Hechos 17 - La'aqtaqa Ñim Lo'onatac 'Enauacna 2013

Dalemata na shiỹaxauapi ye Tesalónica

¹ So Pablo qataq so Silas queto'oto da llecỹaxa'c, taarelec ye nỹecpi ye Anfípolis qataq ye Apolonia ivitta'alo ye nỹecpi ye Tesalónica maye huo'o aso napaxaguenaxaqui na judiopi.

² Qaq maiche lataxac naxa so Pablo da saq ỹa'atai' da taua'a ana napaxaguenaxaqui na judiopi. Qaq ỹoqo'oye ivi't soua tres mataxaqui' da ỹe'eguelaqtaua'a aso napaxaguenaxaqui na judiopi maye lma' yi'iye. Itaxaỹaxaatac ana nere maye huetalec na la'aqtacpi Ñim Lo'onatac 'Enauacna,

³ nache do'ogoxona anamaye da ỹa'axattac da ca Lca'aguishec Ñim Lo'onatac 'Enauacna, iuen da ileu qataq nca'alec. Nache 'enapeco': –So Jesús maye qami' sa'axattapeguema, Somaye nacheso som Lca'aguishec Ñim Lo'onatac 'Enauacna.

⁴ Nache huo'o nam judiopi na da'amqaanataxan, nache queguelo soua Pablo qataq so Silas. Nataqa'en qalota na da'amqaanataxan na Grecia le'ecpi maye ỹauotec qataq ỹalaxaguet Ñim Lo'onatac 'Enauacna. Qataq qalota na 'alpi na da'amqaanataxan nam ỹataqta ỹo'oxoraipi.

⁵ Qalaxaye nataqa'en huo'o na judiopi nam saishet da da'amqaanataxan. Nache namayepi ỹataqta huo'o da lquiỹaxa soomaye, nache laỹona't nam shiỹaxauapi qauemaicpi maye qaica ca ỹo'ot, quetapeeguelo naua nqa'aico da inogoqchet. Nache nqo'ona ca lma' so Jasón da inoxottac, nmittaique so Pablo qataq so Silas da ỹauotaique da ỹaconeua'alo, nache ỹaneua'alo na shiỹaxauapi da yaqto' huo'o ca ỹo'ote'c sa ỹaỹamaxañi.

⁶ Qaq co'ollaq sa qaỹanatalo soomaye, nache qaỹauec so Jasón, qaỹauogoleeta. Qataq huo'oi soua lỹa't 'amqaanataxanaxaiqa da qaỹauegueua'alo som lta'alpi se'eso nỹecpi. Nache ỹa'alaqtagui somayepi, 'eeta': –So Pablo qataq so Silas 'enauac na pa'aiguelo da ỹo'ottrac da la'axa. Nagui qataq nvittra'a ne'ena souaqta'a.

⁷ Qaq dam Jasón, damaye ỹaconegueta, nache ỹaatraña ye lma'. Qaq 'enauac namayepi ỹataqta npa'aguene' da lamaxasoxonaxac ñim qarta'a maye neta'ague da Roma, cha'aye namayepi 'eetega da huo'o ca lỹa nta'a, camaye le'enaxato' da Jesús.

⁸ Qaq co'ollaq hua'axaỹa de'era so shiỹaxauapi qataq so nta'alpi, nache ỹataqta huo'o da lachetataic qataq sa ỹaỹaten ca 'eetec.

⁹ Qalaxaye so Jasón qataq soua lỹa't, co'ollaq ime da huo'o aso qaisheetenaxanaxaneque, nache qaisore'c.

So Pablo qataq so Silas huetra'a ye nỹecpi ye Berea

¹⁰ Qaq so ỹa'amaqtenpi So Jesús, nache ỹataqta sa ỹaỹaloxon da ỹama'q soua Pablo qataq so Silas da nqo'oora naqa'e'n ye nỹecpi ye Berea se'eso pe. Qaq co'ollaq ivilye', nache nqo'ooreua'a aso napaxaguenaxaqui na judiopi.

¹¹ Qaq se'eso judiopi maye hueta'a yemaye ỹataqta soxoraicpi, saishet da 'ena'am nam netaña ye Tesalónica. Co'ollaq na'axaỹaxana da no'on na'axaỹaxac maye na'aqtaguec So Jesús, nache ỹataqta lta'araic da ntonaxac. Ỹoqo'oye 'enauaque naua na'axa'te itaxaỹaxaatac ana nere maye huetalec na la'aqtacpi Ñim Lo'onatac 'Enauacna da huotaique da ỹaỹaten da ỹoqta 'eesa de'era qaỹa'axattac.

