Génesis 21 - La'aqtaqa Ñim Lo'onatac 'Enauacna 2013

Da lañoxoc so Isaac

¹ Qaq Ñim Nataxala' ipacchigui co'ollaxa dam la'aqtac, nache qocha'a aso Sara, da yaqto' ipacchigui som la'aqtac maye ỹanem co'ollaxa asomaye,

² nache asomaye hualaxai, nache huo'o so llalec so Abraham co'ollaq somaye mashe ỹataqta ỹa'axaiquiolec. Qaq so nogotolec co'ollaq ñiguiñi nache huetoigui som ỹecchiguiña co'ollaxa Ñim Lo'onatac 'Enauacna.

³ Qaq so Abraham ỹanagui da le'enaxat Isaac so llalec aso Sara,

⁴ qaq ỹauo'o so na'anaxat na lo'oc somaye co'ollaq ivi' soua ocho na'axa'te da ñiguiñi, qaq nache ipacchigui da lamaxasoxonaxac co'ollaxa Ñim Lo'onatac 'Enauacna.

⁵ Qaq so Abraham mashe ivi' soua cien vi'iye da nachaalataxac co'ollaq ñiguiñi so Isaac.

⁶ Nache aso Sara 'enapeco': «Ñi Lo'onatac 'Enauacna ỹauo'o da ỹaỹalliguiyec, qaq 'enauac qome ca aỹem la'axaỹaxac da huo'o na ỹalec, nataqa'en ỹaỹalliguiyaxaua qome.

⁷ ¿Negue'tom ca ipettega co'ollaxa da ñi Abraham ishet da huo'o ca llalec? Qalaxaye nagui huo'o na llalec, na'aictaxa da mashe ỹa'axaiquiolec.»

Aso Agar qataq so Ismael qaỹo'oldauec

⁸ Qaq so nogotolec Isaac nquictasheguem da lañaxataxac, nache ivitta'a da ỹaxaañi da l-llepaxac. Qaq so na'a'q co'ollaq ỹaxaañi da l-llepaxac, nache so Abraham, ỹo'ot so lta'araic lquia'axac.

⁹ Qalaxaye aso Sara, ila'a co'ollaxa da so llalec aso Agar qataq so Abraham, da ỹe'eetac so Isaac.

¹⁰ Nache jec da 'enapega so Abraham, 'eeta': «¡'Auamaqauec qome añi nlata qataq ñi llalec! Ñim ỹalec Isaac, saishet qome da nhuana'ai' ñim llalec añi nlata da taleguete na 'aralamaxatpi.»

¹¹ Qaq so Abraham, co'ollaq hua'axaỹa de'era nache ỹataqta qalota da nqui'ic, cha'aye maiche lalamaxat llalec som qaitaqtega.

¹² Qalaxaye Ñim Lo'onatac 'Enauacna, 'enapego' so Abraham, 'eeta': –«Saishet qome da 'auaquico souaxat ñim nsoqolec qataq añi 'arlata. Qaq 'auo'ot qome da lquiquiaxac añi Sara, cha'aye ca 'am chegoxoguetpi, nache chegoqchigui qome ñi Isaac.

¹³ Qaq ñim llalec añi nlata, qalaq nataqa'en so'ot qome da chegoqchigui ca qalota shiỹaxauapi, cha'aye ñimaye nataqa'en 'aralamaxat 'aỹa'alec.»

¹⁴ Qaq so lỹa na'a'q, nache no'ottasheguem so Abraham, nache ỹanem aso Agar aso nauole, qataq aso lo'oc maye lỹoxoso huetagui so 'etaxat, nache ỹacheleguete naua lallaco, qataq ỹanem asomaye so nogotolec Ismael, qaq ime nache 'enapega da jec. Qaq asomaye jec, qalaq saỹaỹaten ca dataigue, nache chochaq coleetapeguelec ye toolec 'alhua ye Berseba.

¹⁵ Qaq co'ollaq imeuo so 'etaxat, maye huetagui aso lo'oc maye lỹoxoso, nache icotano'ot na la'a' asotai' qo'oipaqole so nsoqolec,

¹⁶ nache taỹa so qaỹata'a da nso'ooñi, cha'aye huotaique da saishet da ỹauaachigui da ileu somaye. Qaq asomaye co'ollaq mashe nso'ooñi, nache so nogotolec nỹeetac.

¹⁷ Qalaxaye Ñim Lo'onatac 'Enauacna, hua'aqtega co'ollaxa da nnoinaxac so nogotolec, nache so lamaxashec Ñim Lo'onatac 'Enauacna, chemqot na piguem da 'enapega aso Agar, 'eeta': «Agar. ¿Negue't cam qouetapoigui? Saishet qome da 'añi'i, cha'aye Ñim Lo'onatac 'Enauacna, hua'aqtega da nnoinaxac ñi nogotolec yem hueta'a.

