Génesis 20 - La'aqtaqa Ñim Lo'onatac 'Enauacna 2013

So Abraham qataq so Abimelec

¹ Qaq so Abraham ca'ai co'ollaxa ye netaña, nache nqo'ona ye 'alhua le'enaxat Néguev. Qaq nache naña ye huaqta'a't nỹecpi ye Gerar, maye vichiguinguilo yeua Cades qataq Shur.

² Qaq co'ollaq hueta'a yemaye, nache ỹa'axat da 'eetega lqaỹa aso Sara maye lhua somaye. Nache so Abimelec maye nta'a ye Gerar, damaxasoxoneuga co'ollaxa da qanauegueuo aso Sara da yaqto' ỹauo'o lhua.

³ Qalaxaye se'eso pe so Abimelec huo'o so lchoxonaxac maye huaigui co'ollaxa da Ñim Lo'onatac 'Enauacna 'enapega, 'eeta': «'Am 'aleu qome, cha'aye añi 'alo maye 'auaconeua'a da huotaique 'arhua, añimaye huo'o ñi lhua.»

⁴ Qalaxaye so Abimelec ye saxanaxa da lauañi' asomaye, nache ỹasateguet Ñim Nataxala', 'eeta': «'Am Ỹataxala', ¿ishet peta'a da 'aualauat cam qaica ca ỹo'ot qauem?

⁵ Ye ñi Abraham aỹem da'aqtaxanem da 'eetega lqaỹa aña'añi 'alo, qataq nataqa'en añimaye ỹa'axat da lqaỹa ñimaye. Qaq ỹoqo'oye ỹataqta qaica ca sauotaique da so'ot 'enauac de'era. Qaq nachera da huo'omshe sa'amaqten da qaica ca so'ot qauem.»

⁶ Nache Ñim Lo'onatac 'Enauacna ỹasateguet somaye huaigui so lchoxonaxac, 'eeta': «Aỹem saỹateeta da ỹataqta qaica ca 'auauotaique da 'auo'ot de'era. Ỹoqo'oye saishet da 'am sasheetem da 'arauañi' añimaye, yaqto' saishet da Aỹem huo'ot ca 'arasouaxashet.

⁷ Qalaxaye nagui aña'añi 'alo 'avi'eguelaxatem qome ñi lhua, cha'aye ñimaye na'aqtaxanaxanec, qaq 'am nqouagaxaueelec qome da yaqto' 'anca'alec. Qalaxaye qom saishet da 'avi'eguelaxatem ñimaye, nache 'am 'aleu qome, qocañi' na 'aralamaxatpi.»

⁸ Qaq so nte'etom so lỹa na'a'q, nache so Abimelec ñisheguem, nache iỹaxaneuga 'enauac so lamaxashecpi, nache da'aqtaxanem 'enauac som dechoxootega somaye. Qaq somayepi co'ollaq hua'axaỹa de'era, nache ỹataqta qalota da lcolanaxa.

⁹ Qaq ime co'ollaxa, nache so Abimelec iỹaxaneuga so Abraham, nache 'enapega, 'eeta': «¡Ña 'aula'a dam qomi' 'auo'oteque! ¿Negue't cam 'am so'otec qauem da yaqto' aỹem 'auasaxalec da lta'araic ỹasouaxashet, qataq na selotague' shiỹaxauapi? De'era aỹem 'auo'otec, damaye saỹaỹamaxañi.»

¹⁰ Qaq nataqa'en so Abimelec 'enapega co'ollaxa so Abraham, 'eeta': ¿Negue't cam tatapigui ye 'arhuel co'ollaq 'auo'ot de'era?

¹¹ Nache so Abraham ỹasateguet somaye, 'eeta': «Aỹem sepettega da ne'ena nma' da qaica ca 'enec qanqa'en Ñim Lo'onatac 'Enauacna, qataq da aỹem qaỹalauat souaxat añi ihua.

¹² Qalaxaye 'eesa da añimaye maiche ỹaqaỹa, añimaye llale so ita'a, qalaxaye saishet da llale aso ỹate'e. Ỹoqo'oye ishet da saroneguet añimaye.

¹³ Ñim Lo'onatac 'Enauacna co'ollaq aỹem 'enapega da sheca'ai ye lma' so ita'a, nache setaxaỹot añimaye da huo'otaq huo'o ca seviraxa nma', nache ỹa'axat da ỹaqaỹa.»

¹⁴ Qaq huaña nache so Abimelec, ỹe'eguelaxatem so Abraham aso lhua Sara. Qaq nataqa'en ỹanem somaye aso qaguetapi, huacapi, qataq so l-latacpi, qataq aso l-latapi 'alpi,

¹⁵ nache 'enapega, 'eeta': «'Ena na ña'alhua, maiche 'alca'aique ca ỹataqta 'arauela da qonaña, qaq nacheca qonaña.»

¹⁶ Qaq nataqa'en 'enapega aso Sara, 'eeta': «Nam sanempi da 'arqaỹa, ỹataqta saqaỹoqtegue añi ivi' lasheue, qaq namayepi nala'aguet qome da npaxaalec da no'on 'ana'aqtaguec, da yaqto' na 'am neto'otpi saishet da 'am ỹasaxalec ca sa ỹaỹamaxañi ltaxaỹaxac.»

¹⁷ Qaq huaña, nache so Abraham nqouagaxaunot Ñim Lo'onatac 'Enauacna, nache Ñimaye qaltaq no'oita naqa'en so Abimelec, qataq aso lhua. Qataq nataqa'en nataren 'enauac aso l-latapi da yaqto' ishet da huo'o ca llalec.

¹⁸ Cha'aye souaxat co'ollaxa aso Sara, nache Ñim Nataxala' ỹo'ot da so 'alpi maye hueta'a so lma' so Abimelec, saishet da huo'o ca llalec.