Génesis 37 - La'aqtaqa Ñim Lo'onatac 'Enauacna 2013

¹ Qaq so Jacob, nache no'onaña da netalec co'ollaxa ye 'alhua Canaán, yem hueta'a co'ollaxa so lta'a.

² Qaq 'era da na'aqtaguec soua llalqa so Jacob. So José co'ollaq ñaq nsoqolec, somaye mashe ivi' co'ollaxa soua diecisiete vi'iye da nachaalataxac, qaq ilotague' co'ollaxa aso qaguetapi, nnaictagueto soua lqaỹa't maye llalqa aso Bilá, qataq aso Zilpa, maye ỹaqaugalo lhua't so lta'a. Nache so José da'aqtaxaata'am naxa so lta'a da qauem lataxa'c soua lqaỹa't.

So José qataq soua lqaỹa't

³ Qaq so Israel ỹataqta ỹactec da lauotaxat so José, saq 'ena'ama soua lỹa't llalqa, cha'aye somaye ñiguiñi co'ollaq mashe ỹa'axaiquiolec so Israel. Qaq ỹoqo'oye somaye ỹauo'o so ỹataqta ỹotta'a't da lo'oxoỹaxac lapo' so José.

⁴ Qalaxaye soua lqaỹa't, co'ollaq nomalo da so lta'a ỹataqta lauotaxat somaye, saq 'ena'ama soomaye, nache ỹataqta nquiỹalo so José, ivitta'a da saishet da iqui'n.

⁵ Qaq huo'o so na'a'q, nache so José huo'o so lchoxonaxac, nache da'aqtaxanema soua lqaỹa't. Qalaxaye soomaye nquictec da lquiỹaqa' somaye.

⁶ Cha'aye so José 'enapeco': «Aỹem qana'axaỹaxañiỹa, qami' sa'aqtaxanema so ichoxonaxac.

⁷ Aỹem sechoxootega da 'enauaque qomi' souaqtauga so no'onaxa, so'otaqtac aso qoraqtapi na trigo. Qaq nque'elaxatta da aso ỹaqta nachaañi, nache ỹashequitcheguem, qaq soua qoraqtalli' coleesopa asomaye, nache soomaye naqto'oto aso ỹaqta.»

⁸ Qaq huaña nache soua lqaỹa't 'ena'apo': «¿Damaye naigui peta'a da 'am qarta'a qome, qataq qomi' 'auamaqta'ape?» Qaq huaña, nache qaltaq ỹactec da qanquiỹa, souaxat so lchoxonaxac, qataq da 'eetec da la'aqtaxanaxac.

⁹ Qaq co'ollaq qaỹata'ague, nache so José qaltaq huo'o so lỹa lchoxonaxac, qaq nataqa'en da'aqtaxanema soua lqaỹa't, nache 'eeta': «Aỹem huo'o so lỹa ichoxonaxac, qaq se'eso ichoxonaxac selota'a aso nala', qataq so ca'agoxoic, qataq soua once huaqaañi, nache soomaye aỹem natameetracot.»

¹⁰ Qaq so José, co'ollaq da'aqtaxanem so lta'a qataq soua lqaỹa't se'eso lchoxonaxac, nache so lta'a nlaxa somaye, 'eeta': «¿Negue't ca naigui se'eso 'archoxonaxac? ¿Peta'a isheto' da añi 'arate'e, qataq naua 'arqaỹa't, qataq aỹem, da 'am sa'aroqoto naua qarllecte da 'am ñatamnoqot?»

¹¹ Nache soua lqaỹa't somaye ỹataqta huo'o da lquiỹaqa', qalaxaye so lta'a ỹataqta deuennataxaatapeguelec de'era.

So José qaimen, imen soua maiche lqaỹa't

¹² Qaq huo'o so na'a'q, nache soua lqaỹa't so José nqo'oora ye Siquén, nmittraique ca 'auaqpi da yaqto' aloq aso qaguetapi maye lalo so lta'a.

¹³ Qaq huaña nache so Israel 'enapego' so José, 'eeta': «Caua 'arqaỹa't huetra'a ye Siquén, ilotrague' aca qaguetapi. Qaq sauotaique da 'anqo'onalo caamaye.» Nache so José, 'enapeco': «Aja', aỹem ashec qome.»

¹⁴ Nache so Israel, 'enapeco': «Hua', qojec qome, da yaqto' 'auaỹaten ca 'eetec caua 'arqaỹa't, qataq aca qaguetapi, qaq ime qome, nache 'añe'eguelaq da 'andoi' ca ỹa'axaỹaxac.» Nache so Israel ỹamaq so José, chegoqchiguiña naqa'en so ca'amegue ye Hebrón. Qaq so José co'ollaq ivita ye Siquén,

¹⁵ nache isomapec, hualec so no'onaxa. Qaq huo'o so shiỹaxaua natenalec somaye, nache inattaco', 'eeta': «¿Negue't ca 'anmittaique?»

¹⁶ Nache so José 'enapeco': «Ñimittrapigui caua ỹaqaỹa't.» ¿Ishet peta'a da aỹem 'aua'aqtaxanem ca huetra'ague caamaye da ilotrague' aca qaguetapi?

¹⁷ Nache se'eso shiỹaxaua, 'enapeco': «Mashe ca'aisalo ne'ena soomaye, qaq sa'aqchiguilo da 'eetega nqo'oora ye Dotán.» Nache so José jec da nmitrapigui soua lqaỹa't, qaq ỹanatalo soomaye co'ollaq huaña ye Dotán.

