Génesis 35 - La'aqtaqa Ñim Lo'onatac 'Enauacna 2013

So Jacob ỹe'eguelaxa ye Betel

¹ Qaq Ñim Lo'onatac 'Enauacna 'enapega so Jacob, 'eeta': «'Anaỹamaxat qome, da yaqto' 'anqo'ona ye Betel nache qonaña yemaye. Qaq huaña qome yemaye, nache 'auo'ot aca 'arca'atoxonaxalate da lalamaqte Ñim Lo'onatac 'Enauacna, Ñim 'am nachaxana co'ollaq 'ettapeguem so 'arqaỹa Esaú.»

² Qaq huaña nache so Jacob 'enapega so llalaqpi, qataq 'enauac so nnaictague'pi, 'eeta': «Qaualache qome 'enauac na ỹaqa'a atamnaxala'pi maye qami' hueto'oto. Qaq ime qome, nache qanachilli, qataq qanaralaxache' naua qo'ogolle',

³ nache ñaỹamaxataq da ñeqo'onaxa ye Betel. Qaq huaña qome yemaye nache so'ot aca ica'atoxonaxalate da sho'oxoren Ñim Lo'onatac 'Enauacna, maye aỹem itauan co'ollaq sootaigui so iuogoxo, qataq aỹem nnaictague' naua ỹeco cam sataigue.»

⁴ Nache somayepi, ỹanem so Jacob 'enauac som ỹaqa'a atamnaxala'pi maye hueto'ot, qataq aso nshetepi maye netaguilo naua ltela, nache so Jacob ilarot aso qo'oipaq le'enaxat encina, maye naña ye sa qaỹapeque ye Siquén.

⁵ Qaq co'ollaq jec somayepi, nache Ñim Lo'onatac 'Enauacna, ỹo'otec da lta'araic lcolanaxa 'enauac se'eso lauoreuapi somayepi. Qaq ỹoqo'oye qaica ca ishet da icaalec som llalaqpi so Jacob.

⁶ Nache so Jacob, qataq 'enauac so shiỹaxauapi maye nnaictague' somaye ivita ye Luz, yem huaqta'a't nỹecpi maye nataqa'en le'enaxat Betel, maye huaigui ye 'alhua Canaán.

⁷ Qaq huaña yemaye, nache ỹo'ot aso lca'atoxonaxalate, nache yi'iye 'alhua ỹanagui da le'enaxat El Betel, cha'aye co'ollaq 'ettapeguem so lqaỹa, nache Ñim Lo'onatac 'Enauacna, nachaxana somaye co'ollaq huaña yi'iye 'alhua.

⁸ Qaq yemaye nache huaña co'ollaxa da ileu aso Débora, asom 'alo maye iuattague' co'ollaxa aso Rebeca, qaq nache qailareñi, qaỹacho'ot aso qo'oipaq le'enaxat encina maye sa qaỹapeque ye Betel. Nache so Jacob ỹanagui da le'enaxat yi'iye 'alhua «Encina maye huaña so noinaxac.»

⁹ Qaq so Jacob co'ollaq ñe'eguelaq, chegaqa'a ye Padán Aram, nache Ñim Lo'onatac 'Enauacna qaltaq nachaxana somaye, nache ỹasaxalec da lchoxonnataxanaxa,

¹⁰ nache 'eeta': «'Am 'are'enaxat da Jacob, qalaxaye saishet qome da queta da 'are'enaxat damaye; qaq nache chegoqchiguiña nagui da 'am 'are'enaxat qome da Israel.» Qaq co'ollaq ime da Ñim Lo'onatac 'Enauacna naralaxat da le'enaxat somaye,

¹¹ nache 'enapega 'eeta': «Aỹem nachaỹem So'otapecna maye Qaica ca Seqalanapec, qaq ỹataqta qalota qome ca 'aỹa'alaqpi qataq ca 'am chegoxoguetpi. Qaq nache 'am chegoqchigui qome ca ỹotta'a't shiỹaxauapi, qataq ca qalota nhuo' le'ecpi, qataq cam 'am chegoxoguetpi huo'o qome ca nta'alpi.

