Hechos 15 - La'aqtaqa Ñim Lo'onatac 'Enauacna 2013

So ntaxaỹaxac huaña ye Jerusalén

¹ Qaq se'esoua na'axa'te, nache huo'oi soua nvilye' ỹale't, chegoqra'ague da Judea da nvilda ye Antioquía. Nache soomaye ỹapaxagueetrapeguec na 'amqaanataxanaxaicpi da ca nshetaique da qanca'alaxatec, qalaq camaye iuen da qaỹauo'o ca na'anaxashet na lo'oc, cha'aye damaye, nache lamaxasoxonaxac so Moisés.

² Nache so Pablo qataq so Bernabé sa ỹaỹamaxare'n de'era, qaq ỹoqo'oye ncotategueto soomaye. Nache so 'amqaanataxanaxaicpi maye lma' ye Antioquía 'enapegalo soua Pablo qataq so Bernabé da taregue da Jerusalén da nqo'oneua'alo soua namaxa'she qataq som lataxala'pi so 'amqaanataxanaxaicpi da yaqto' ỹaỹamaxaayiñi de'era qancotatapigui. Nache so Pablo qataq so Bernabé je'c nnaicapegueto soua lỹa't 'amqaanataxanaxaiqa.

³ Qaq da llecỹaxa'c soomaye, nache tatrelec ye 'alhua Fenicia qataq ye 'alhua Samaria. Nache da'aqtaxaatrapeguem na 'amqaanataxanaxaicpi judiopi da qalota nam saq judiopi da ỹalat da togoshec la'amqaanataxanaxac, nache quegue Ñim Lo'onatac 'Enauacna. Qaq co'ollaq hua'aqchigui de'era nam judiopi maye ỹa'amaqteetac So Jesús, nache ỹataqta qalota da ntonaxac.

⁴ Nache so Pablo qataq so Bernabé co'ollaq ivildeua'a ye Jerusalén, nache na 'amqaanataxanaxaicpi qataq soua Jesús lamaxa'she, qataq soua lataxala'ate na 'amqaanataxanaxaicpi qochetegueto soomaye. Nache so Pablo qataq so Bernabé ỹa'axattrac 'enauac nam ỹo'otpi Ñim Lo'onatac 'Enauacna da ỹachegoxotchiguilo soomaye.

⁵ Qalaxaye huo'oi soua ỹalectrauo na fariseopi maye nataqa'en ỹa'amaqteetrac So Jesús, soomaye nachaayiñi, nache 'ena'apo': –Nam 'amqaanataxanaxaicpi maye saishet da judiopi, namayepi iuen da shenaqapega da ỹalaxalec na namaxasoxonaxacpi maye chegoqo'ot so Moisés qataq ỹauo'o ca na'anaxashet na lo'oc.

⁶ Nache soua Jesús lamaxa'she qataq soua lỹa't nataxala'ate ỹauo'oi so ltaxaỹaxa'c, da yaqto' qailaique ca lataxac de'era.

⁷ Qaq co'ollaq mashe qaỹoqtegue da ntaxaỹaxac, nache so Pedro nachaañi, nache 'enapeco': –Qami' ỹaqaỹa't, qami' qauaỹaañi da Ñim Lo'onatac 'Enauacna aỹem ỹaconeua'a co'ollaxa, aỹem ỹachegoxottoigui da qoñiita, da yaqto' aỹem sa'axatem da no'on na'axaỹaxac na saishet da judiopi, da yaqto' da'amqaanataxan.

⁸ Qaq Ñim Lo'onatac 'Enauacna maye maiche ỹauatton da qarhuennataxac ỹachaxanalo qomi' da nataqa'en na saishet da judiopi da ỹauotec, nache nataqa'en ỹanem So Saqcha'a Na'añaxac Qui'itta, 'eeta'ama qomi'.

⁹ Ñim Lo'onatac 'Enauacna saishet da qomi' lca'ataguilo, da yaqto' iỹotauga namayepi, cha'aye namayepi nataqa'en qaỹapalaxat na lasouaxashetpi co'ollaq ỹa'amaqten So Jesús.

¹⁰ Qaq ỹoqo'oye nagui qami', ¿ta'ainco' ye qauauoitaique da qauataiỹa'aguet nam ỹo'otpi Ñim Lo'onatac 'Enauacna? Qataq ¿ta'ainco' da qauauoitaique da qoñiỹapega nam quetague' So Jesús da ỹalaxalec na namaxasoxonaxacpi, ye so hua'au qarta'alpi qataq qomi' sa seshetaq da salaxasoxolec?

¹¹ Chaqrata da qomi' sa'amaqtenaq da ñeca'alaxauec, qalaxaye chegoqchigui da lqouagaxanaqtaic So Qarataxala' Jesús, qaq nache shenaqta'am namayepi.