¹⁸ Qaq soomaye ilora'aguet somaye co'ollaq ñaq qaỹoqteguet, qaq co'ollaq ñaq qaỹata'aguet, nache detaqtapiguilo ca lataxac da ỹalaua't somaye.

¹⁹ Nache 'ena'apo' soomaye: «¡Ña qauloỹa, 'enacha'aguet na choxonaxaic!

²⁰ Ña qauanaqui, salauataq namaye. Ime qome nache sasaxasoxongui aca 'oonole anam nsherepi, nache sa'axataq qome da huo'o so shiguiỹacpi chec somaye. ¡Yaqto' huaña, qaq saỹaanaq ca 'eetec so lchoxonaxacpi!»

²¹ Qaq so Rubén co'ollaq hua'axaỹa de'era, nache huotaique da nca'alaxatec so lqaỹa. Nache 'enapeco': «'A'i, saishet qome da salauataq namaye.

²² Saishet qome da qaucolyiiue'c naua ltago'q. Nacherata da qauasaqaiñigui añi nshere, maye naña ne'ena toolec 'alhua, qalaxaye saishet da huo'o ca qoñiỹa'ac.» Qaq so Rubén 'enapec co'ollaxa de'era, cha'aye huotaique da nca'alaxatec so José, da yaqto' ỹe'eguelaxata so lma' so lta'a.

²³ Qalaxaye so José co'ollaq ivita som huetra'a soua lqaỹa't, nache soomaye nquemoxonot somaye, nache nqa't so lapo' maye ỹaatañi,

²⁴ qaq ỹacooreua'a somaye, nache ỹasaxanguilo aso deqaqchiguingui nshere.

²⁵ Qaq ime co'ollaxa, nache soomaye nso'ooyiñi da deque'e'. Qaq co'ollaq namatrashegue'm nache ilora'aguet so nmenaxaicpi ismaeliitapi, maye chegaqa'a ye Galaad, qaq aso lalo cameellopi qalaq ỹachetac so coraxatpi, qataq so qo'oipaq lcha'q le'enaxat bálsamo, qataq so mirra, da yaqto' ira'a ye Egipto.

²⁶ Qaq huaña, nache so Judá, 'enapegalo' soua lqaỹa't, 'eeta': «¿Negue'to' cam qaraueguec da salauataq ñi qarqaỹa, qaq ime, nache soxotaqtapiguiñi da l-leuaxa?

²⁷ Qaq no'on da semenaqot na ismaeliitapi, qaq saishet da salauataq, cha'aye ñimaye ye maiche qaralamaxat qarqaỹa.» Qaq soua lqaỹa't ỹaỹamaxareeta co'ollaxa da la'aqtac somaye.

²⁸ Qaq so Madián le'ecpi maye nmenaxaicpi, co'ollaq nateugueye, nache soua lqaỹa't so José nqatyesheguem somaye. Ime, nache imenot so ismaeliitapi, qaq veinte monedas na plata aso lasheue. Qaq 'era da 'eetec so José co'ollaq qaỹauega ye Egipto.

²⁹ Qaq so Rubén co'ollaq ỹe'eguelaxa aso nshere, nache so José mashe saishet da huetangui asa'aso nshere. Huaña, co'ollaxa nache somaye ncolaxata'aisalo soua alogo souaxat da nqui'ic.

³⁰ Qaq ime, nache ỹe'eguelaxalo soua lqaỹa't, nache 'enapegalo, 'eeta': «¡Ca nsoq mashe qaica! Qaq nagui ¿hua'ago' ca sheetec?»

³¹ Nache soomaye ỹacoora so lapo' so José. Ime, qaq ỹalaua't so quetaq llalec, nache so ltago'q somaye ỹa'amñigui se'eso npo'.

³² Qaq ime, nache ỹamaxalo so lta'a' se'eso npo', qataq ỹama'q so la'aqta'c, 'eeta': «Qomi' selaqalec ne'ena npo'. Ña 'auchemaxata qome, sa iuena'a da huo'otaq nachena na lapo' ca 'aỹa'alec, huo'otaq ỹaqa'a.»

³³ Qaq so Jacob, co'ollaq ỹauatton se'eso npo', nache 'enapeco': «¡Aja', nachena na lapo' ca ỹalec! Yo'oqta da huo'o ca shiguiỹac dequi'iỹapec da icolaxattac co'ollaxa, nache chec.»

³⁴ Nache so Jacob ncolaxata'aisalo soua alogo. Ime, nache ỹaayiñi soua alogo maye lasouaxaqui'. Nache ỹataqta huo'oi soua na'axa'te da nỹeetapeguelec da l-leuaxa so llalec.

³⁵ Qaq 'enauac so llalaqpi qataq so llalpi da icochaqtac somaye, qalaxaye somaye saỹaỹamaxaren da qaicochaq nacherata da nỹeeteguelec so llalec, qataq 'eeta' da la'aqtac: «Aỹem saishet da sapalaxat da ỹasouaxac so ỹalec, choche ivitta'a da ñauane' somaye qom ivita da salegoigui na leuaxaicpi.»

³⁶ Qaq so madianiitapi co'ollaq ivita ye Egipto, nache imen so José, imenot so ỹale maye le'enaxat Potifar. Somaye nacheso so ltaua so faraón maye nta'a ye Egipto, qataq lataxala' som nauaatalecpi so nta'a.