Hechos 16 - La'aqtaqa Ñim Lo'onatac 'Enauacna 2013

So Timoteo nnaicapegueto soua Pablo qataq so Silas

¹ So Pablo queto'ot da llecỹaxac ivitta'a ye nỹecpiolec le'enaxat Derbe qataq ye Listra. Qaq yemaye netaña so nsoq le'enaxat Timoteo maye ỹa'amaqteetac So Jesús. Aso late'e so Timoteo asomaye judío lashe ỹa'amaqteetac So Jesús, qaq so lta'a qalaxaye Grecia le'ec.

² Qaq so 'amqaanataxanaxaicpi maye netaña ye Listra qataq ye Iconio ỹataqta no'on naqa'en da na'aqtaguec so Timoteo.

³ Ỹoqo'oye so Pablo ỹauotaique da lỹatac so Timoteo de'era llecỹaxac. Qalaxaye ye 'enauac nam judiopi yi'iye 'alhua ỹaỹaten da so lta'a so Timoteo Griego le'ec, ỹoqo'oye so Pablo ỹauec somaye da yaqto' qaỹauo'o ca na'anaxashet na lo'oc.

⁴ Nache 'enauac nam nma'ate maye taarelec soomaye, da'aqtaxaatrapeguem dam lqataxa'c soua Jesús lamaxa'she qataq soua lỹa't nataxala'ate maye netraña ye Jerusalén.

⁵ Huaña, nache na 'amqaanataxanaxaicpi ỹataqta huo'o da la'añaxac da lpi'iỹaxac, nache naua na'axa'tesa'ache da ỹataqta nquictauec ye lcata na da'amqaanataxan.

Da lauanaqchec so Pablo co'ollaq ila'a so ỹale naña ye Macedonia

⁶ So Pablo qataq soua lỹa't huotraique da ỹa'axa't da la'aqtac Ñim Lo'onatac 'Enauacna co'ollaq huaña ye 'alhua Asia, qalaxaye So Saqcha'a Na'añaxac Qui'itta sa ỹashenema soomaye. Qaq ỹoqo'oye soomaye napactralec ye 'alhua Frigia qataq ye Galacia,

⁷ choche ivittra'a ca loga't se'eso 'alhua maye nalotta ye 'alhua Misia. Huaña, nache nshetraique da nqo'oora ye 'alhua le'enaxat Bitinia, qalaxaye So Saqcha'a La'añaxac So Jesús nataqa'en saishet da ỹashenema soomaye da nqo'oora.

⁸ Nache soomaye ỹa'axasoxoorelec ye 'alhua Misia, nache nacheyiña ye ñegaxasom le'enaxat Troas.

⁹ Qaq huaña yemaye, nache so Pablo huo'o so lauanaqchec se'eso pe. Iloto'o' so ỹale maye naña ye 'alhua Macedonia. Somaye nachattañi, nache nachoxoreetacot somaye, 'eeta': «Ña 'ananaitactaxa na Macedonia, nache qomi' 'autaua'n.»

¹⁰ Qaq co'ollaq choche huo'o da lauanaqchec so Pablo, nache qomi' ñaỹamaxataq da saxatague da Macedonia. Cha'aye ỹoqta da 'eesa da nacheñi Ñim Lo'onatac 'Enauacna, Ñim qomi' nỹaxaategalo, da yaqto' sa'aqtaxanaxam camayepi dam no'on na'axaỹaxac.

So Pablo qataq so Silas huetra'a ye Filipos

¹¹ Nache senotaxaua'a aso notaxaqui maye quiguingui na 'etaxat, sachegoxosoqchiguiña ye Troas, salamaxataqchigui añi ỹaqa'ata 'alhuole le'enaxat da Samotracia. Qaq so lỹa na'a'q nache ñeqo'onaqaama ye ñegaxasom le'enaxat Neápolis,

¹² nache sachegoxosoqchiguiña yemaye da ñeqo'onaxa ye nỹecpi ye Filipos. Qaq yi'iye nỹecpi nacheye ye ỹactec da la'amaqchec yi'iye 'alhua Macedonia, nataqa'en huo'o na hueta'a yemaye na chegaqa'a ye nỹecpi ye Roma. Nache huo'oi soua na'axa'te da souaqta'a yemaye.

¹³ Qaq huo'o so na'a'q mataxaqui, nache saxaueegue da laỹe ye nỹecpi da ñeqo'onaqaama so loigue aso tala, yem sepetaqa'a da laponqa' na judiopi da ỹo'ot da nqouagaxaunaxac. Huaña, nache ñeso'onaqtañi, nache sa'axataqtapeguem da na'aqtac na 'alpi maye lapoota'a't.