¹² Huaña, nache 'enauac somayepi ỹe'emaqtom. Ime, nache qana'axaỹaxana so Bernabé qataq so Pablo da ỹa'axattrac na na'anecpi qataq nam sa qaỹauanapega da ỹo'ot Ñim Lo'onatac 'Enauacna, ỹachegoxotchiguilo soomaye da huaigui naqa'en nam saishet da judiopi.

¹³ Qaq co'ollaq ima't da la'aqtaxanaxa'c, nache so Santiago maye lqaỹa So Jesús detaqa, 'eeta': –Qami' ỹaqaỹa't, ñaq qana'axaỹaxañiỹa da ỹa'aqtac, 'eeta':

¹⁴ Ñi Simón Pedro qomi' da'aqtaxaatapeguema da 'eetec Ñim Lo'onatac 'Enauacna co'ollaq cheta'ague da nqouaguec nam saishet da judiopi, nache lca'aua'a namayepi da yaqto' ỹalecnoigui na lalamaxatpi.

¹⁵ Qaq de'era ỹataqta nateeteguet dam la'aqtaxanaxac som la'aqtaxanaxanecpi Ñim Lo'onatac 'Enauacna maye nanettañi, 'eeta':

¹⁶ Qom ime de'era, nache Aỹem ñe'eguelaq, da yaqto' qaltaq ñauaxaỹaxaasheguem ñi lauo' so David maye mashe nlaguiñi; nache qaltaq ño'oxoosheguem cam ñaq huo'o,

¹⁷ yaqto' 'enauac nam laỹepi shiỹaxauapi Aỹem nmitaique maye Aỹem Nataxala', qataq 'enauac nam ỹotta'a't shiỹaxauapi maye seỹaxana da sauotaique ỹalamaxatpi.

¹⁸ 'Era da la'aqtac Ñim Nataxala' maye ỹa'axatta'a co'ollaxa de'era soua hua'au' vi'iye.

¹⁹ Qaq nam saishet da judiopi maye ỹasat da quegue Ñim Lo'onatac 'Enauacna. Namayepi saishet qome da shenaqapega da ỹalaxalec na namaxasoxonaxacpi maye sa qaiuen.

²⁰ Nachaqrata da qomi' sauoqo'o aca qorere da taỹa'a namayepi da shenaqapega da ỹaxaañi da chec na nallec maye mashe qoỹanot na ne'enaqtacpi maye qanatameetacotpi, qataq saishet da huo'o ca ncachetague' aca saishet da lhua, qataq saishet da chec na lapat ca choche ichegueuo na lqosot, huo'otaq ca 'ogaxaic maye sa qaicolde'c naua ltago'q qataq saishet da chec na ntago'q.

²¹ Cha'aye dam chegoqta'ague soua hua'au' vi'iye, huo'o co'ollaxa na shiỹaxauapi maye ỹa'axatta'ape naua namaxasoxonaxaco maye chegoqo'oto so Moisés qataq itaxaỹaxaata'ape ye na'a'q mataxaqui da huaigui ana napaxaguenaxaqui na judiopi.

²² Nache soua Jesús lamaxa'she qataq soua lỹa't nataxala'ate qataq 'enauac na 'amqaanataxanaxaicpi, huo'o da lhuennataxa da qaỹauo'oi caua qaỹaconeua'alo somayepi, nache qaỹamaxaregue da Antioquía da nnaicapegueto qanqa'en so Pablo qataq so Bernabé. Nache qaỹaconeua'a so Judas, da lỹa le'enaxat Barsabás, qataq so Silas. Soomaye maiche lataxala'ate nam nqaỹañecpi.

²³ Nache soomaye ỹache' qanqa'e'n aso nere maye huetalec da na'aqtac, 'eeta': «Qomi' Jesús lamaxa'she qataq naua qarỹa't lataxala'ate na 'amqaanataxanaxaicpi maye hueta'a na nỹecpi na Jerusalén, qomi' samaxasaxa da qarquinaxanaxac na qarqaỹañicpi maye saishet da judiopi, maye netaña ye Antioquía qataq ye 'alhua Siria qataq ye Cilicia.

²⁴ Cha'aye qomi' qara'axaỹaxac da huo'o na shiỹaxauapi chegoqchiguiña ne'ena, da saishet da qaramaxashecpi da qami' nqo'onalo da qami' sa ỹalemaxa't. Qaq naua la'aqtaxanaxaco namayepi ỹo'ot da sa qauaỹaañi ca qoñiitec.

²⁵ Qaq ỹoqo'oye 'enauac da shenaqta, saỹamaxarenaqta da sauoqo'oi ne'enaua qarqaỹa't, da yaqto' qami' nqo'onalo, nache lỹata'ape naua qanauochaxau' qarqaỹa't Bernabé qataq Pablo,

²⁶ nam qarqaỹa't maye ỹataqta nañaareguet 'enauac na lchecỹaxac, souaxat So Qarataxala' Jesucristo.