¹² Huaña, nache ỹataqta qalota se'eso judiopi da ỹa'amaqten So Jesús, qataq nataqa'en qalota nam Grecia le'ecpi na da'amqaanataxan ỹalleppi qataq nam 'alpi maye ỹo'oxoraipi yi'iye nỹecpi.

¹³ Qalaxaye na judiopi maye sa da'amqaanataxan maye lma' ye Tesalónica, co'ollaq la'axaỹaxac so Pablo da ỹa'axattac da la'aqtac Ñim Lo'onatac 'Enauacna hueta'a ye nỹecpi ye Berea, nache nqo'ona yemaye, nache ỹo'ot da la'axa naqa'en na shiỹaxauapi da npa'aguene' so Pablo.

¹⁴ Qalaxaye so shiỹaxauapi maye ỹa'amaqten So Jesús sa ỹaỹaloxon da ỹamaq so Pablo da yaqto' taxaama so loigue aso auaxai. Qaq nda'a't so Silas qataq so Timoteo no'oiraña ye Berea.

¹⁵ Qaq soua nnaictagueto so Pablo, soomaye ivittra'ague da Atenas. Qaq co'ollaq ime, nache ñe'eguela'q, nache nachetrac da la'aqtac somaye da 'enapegalo soua Silas qataq so Timoteo da sa naỹaloxo'n da je'c da nqo'oora somaye.

So Pablo hueta'a ye nỹecpi ye Atenas

¹⁶ Qaq so Pablo co'ollaq hueta'a ye nỹecpi ye Atenas da iuattrapigui so Silas qataq so Timoteo, nache ỹataqta qaica ca lama' souaxat da imeteetac se'eso nỹecpi da ỹataqta nlaqchigui na ne'enaqtacpi maye qanatameetacot.

¹⁷ Qaq ỹoqo'oye nqo'oneua'a aca napaxaguenaxaqui na judiopi, nache na'aqtaxaatague' na judiopi qataq nam saq judiopi maye ỹo'oxoreetac Ñim Lo'onatac 'Enauacna. Qataq 'enauaque naua na'axa'te da ỹe'eguelaqtaua'a na menaqa'pi, nache na'aqtaxaatague' na hueta'a namayepi.

¹⁸ Qaq huo'o nam ỹaanaxanaxaicpi maye ỹa'amaqten qataq 'eetega, dam ỹataqta huo'o naq naigui de'era achaalataxac, nachera da namaxayec. Qataq huo'o so laỹepi ỹaanaxanaxaicpi da ỹapaxagueetac na shiỹaxauapi da nllañi da lo'ocỹaxac da yaqto' saishet da ỹo'ot ca qauem. Nache namayepi huo'o na 'eeta': –¿Negue't da qomi' ỹa'axattapeguema dam da' ỹale, ye ỹapactec da ltaxaỹaxac? Qataq huo'o na 'eeta': –Damaye 'eeta'am da ỹa'axattapeguec cam lỹa 'añaxaic. Qaq 'eetec de'era somayepi, cha'aye so Pablo ỹa'axattac dam no'on na'axaỹaxac maye na'aqtaguec So Jesús qataq da 'eetec da qaltaq nca'alec ca shiỹaxaua.

¹⁹ Ime, nache so Pablo qaỹauega ca naponqa' le'enaxat Areópago, cam nache 'eetai' naxa da huaña da huo'o na qaitaxaỹapigui. Nache qainattac, qoỹeeta': –¿Peta'a ishet da qomi' huo'o ca saỹaanaq dam dalaxaic napaxaguenataxanaxac maye 'aua'axattac?

²⁰ Cha'aye dam 'aua'axattac, damaye ỹataqta yeualaqa'a, qaq sauoqtaique da saỹaanaq ca llec 'enauac damaye.

²¹ Cha'aye 'enauac nam netaña na Atenas qataq 'enauac nam chegaqauecpi ỹataqta qaica ca lỹa na'aqtaxangui, nachaqrata da na'aqtaxaatapigui dam dalaxaic maye qaỹa'axattac.