¹⁴ Qaq huo'o aso 'oonole 'alo le'enaxat Lidia, asomaye lma' co'ollaxa ye nỹecpi le'enaxat Tiatira, asomaye imeetac ana ỹataqta no'on npoto, naueralec na ltogaxa, qataq ỹa'amaqteetac Ñim Lo'onatac 'Enauacna. Nache Ñim Qarataxala' ỹami' asomaye da ỹataqta na'axaỹaxaachigui da la'aqtaxanaxac so Pablo.

¹⁵ Ime, nache asomaye qanachelaxan, nataqa'en 'enauac so llalaqpi. Qaq co'ollaq ime, nache ỹataqta qomi' ỹe'eguelaqto'oto da souaqa'a ca lma', nache qomi' seca'ataxague asomaye.

¹⁶ Qaq can qomi' qaltaq ñeqo'onaxauga som qouagaxaunaqa', nache ñatenaqa'aguet aso qa'añole nlata maye huo'o so netaigui saqcha'a na'añaxac leguemaxaic maye ishet da ilaviigui ca lỹa. Qaq asomaye ỹataqta qalota naqa'en añi laueque so na'aco'pi, choche qaỹauegaxaatapigui da ilaviigui ca lỹa.

¹⁷ Qaq asa'aso qa'añole, nache ca'attapiguiñi' so Pablo, nataqa'en qomi'. Nache ỹa'alaqtai', 'eeta': –Ne'enaua ỹale't, naamaye do'onataxaatacoto Ñim Lo'onatac 'Enauacna maye 'amaqtaqaic. Qaq naamaye qami' da'aqtaxaateguema da Ñim Lo'onatac 'Enauacna ishet da qami' nca'alaxatre'c.

¹⁸ Qaq ỹataqta huo'oi soua na'axa'te da nache 'eeta'ac de'era. Qaq choche ivitta'a da ỹataqta sa ỹaỹamaxaren so Pablo. Nache somaye ỹe'eguelaxaguet asomaye, nache 'enapego' som saqcha'a na'añaxac leguemaxaic maye netaigui asomaye, 'eeta': –'Am serolec da le'enaxat So Jesucristo da qoca'ai ana'ana qa'añole. Nache som saqcha'a na'añaxac ca'ai asomaye.

¹⁹ Qalaxaye so na'aco'pi aso qa'añole co'ollaq ila'a da mashe qaica som dauegaxaatapigui no'onataxac asomaye, nache qaỹaconeua'alo so Pablo qataq so Silas, nache qaỹauegueua'alo ca nlagaqa' maye netangui na laiñi so nỹecpi da yaqto' qaỹataxanoto soua nta'al maye ilotague' se'eso nỹecpi.

²⁰ Huaña yemaye, nache qaỹa'aqtaxaateguemo' soua nmi't na nasouaxashetpi, qoỹeeta': –Ne'enaua judío lashe', naamaye ỹataqta ỹo'otta'ape da la'axa ne'ena souaqta'a,

²¹ qataq dapaxaguenataxaatrapeguec da nataxac maye qomi' saishet da saconaxaguet da so'otaq, cha'aye qomi' Roma lashe'.

²² Nache na shiỹaxauapi ỹataqta npa'aguenalo soomaye, nache soua nmi't na nasouaxashet, damaxasoxooleguete da qanqa't naua alogo soomaye, nache qaiuaxa'n, qairota'alo na nhuaxanaxanaxat qo'oipaq.

²³ Qaq co'ollaq mashe qalota da nhuaxanague'c, nache qaỹamaxaroigui aca ncoñetaxanaxaqui. Nache qoỹenapega som ilotague' aso ncoñetaxanaxaqui da ỹataqta ilo'oguelo.

²⁴ Nache se'eso ilotague' aso ncoñetaxanaxaqui co'ollaq huo'o da na'aqtac, nache ỹanaua'alo ca ỹataqta pa'auo aso ncoñetaxanaxaqui soomaye, nache ỹanaguilo naua lapia'ate ca ncoñetaxaqui' 'epaq.

²⁵ Qalaxaye co'ollaq mashe laiñi so pe, nache so Pablo qataq so Silas, soomaye nqouagaxaueeta'ape qataq do'onaxaata'ape, ỹo'oxoreetrac Ñim Lo'onatac 'Enauacna. Qaq som laỹepi ncoñeteguishecpi na'axaỹaxaategalo soomaye.

