Hebreos 13 - La'aqtaqa Ñim Lo'onatac 'Enauacna 2013

Da lataxac ca quetague' So Cristo

¹ Saishet da ỹaxanec ñi 'oonolec da qoñiita da ỹauotec ca lỹa, cha'aye nachera da lataxac nam quetague' So Cristo.

² Qataq saishet da qaucoviỹa'ai da ỹataqta qauloỹeeguet na shiỹaxauapi maye nvireua'a ca qarmaye. Cha'aye damaye nachera da chegoqchigui da huo'o co'ollaxa so shiỹaxauapi saq noma da ỹaconeguet so namaxashec piguem le'ecpi.

³ Qataq qoviỹapegue' nam qarqaỹañicpi maye qaicoñettai' qataq nam sa qaiyacnapec. Da qarhuennataqai qome 'eeta'am qanqa'eñi da nataqa'en qoviitaigui damaye.

⁴ Qataq qami' iuen da ỹataqta qanchelỹa'a da qarhuaỹaxaqui qataq ỹataqta lta'araic qanqa'eñi da naigui. Caua namoxou' iuen da ỹataqta nde'n, cha'aye Ñim Lo'onatac 'Enauacna ỹauo'o qome da nhuaxanaguec na quisheguetaxaicpi qataq nam sa iren da lhuaỹaxac.

⁵ Qataq saishet da ỹaguec da qarhuogoqoi da qanaviqui aca anom. Nachaqrata da qantoñiitapeguec cam qami' hueto'oto, cha'aye Ñim Lo'onatac 'Enauacna 'eeta' da la'aqtac maye nanettalec ana nere maye huetalec na la'aqtacpi Ñimaye: «Saishet da 'am seỹotec, qataq saishet da 'am salat.»

⁶ Qaq ỹoqo'oye seshetaq da she'eguelaxataqtalec qataq sauoqo'o da qanaquitaxac dam nanettalec ana nere maye huetalec na la'aqtacpi Ñim Lo'onatac 'Enauacna maye 'eeta': «Qaica ca she'etaique. Cha'aye qaica ca ishet da huo'o ca aỹem ỹo'otec qauem cha'aye Ñim Lo'onatac 'Enauacna aỹem itauaatac.»

⁷ Qataq qauennachiỹa'a som qarataxala'aipi maye qami' ỹa'axatema co'ollaxa da la'aqtac Ñim Lo'onatac 'Enauacna, cha'aye somayepi huetaigui da lta'araic lpi'iỹaxac Ñimaye. Qataq saishet da qaỹa'axañiiñi da qauennacheetega somayepi qataq qoquiigue da lataxac.

⁸ So Jesucristo saishet da naralaxat da lataxac: Somaye nache 'eetai'.

⁹ Qaq ỹoqo'oye saishet da qauqocheetega na napaxaguenataxanaxacpi maye sa qaỹauanapega, maye ỹataqta sa nateneguet dam qomi' ỹapaxagueneque So Jesucristo. Ỹactec da 'onaxaic da saconaxaguet da qara'añaxac maye nachera da lsoxoyec Ñim Lo'onatac 'Enauacna, qaq saishet da nachena na qalapaqtañipi maye ỹa'axat cam qanallec qataq cam saishet da qanallec, cha'aye damaye qaica ca ltaunaxanaxac.

¹⁰ Som ntaxaỹaxanaxanecpi da qaitaxaỹapegue' Ñim Lo'onatac 'Enauacna maye hueta'a co'ollaxa aso togoshe no'onaxanaxaqui da qaỹo'oxoren Ñimaye, somayepi saishet da qaỹashenem da chec nam huetalec añi qarca'atoxonaxalate.

¹¹ Som lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna, somaye iroua'a naua ltago'q na shiguiỹacpi aso togoshec no'onaxanaxaqui late'erai maye huaña da qaỹo'oxoren Ñimaye, da iỹaxanaua'a da qaỹapalaxat na nasouaxashetpi. Qalaxaye na lapat se'eso shiguiỹacpi maye qaỹalauat, qairoueegue da laỹe yem netaña na shiỹaxauapi, nache qaỹavigaxat.

¹² Qaq nache 'eetec nataqa'en So Jesús co'ollaq qaỹalauat qalaq huaña ye pa'auec ye nỹecpi ye Jerusalén, da yaqto' chegoqchiguilo naua ltago'q da Ñim Lo'onatac 'Enauacna ỹapalaxat na lasouaxashetpi na shiỹaxauapi maye lalamaxatpi.