¹² Qaq na 'alhua maye sanem co'ollaxa so Abraham qataq so Isaac, qalaq nataqa'en 'am sanem, qataq ca 'am chegoxoguetpi.»

¹³ Qaq Ñim Lo'onatac 'Enauacna co'ollaq ca'ai se'eso 'alhua maye huaña da detaqtague' so Jacob,

¹⁴ nache so Jacob ỹacona so coma', nache nachalataxaañi, ỹaachiguiña yem huaña co'ollaq detaqtague' Ñimaye. Qaq ime, nache icorelec somaye so aceite, qataq so lataxa,

¹⁵ nache ỹanagui da le'enaxat Betel yi'iye 'alhua.

Da l-leuaxa aso Raquel

¹⁶ Qaq co'ollaq qaỹata'ague de'era, nache so Jacob ca'ai ye Betel, qaq co'ollaq ñaq qaỹata'a ye Efrata, nache aso Raquel deco'o, qalaxaye da lco'oxoc ỹataqta huo'o da lqalaic.

¹⁷ Qaq co'ollaq mashe huaigui da ỹataqta huo'o da lqalaic, nache aso huetague' asomaye 'enapego', 'eeta': «Saishet qome da 'añi'i, cha'aye mashe huotaique da ñiguiñi na lỹa 'aỹa'alec ỹale.»

¹⁸ Qalaxaye asomaye mashe huotaique da ileu, qaq soua pa'atrec la'a'che, nache ishet da ỹanagui da le'enaxat Benoní se'eso nogotolec. Qalaxaye so lta'a Jacob, ỹanagui co'ollaxa da le'enaxat Benjamín.

¹⁹ Qaq 'era da 'eetec aso Raquel co'ollaq ileu, qaq nache qailareña so loigue so nqa'aic maye taỹa'a ye Efrata, yem le'enaxat nagui da Belén.

²⁰ Qaq so Jacob ỹa'ayiñi co'ollaxa so coma', ỹanalec aso nhuachiqui asomaye. Qaq se'eso coma' nache la'anaxat aso nhuachiqui aso Raquel, choche ivitta'a nagui.

²¹ Qaq so Israel qaltaq jec co'ollaxa, nache naña yem pa'aigue da laỹe aso naue le'enaxat Migdal Edar.

²² Nache so Israel co'ollaq mashe netaña se'eso 'alhua, nache so Rubén lauañe' co'ollaxa aso Bilá, asom ỹaqauga lhua so lta'a. Qalaxaye so Israel ỹaỹaten co'ollaxa de'era. Qaq soua llalqa so Jacob soomaye ivi' doce.

Soua llalqa so Jacob

²³ Qaq soua llalqa aso Lea, le'enaxat da Rubén so la'auaxanec, qataq jec so Simeón, Leví, Judá, Isacar qataq so Zabulón.

²⁴ Qaq soua llalqa aso Raquel: José qataq so Benjamín.

²⁵ Qaq soua llalqa aso Bilá asom lamaxashe aso Raquel: Dan qataq so Neftalí.

²⁶ Qaq soua llalqa aso Zilpa, asom lamaxashe aso Lea: Gad qataq so Aser. Qaq 'esoua soua llalqa so Jacob maye lañoqo' co'ollaxa ye Padán Aram.

Da l-leuaxa so Isaac

²⁷ Nache so Jacob jec co'ollaxa da nqo'ona so lta'a maye netaña ye Mamre, yem huaqta'a't nỹecpi maye nataqa'en le'enaxat Arbá, qaq yemaye nacheye ye Hebrón. Yem lma' co'ollaxa so Abraham qataq so Isaac.

²⁸ Qaq so Isaac mashe ivi' soua ciento ochenta vi'iye da nachaalataxac co'ollaq ileu.

²⁹ Nache jec da ỹalegoigui so hua'au lta'alpi, qaq mashe ỹataqta ỹa'axaiquiolec co'ollaq ileu. Qaq soua llalqa Esaú qataq so Jacob, ilalyiñi co'ollaxa somaye.