²⁶ Nache nque'elaxatta da huo'o so nacholaxanaxa, nache ỹataqta ỹacholaxanapec aso ncoñetaxanaxaqui, ivira'a naqa'en na pa'aguiñi. Huaña, nache maiche nauatoiguilo naua laso'omi, qataq maiche huesore'c naua lque'ete so ncoñeteguishecpi.

²⁷ Nache som ilotague' aso ncoñetaxanaxaqui nlouec. Qaq co'ollaq ila'a da nauattaigui 'enauac nam lasompi aso ncoñetaxanaxaqui, nache somaye nqatsheguem so lainec da huotaique da maiche nalaala't, cha'aye ipi'itaxano' da so ncoñeteguishecpi no'otauec.

²⁸ Qalaxaye so Pablo ỹa'alaxalec somaye, 'eeta': –Saishet da maiche 'analaala't, cha'aye qomi' 'enauac ñaloqta't.

²⁹ Nache som ilotague' aso ncoñetaxanaxaqui iỹaxanaique aso ncoỹaraxanaxaqui, nache ỹataqta nqalgoqta da taua'a so pa'auo, ỹataqta iviloxolaqchet da lcolanaxa. Nache ỹa'aroto naua l-llectel so Pablo qataq so Silas.

³⁰ Ime, nache nqatre'c soomaye, nache inatta'ape, 'eeta': –Ỹale't, ¿chaq hua'ague ca sheetec, da yaqto' ñeca'alec?

³¹ Nache soomaye 'ena'apo': –Qomye 'aua'amaqten So Qarataxala' Jesús, yaqto' 'anca'alec, qataq 'enauac nam hueta'a ye 'arma'.

³² Nache da'aqtaxaatrapeguem somaye da la'aqtac Ñim Lo'onatac 'Enauacna qataq 'enauac som netaña so lma'.

³³ Qaq nacheso se'eso pe da so ilotague' aso ncoñetaxanaxaqui iỹota'ape naua nhuaxanaqa soomaye. Ime, nache somaye qataq 'enauac som netañapi ye lma' qanachelaxan.

³⁴ Qaq co'ollaq ime, nache ỹauegueua'alo soomaye ca lma', nache iquia'axaata'ape. Nache somaye nataqa'en so llalaqpi ỹataqta machiguiñi, souaxat da ỹa'amaqten Ñim Lo'onatac 'Enauacna.

³⁵ Qaq so nte'etom so lỹa na'a'q, nache soua nmi't na nasouaxashet ỹamaxalo soua huataxanaq lashe', som ilotague' aso ncoñetaxanaxaqui da yaqto' 'enapega da isore'c soomaye.

³⁶ Nache so ncoñetaxanaxaqui lo'o 'enapego' so Pablo, 'eeta': –Huo'o da la'aqta'c soua nmit na nasouaxashet, da yaqto' qami' sesore'c. Qaq ỹoqo'oye nagui qami' ishet da qaunoxoñiiuec, nachaqrata da qaulaquiitapiguiñi.

³⁷ Qalaxaye so Pablo 'enapegalo' soua huataxanaq lashe', 'eeta': –Qomi' maiche qomi' Roma lashe'. Qalaq soua nmit na nasouaxashetpi qomi' damaxasoxooleguete da qomi' qaiuaxa'n, 'enauac qomi' qaỹauaachiguilo, qamaq saxanaxa da qaỹaỹaten ca qarasouaxashet. Qataq qomi' qaỹamaxaiguilo ana ncoñetaxanaxaqui, qaq ¿nagui, qalaq qansheetaico' da choche qomi' qaỹo'oxochiitrañi da qomi' qausoire'c? ¡'A'i, saishet! No'on da npacai' caamaye, da yaqto' qomi' nqatre'c.

³⁸ Nache soua huataxanaq lashe' ỹa'axatema soua nmit na nasouaxashet da la'aqta'c soomaye. Nache co'ollaq ỹaỹaten de'era soua nmit na nasouaxashet, nache ỹataqta ñi'i', cha'aye ỹaỹaten da Roma lashe' soomaye.

³⁹ Nache soomaye anac, nache nmaatacoto so Pablo qataq so Silas. Ime, nache nqatre'c soomaye, nache nachoxoreetacoto, da yaqto' soomaye quera'ai ye nỹecpi.

⁴⁰ Nache so Pablo qataq so Silas co'ollaq quera'ai aso ncoñetaxanaxaqui, nache nqo'ooreuga ca lma' aso Lidia. Qaq co'ollaq ima't da nauaneto na nqaỹañecpi qataq da ỹa'añaqchettrac, nache soomaye je'c.