¹³ Qaq ỹoqo'oye nataqa'en qomi' iuen da qarỹatec So Jesús da ñeuanaqaua'a de'era ne'enaguec maye qaỹo'otec co'ollaq qaiuaxaneguet so npe'enaxaqui.

¹⁴ Cha'aye ana souaqtalec 'alhua qaica ca qarma' da chochaq tatec, nachaqrata da seuataqta'aguet ca qarma' maye naỹa'acna.

¹⁵ Da qarachetaqtaxanaxat maye samiaxai' Ñim Lo'onatac 'Enauacna, nachera da qana'achecỹaxac maye chochaq tatec da sanaqtacot Ñimaye, chegoqchigui So Jesucristo cha'aye mashe sasataxaguet da nacheso so 'oonolec Qarataxala'.

¹⁶ Qataq saishet qome da qaucoviỹa'ai da qauo'oche ca ỹaỹamaqchiguiñi, qataq da qautauañi ca qarỹai maye huo'o da lhuenaxanaxa. Qaq 'ena nam nachetaqtaxanaxat maye ỹaỹamaxareeta Ñim Lo'onatac 'Enauacna.

¹⁷ Ỹataqta qaualaqaiguet na qarataxala'aipi maye ilotague' nam ỹa'amaqten So Jesús, cha'aye namayepi qaica ca nmataqa' da qami' ilotegueto, qataq namayepi ỹaỹateeta da Ñim Lo'onatac 'Enauacna ipataxalec da qami' ilo'oguelo. Qaq qami' iuen da qautauañi namayepi qataq qanpogoxoiñiỹapegue' da yaqto' saishet da qami' chegoqchiguilo ca qauem, yaqto' da lo'onataxanaxac namayepi ỹataqta ỹaỹamaqchiguiñi.

¹⁸ Qanqouagaxauñiitaleguete qomi'. Cha'aye qomi' saỹatenaqta da Ñim Lo'onatac 'Enauacna qaica ca sa ỹaỹamaxaren qarataxac, cha'aye qomi' ñepogoxoinaqtapegue' da 'enauac da qauaỹamaxayiñiita da qarataxac.

¹⁹ Qataq ỹataqta seuen ca qanqouagaxaunaxaqui, yaqto' seshet da saqaỹaloq da qami' ñamaqtegalo.

Da pa'atec nquinaxanaxac

^20-21 Ñim Lo'onatac 'Enauacna ỹo'otec So Qarataxala' Jesús da qaltaq ỹe'eguelaxalec da nca'alec. Qaq So Jesús qalaq 'eeta'am naqa'en da qomi' lalopi qagueta, qaq Somaye qalaq 'eeta'am ca ilotague' aca qaguetapi. Qataq chegoqchiguilo soua ltago'q maye huecolde'c co'ollaq qaỹalauat Somaye, da Ñim Lo'onatac 'Enauacna qomi' naỹamaxatto, qaq da naỹamaxataxac chochaq tatec. Qaq ỹoqo'oye seỹaxaatacot Ñim Lo'onatac 'Enauacna maye hueto'ot da nlagaxayec da qami' nalochiyiñi naqa'en qataq qami' huotaxanaqtaqaiqa. Qaq So Jesucristo qami' itaua'n da imauec da qaualaqaiguet Ñim Lo'onatac 'Enauacna. ¡Qaq So Jesucristo ỹataqta lta'araic da ño'oxonnataguec qataq chochaq tatec da 'enec! Aja', nache 'eetec.

²² Qami' ỹaqaỹa't, saq aloc de'era shiyiñi itaxaỹaxac maye qami' samaxalo da qami' sa'añaqche't. Da qautaxaỹaxañi qalaq qana'añaxacheeguet de'era ỹa'aqtaxanaxac.

²³ Sauotaique da qami' sa'aqtaxanema da ñi qarqaỹa Timoteo mashe qaisouec, qaq qom saqaỹaloq da aỹem nvita ñimaye, qaq sauec qome da qami' ñeqo'onaxalo.

²⁴ Sequiitac 'enauac nam qarataxala'aipi qataq 'enauac na qarqaỹañicpi maye lalamaxatpi Ñim Lo'onatac 'Enauacna. Qaq nam qarqaỹañicpi maye netaña ye 'alhua Italia nataqa'en qami' iquiita'ape.

²⁵ ¡Da iquiyaqteỹaxac ỹataqta lta'araic da lyaxa da Ñim Lo'onatac 'Enauacna qami' nlaxatchiguilo da lsoxoyec!