¹⁸ ¡'Asoma, 'avi'eguena'a ñi nogotolec, qaq nache saishet qome da 'aỹa'axanec na lhuaq, cha'aye aỹem so'ot qome da chegoqchigui ñimaye cam qalota shiỹaxauapi!»

¹⁹ Qaq huaña, nache Ñim Lo'onatac 'Enauacna, ỹauatoiguilo naua la'ai'te aso Agar, nache asomaye ila'a aso nshere maye huo'o so le'ec 'etaxat. Qaq asomaye jec nache iỹoxogui aso lo'oc maye lỹoxoso, ime nache taỹa so Ismael da nỹomaxan.

²⁰ Qaq Ñim Lo'onatac 'Enauacna, nache hueta'aguet co'ollaxa so nogotolec, qaq somaye nache nquictasheguem da lañaxataxac, qataq nache netaña yem toolec 'alhua, qaq somaye ivira'a da ỹataqta ỹaỹaten da do'ogoxona na checnec.

²¹ Qaq co'ollaq mashe qaỹoqtegue da netaña ye toolec 'alhua ye Parán, nache aso late'e somaye, ỹaronaxanaxaneguet aso 'alo maye Egipto lashe.

So Abraham naỹamaxate' so Abimelec

²² Qaq nache huetoigui se'eso na'a'q, da so Abimelec nqo'ona so Abraham da detaxaỹapegue'. Qaq nnaictague' co'ollaxa so Ficol, som lataxala' so nalleppi. Nache so Abimelec 'enapego' so Abraham, 'eeta': «Qomi' selaqa'a da Ñim Lo'onatac 'Enauacna, 'am itauaatac 'enauac nam 'auo'otpi.

²³ Qaq ỹoqo'oye nachena ne'ena souaqta'a nagui, da huaña da 'aỹa'anot ca 'ara'aqtac Ñim Lo'onatac 'Enauacna, da saishet da aỹem 'auo'otec qome ca qauem, qataq na ỹalaqpi, qataq ca aỹem chegoxoguetpi, 'aỹa'an ca 'ara'aqtac da aỹem 'auo'otec cam no'on, 'eeta'am da sheetec co'ollaxa 'am, qataq nataqa'en 'auo'otec cam ỹaỹamaqchiguiñi nam shiỹaxauapi maye hueta'a ne'ena 'alhua maye qonetaña nagui.»

²⁴ Nache so Abraham, 'enapeco': «Aja', aỹem sanot da ỹa'aqtac Ñim Lo'onatac 'Enauacna.»

²⁵ Qalaxaye so Abraham, iuennataxanaxanec so Abimelec, da 'eetec so l-latacpi da deuotaxanec co'ollaxa aso nshere maye huo'o na le'ec 'etaxat.

²⁶ Nache so Abimelec ỹasateguet somaye, 'eeta': «Ỹataqta ivitta'a nagui da sa saỹaten de'era, qataq 'am, ye saq aỹem 'aua'aqtaxanem co'ollaxa. Nache aỹem sa saỹaten negue'to' cam ỹo'ot co'ollaxa de'era.»

²⁷ Qaq huaña, nache so Abraham ỹaconeua'a aso lalo qaguetapi, qataq aso huacapi, nache ỹanem so Abimelec. Qaq nacheso se'eso na'a'q da soomaye ỹo'o't som naỹamaxataxa'c.

²⁸ Qalaxaye so Abraham, iỹotaugalo co'ollaxa soua siete qaguetal ỹachegoxotraigui aso lalopi,

²⁹ qaq ỹoqo'oye so Abimelec inat somaye, 'eeta': «¿Ta'ainco' da 'auỹotaugalo ñi'iñiua siete qaguetal?»

³⁰ Nache so Abraham 'enapeco': «Ne'enaua siete qaguetal maye 'am sanema, naamaye la'anaxa't da ỹoqta 'eesa da aỹem ỹo'onata añim nshere.»

³¹ Qaq ỹoqo'oye yi'iye 'alhua, qoỹanagui da le'enaxat Berseba, cha'aye nache huaña co'ollaxa da soomaye ỹa'n so la'aqta'c.

³² Qaq co'ollaq ime se'eso aỹamaxataxac maye huaña ye Berseba, nache so Abimelec qataq so Ficol, ỹe'eguelaxalo yem na'alhua na filisteopi.

³³ Qaq huaña ye Berseba, nache so Abraham ỹaañi aso qo'oipaq le'enaxat tamarisco, qaq nache huaña da iỹaxaatega da le'enaxat Ñim Nataxala', Ñim Lo'onatac 'Enauacna maye chochaq tatec.

³⁴ Qaq so Abraham, ỹataqta saqaỹoqteguelo co'ollaxa soua vi'iye, da netalec ye na'alhua na filisteopi.