²⁷ Qaq nagui qami' samaxasaxalo na Judas qataq na Silas. Qaq naamaye ỹataqta qami' da'aqtaxaatema qome, 'enauac de'era ñasataxagui maye 'enauac da ñaỹamaxannaqchigui.

²⁸ Cha'aye So Saqcha'a Na'añaxac Qui'itta ỹaỹamaxareeta damaye, qataq qomi', da saishet da huo'o ca lỹa qami' samaxasoxoleguete, nachaqrata da iuen da qauaỹaañi de'era maye 'eeta':

²⁹ Saishet qome da qolliqui na lapat cam mashe qoỹanot na ne'enaqtacpi maye qanatameetacotpi, qataq saishet da qolliqui na ntago'q, nache 'eeta'am na lapat na shiguiỹac maye choche ichegueuo na lqosot, qataq saishet da huo'o ca ncachetague' aca sa lhua. Qaq qom qaupaquiitelec da qauo'oche' ne'enaua, nache ỹo'ot da ỹataqta qauamaichiguiñi. Qauacoñiiguet qome da qarquinaxanaxac.»

³⁰ Qaq so Bernabé, Pablo, Judas qataq so Silas co'ollaq ime da qaỹaconeua'alo da qaỹama'q, nache je'c, taregue da Antioquía. Qaq co'ollaq mashe ivilye', nache lapona't na 'amqaanataxanaxaicpi, nache ỹaareuo aso nere.

³¹ Nache so 'amqaanataxanaxaicpi co'ollaq itaxaỹaxaatac aso nere, nache ỹataqta machiguiñi souaxat da na'añaqchetaguec.

³² Cha'aye som Judas qataq so Silas, soomaye nataqa'en la'aqtaxanaxanaqa Ñim Lo'onatac 'Enauacna. Nache soomaye ỹa'añaqche't qataq huaqattrega so nqaỹañecpi maye ỹa'amaqten So Jesús, ỹataqta lta'araic da lqataxa'c.

³³ Qaq co'ollaq mashe qaỹata'aguelo soua na'axa'te da hueta'aguet so 'amqaanataxanaxaicpi ye Antioquía soua Judas qataq so Silas, nache ncoyegueetegueto somayepi da ỹe'eguela'q. Nache qoỹanema da ỹataqta ỹachetre'c da l-lagaxaye'c da ỹe'eguelaxalo soua Jesús lamaxa'she.

³⁴ Qalaxaye so Silas huo'o da lhuennataxac da no'onañi.

³⁵ Nataqa'en so Pablo qataq so Bernabé, soomaye no'oiraña ye Antioquía. Nache soomaye, nataqa'en huo'o na qalota laỹepi queto'oto da lapaxaguenataxanaxa'c qataq da ỹa'axattrac da no'on na'axaỹaxac maye na'aqtaguec So Qarataxala' Jesucristo.

So Pablo qaltaq ỹe'eguelaxalec da ỹo'ot so llecỹaxac da ỹa'axat da na'aqtac

³⁶ Qaq huo'o so na'a'q, nache so Pablo 'enapego' so Bernabé, 'eeta': –Qomi' iuen da qaltaq ñamaxasoqtega 'enauac na qarqaỹañicpi maye neta'alo naua lta'araicpi nỹecpi maye souaqta'alo co'ollaq da sa'axataqtac da no'on na'axaỹaxac, da yaqto' saỹaanaq da saqca ca da nam quetague' So Jesús.

³⁷ Nache so Bernabé ỹauotaique da nnaictagueto so Juan Marcos.

³⁸ Qalaxaye so Pablo sa ỹaỹamaxaren da ỹoltaq ỹauec somaye, cha'aye mashe no'onaxatchiguilo co'ollaq huaña ye Panfilia, cha'aye saishet da ỹaỹamaxaren da queto'ot da lo'onataxanaxau'.

³⁹ Nache nqallegottrapigui somaye, choche ivitta'a da nỹoteca'ache soomaye da llecỹaxa'c. Nache so Bernabé ỹauec so Marcos huenotreua'a aso notaxaqui maye quiguingui na 'etaxat, da taita añi ỹaqa'ata 'alhuole le'enaxat da Chipre.

⁴⁰ Qaq so Pablo qalaxaye ỹaconeua'a so Silas da nnaicapegue'. Qaq co'ollaq, ime nache so 'amqaanataxanaxaicpi ye Antioquía ncoyegueneto da yaqto' ỹama'q qataq nachoxoreetacot Ñim Lo'onatac 'Enauacna da yaqto' Ñimaye saishet da ỹaxanec da lauoche soomaye qataq ntela'alo. Ime, nache so Pablo qataq so Silas ca'aisalo yemaye.

⁴¹ Nache taaleguete ye 'alhua Siria qataq ye Cilicia, nache ỹataqta ỹa'añaqchettac na 'amqaanataxanaxaicpi da nache queto'ot da naquitaxac So Qarataxala'.