²² Nache so Pablo nachaangui na laiñi som shiỹaxauapi maye hueta'a se'eso Areópago. Nache 'enapeco': –Qami' ỹalleppi maye qarmaye na Atenas, aỹem sela'a da 'enauac da qoñiita ỹataqta qami' 'amqaanataxanaxaicpi.

²³ Cha'aye aỹem naxa da secoleetac na qoviita'a, nache semeteetac 'enauac nam nqui'ipi maye qanatamñeetacot. Nache huo'o ye selalec atamnaqa' qoỹettañi so na'aqtac, 'eeta': «Atamnaqa' da qanatamnot cam saishet da qaỹauatton.» Qaq Ñi'iñi Lo'onatac 'Enauacna maye qanatamñeetacot qalaxaye sa qauauattoñi, nacheñi nagui Ñim qami' sa'axatema.

²⁴ Ñim Lo'onatac 'Enauacna maye lo'onata ana 'alhua qataq 'enauac nam huetalecna. Ñimaye nacheñi Ñim lalamaxat na piguem qataq ana 'alhua. Ñimaye saishet da netaigui ca atamnaxaqui maye choche lo'onatac cam choche shiỹaxaua.

²⁵ Qataq saishet da iuen ca ltaunaxanaxac ca choche shiỹaxaua. Cha'aye Ñimaye nacheñi Ñim chegoqo'ot 'enauac da qarca'alaxa, qataq naua qara'a'che, qataq 'enauac nam ishet da iuen ca shiỹaxaua.

²⁶ Ñimaye ỹachegoxotchigui co'ollaxa so 'oonolec ỹale da ỹo'ot 'enauac na ỹotta'a't shiỹaxauapi, da yaqto' namayepi naleguete naua 'aleu'. Nache ỹauo'oi naua laloqo'ote namayepi, qataq ỹa'a'n naua lma'ate,

²⁷ da yaqto' namayepi ishet da nmitaique Ñimaye, na'aictaxa da huo'otaq 'eeta'am da choche ipottapecra' da nmittaique. Qamaq Ñimaye saishet da iỹotaique naqa'en 'enauac da shenaqta.

²⁸ Cha'aye Ñim Lo'onatac 'Enauacna nacheñi Ñim huo'omshe ñeca'alaqtauec, qataq seraqtapigui', qataq ñachaataqtac. Qaq damaye nataqa'en nache la'aqtac som ỹaanaxanaxaicpi da qoñiita, 'eeta': «Qomi' maiche qomi' llalaqpi Ñim Lo'onatac 'Enauacna.»

²⁹ Ỹoqo'oye nagui da ỹoqta 'en da qomi' llalaqpi Ñim Lo'onatac 'Enauacna, nache saishet da 'eeta'am ñaqa'enaq Ñimaye ca choche ne'enaqtac nqui'i maye chegaqaigui na oro, huo'otaq na plata qataq na coma' maye maiche lo'onatac ca shiỹaxaua ỹachegoxotchigui ca maiche lhuennataxac.

³⁰ Qaq Ñim Lo'onatac 'Enauacna saishet co'ollaxa da iloguilo naua ne'enaxaco na shiỹaxauapi soua hua'au' vi'iye. Qalaxaye nagui Ñimaye 'enapega na shiỹaxauapi maye netaleguete naua ỹotta'a't 'aleu', da yaqto' ỹaxaare'c naua no'onataxaco.

³¹ Cha'aye Ñimaye mashe ỹauo'o ca 'oonolec na'a'q maye huetoigui da nmit 'enauac na lasouaxashetpi na shiỹaxauapi, ỹachegoxotchigui som 'oonolec ỹale maye Lca'aguishec. Qaq ỹoqta 'eesa da ỹo'ot de'era qome, ỹoqo'oye Ñimaye qaltaq nca'alec naqa'en co'ollaxa So Jesús.

³² Qaq co'ollaq qaỹa'axaỹa de'era 'eetec da So Jesús qaltaq nca'alec, nache huo'o na lashetac so Pablo. Qataq huo'o na laỹepi 'eeta': –No'on da ña'aqtaxanaxagui de'era que'eca lỹa na'a'q.

³³ Nache so Pablo ca'ai somayepi,

³⁴ qalaxaye huo'o na ỹa'amaqten So Jesús, nache ca'ategue so Pablo. Qaq se'eso da'amqaanataxanpi, nache ỹalectaigui so Dionisio qataq aso Dámaris. Qaq soomaye, nache laỹepi nam ltaxaỹaqa' so Areópago.