a co'ollaxa na lta'alpi na Roma le'ecpi. Nache so nta'a Pilato co'ollaq huotaique da ỹaxanec, qalaq qami' saishet da qauaỹamaxayiñi.

¹⁴ Nache qami' saishet co'ollaxa da qauỹaxañiiua'a da qaisouec se'eso ỹale maye qui'itta qataq no'on da lataxac; nda'a't da qami' qauỹaxañiiua'a da qaisouec som laataxanaxaic.

¹⁵ Qaq 'era da 'eetec da qami' qaualauache som chegoqo'ot da achaalataxac. Qalaxaye Ñim Lo'onatac 'Enauacna qaltaq nca'alaxatec Somaye, qaq 'enauac de'era qomi' sauanaqchigui, ỹoqo'oye sa'axataqtac.

¹⁶ Qomi' sepi'iỹaqa'a da la'añaxac So Jesús, qaq qami' mashe qauauañiichigui. Qaq chegoqchigui da qarpi'iỹaxac da huo'omshe imauec da no'oita de'era ỹale.

¹⁷ Qaq aỹem saỹaten, qami' ỹaqaỹa't, da co'ollaq qami' qataq nam qarataxala'aipi qaualauache So Jesús, qalaq saishet da ỹoqta qauaỹaañita dam qauo'ocheetac.

¹⁸ Qalaxaye Ñim Lo'onatac 'Enauacna mashe ỹa'axat co'ollaxa de'era, chegoqchigui naqa'en so la'aqtaxanaxanecpi da que'eca Lca'aguishec, camaye ỹataqta huo'o qome da nque'eenaxac.

¹⁹ Qaq ỹoqo'oye qaualache' nagui naua qano'onataxacolli', nache qaualaqaiguet Ñim Lo'onatac 'Enauacna, yaqto' Ñimaye ỹapalaxa't naua qarasouaxashe'echilli'. Nache Ñimaye icoua'ai 'enauac nam sa ỹaỹamaxañi maye qauo'ocheetac, nache qami' ỹanema da qara'añaxaqui.

²⁰ Nache qami' qanamaxalo So Jesús maye Lca'aguishec Ñimaye, Som nale'ena co'ollaxa da ỹauotaique da qomi' namaxalo.

²¹ Qalaxaye So Jesucristo nagui iuen da ñaq neta'ague da piguem, nato' qom ivita ca na'a'q da Ñim Lo'onatac 'Enauacna naralaxat 'enauac na lo'onatacpi. Qaq 'era dam 'enapec Ñimaye co'ollaq ỹa'aqtaxanaxan som hua'au la'aqtaxanaxanecpi maye qui'itta.

²² Huo'o som 'oonolec so na'aqtaxanaxanecpi, qaq somaye nacheso so Moisés, som 'enapec co'ollaxa, 'eeta': «Ñim Lo'onatac 'Enauacna lca'aua'a qome ca 'oonolec na qarhuo' le'ecpi da ỹauo'o la'aqtaxanaxanec 'eeta'am aỹem. Qaq qami' qome qauo'oche 'enauac cam 'enapec camaye.

²³ Qaq ca sa ỹalaxaguet camaye, qalaq saishet da nache 'eetai' da ỹalectaigui na qarhuo' le'ecpi.»

²⁴ Cha'aye 'enauac som hua'au na'aqtaxanaxanecpi, chegoqchiguiña so Samuel qataq anac so laỹepi, nache 'enauac qaỹa'axatta'agueta ne'enaua na'axa'te maye souaqtaiguilo.

²⁵ Soua hua'au' vi'iye Ñim Lo'onatac 'Enauacna naỹamaxate' so hua'au qarta'ailpi, nache huo'o da ỹachaxanapecot somayepi. Qaq 'enauac nam ỹachaxanapecpi Ñimaye co'ollaxa ỹachegoxotchigui som hua'au la'aqtaxanaxanecpi. Qaq damaye nagui ỹataqta qami' ipactoto. Qaq 'era da ỹachaxanapecot Ñim Lo'onatac 'Enauacna so Abraham, som 'oonolec so hua'au qarta'alpi: «'Enauac na shiỹaxauapi ana 'alhua ỹaconeguet qome ca iqouagaxanaqtaic chegoqchigui ca 'oonolec na 'aỹa'alaqpi.»

²⁶ Qaq ỹoqo'oye Ñim Lo'onatac 'Enauacna co'ollaq qaltaq nca'alec naqa'en So Llalec Jesús, nache ỹa'auaxaachiyiñi da qami' namaxalo, da yaqto' qami' ỹanema ca no'on qoyecỹaxaqui, yaqto' ñi 'oonolec da qoñiita ishet da ỹaxanec ca sa ỹaỹamaxañi.