Génesis 14 - La'aqtaqa Ñim Lo'onatac 'Enauacna 2013

So Abram nca'alaxatec so Lot

¹ Qaq se'eso na'a'q, so Amrafel nta'a ye Sinar, qaq so Arioc nta'a ye Elasar, qaq so Quedorlaomer nta'a ye Elam, qaq so Tidal nta'a ye Goyín.

² Qaq se'esoua nta'al deloctague' co'ollaxa so Bera, maye nta'a ye Sodoma, qataq so Birsa, maye nta'a ye Gomorra, qataq so Sinab maye nta'a ye Adma, qataq so Semeber maye nta'a ye Zeboyin, qataq so nta'a Bela, maye da lỹa le'enaxat Soar.

³ Qaq se'esoua cinco nta'al, ỹauaxaỹaxana't co'ollaxa som nalleppi, huaña ye ca'amegue maye le'enaxat Sidín, maye nachaso aso Auaxai Leuaxai.

⁴ Qaq imattrec co'ollaxa soua doce vi'iye da do'onataxaatracot so nta'a Quedorlaomer, qalaxaye co'ollaq ivita so vi'i trece, nache soomaye dataira'aguet somaye.

⁵ Qaq so vi'i catorce, nache so Quedorlaomer qataq soua lỹa't nta'al maye huaqtapeegueta, soomaye nqo'oora ye 'alhua Astarot Carnayin, qaq huaña yemaye, nache loxonec som refaiitapi. Ime co'ollaxa qaltaq loxonec so zuziitapi huaña ye Jam, qaq so emiitapi qalaq loxonec co'ollaq huaña ye Savé Quiriatayin,

⁶ qaq so horeopi qalaq loxonec co'ollaq huaña aye qasoxonaxapi ye Seir, qataq icaatac co'ollaxa iviraxatta'a ye ca'amegue ye Parán, maye huaqta'ai' yem toolec 'alhua.

⁷ Qaq co'ollaq ñe'eguelaq so Quedorlaomer, qataq so nnaictague'pi somaye, nache nvira'a ye Enmispat, maye da lỹa le'enaxat Cades. Qaq huaña, nache loxonec 'enauac yem na'alhua so Amalec le'ecpi, qataq nataqa'en som amorreopi maye netaña co'ollaxa ye 'alhua Jasesón Tamar.

⁸ Nache so nta'alpi maye ilotague' ye Sodoma qataq Gomorra, Adma, Zeboim qataq Bela, nache nqo'ona ye ca'amegue le'enaxat Sidín, nache deloguito soua nta'al,

⁹ maye nachesoua soua Quedorlaomer, maye nta'a ye Elam, Tidal maye nta'a ye Goyín, Amrafel maye nta'a ye Sinar, qataq so Arioc maye nta'a ye Elasar, qaq se'esoua cuatro nta'al, deloguito co'ollaxa se'esoua cinco.

¹⁰ Qaq so ca'amegue ye Sidín, huo'o co'ollaxa aso lchequepi nlaqchigui na 'eco' qo'oipaq lcha'q, ỹoqo'oye soua nta'al ye Sodoma qataq ye Gomorra co'ollaq datarec, nache tarengui asa'aso lchequepi. Qaq so laỹepi qalaq datauec co'ollaxa, taỹa aso qasoxonaxa.

¹¹ Qaq som doxonaxanpi, qalaq nache ỹacona co'ollaxa 'enauac so nallec, qataq so no'on nogoxoshetpi ye Sodoma qataq ye Gomorra, ime, qaq jec.

¹² Qaq nataqa'en ỹaconeua'a co'ollaxa so Lot, som lasoshec so Abram maye netaña ye Sodoma, qataq nataqa'en ỹacona so no'on logoxoshetpi somaye, ime, nache jec.

¹³ Qalaxaye huo'o so ỹale maye qoỹet co'ollaxa, somaye da'aqtaxanem co'ollaxa 'enauac de'era so Abram som hebreo le'ec, maye netaña yem huaña aso qo'oipaqpi le'enaxat encina, maye lalamaxat so Mamre, som amorreo le'ec. Qaq so Mamre nache lqaỹa so Escol, qataq so Aner, qaq soomaye nache huaqtapeegueta naxa so Abram.

¹⁴ Qaq so Abram co'ollaq ỹaỹaten da so lasoshec noxonec, nache laỹona't co'ollaxa so lalamaxat l-latacpi maye lañoqo' so lma' somaye. Qaq somayepi ivi' trescientos dieciocho ye lcata. Nache so Abram lỹatec co'ollaxa somayepi da icaalec se'eso nta'alpi, nache iviraxatta'a ye Dan.

¹⁵ Qaq co'ollaq mashe pe, nache so Abram qataq so nalleppi, ique'elaxat da iloquiaxan so nta'alpi, nache icaatac iviraxatta'a ye Hoba, maye pa'aigue da sheu' ye huaqta'a't nỹecpi ye Damasco,

¹⁶ nache deuotaxanec 'enauac som ỹache co'ollaxa somayepi. Qaq 'era da 'eetec so Abram da nca'alaxatec co'ollaxa so lasoshec Lot, qataq ñe'eguelaxaala't 'enauac so lalamaxatpi somaye. Qaq nataqa'en nca'alaxatec so 'alpi qataq so laỹepi shiỹaxauapi.

So Melquisedec ỹanem da no'on la'aqtac so Abram

¹⁷ Qaq so Abram co'ollaq mashe ñe'eguelaq co'ollaq ime da loxonec so Quedorlaomer qataq soua nta'al maye nnaictagueto somaye, nache so nta'a ye Sodoma hueqata'aguet co'ollaxa somaye huaña so ca'amegue le'enaxat Save, maye nataqa'en le'enaxat Ca'amegue maye lalamaxat so nta'a.

¹⁸ Qaq nataqa'en so Melquisedec som nta'a ye Salén, qataq ntaxaỹaxanaxanec da qaitaxaỹapegue' Ñim Lo'onatac 'Enauacna maye Nataỹaña 'Enauacna, somaye ỹacona aso nauole qataq so lataxa,

¹⁹ nache ỹanem so Abram da no'on la'aqtac maye, 'eeta': «Ñim Lo'onatac 'Enauacna, maye Nataỹaña 'enauacna, ñim ỹo'ot co'ollaxa na piguem qataq ana 'alhua, 'am ỹanem qome ca lchoxonnataxanaxa,

²⁰ qataq qaỹo'oxoren qome Ñim Lo'onatac 'Enauacna, maye Nataỹaña 'enauacna ñim 'am ỹanem co'ollaxa da 'oxonec so 'ampa'aguenaxauapi.» Qaq huaña nache so Abram, ỹanem so Melquisedec, añi 'oonole ana diez 'enauac som lhuotaxanaxatpi.

²¹ Qaq huaña nache so nta'a ye Sodoma 'enapega so Abram, 'eeta': «Aỹem 'aỹa'anem qome na shiỹaxauapi, nache 'ano'ona'aguet na nogoxoshetpi.»

²² Qalaxaye so Abram 'enapeco': «Aỹem sanot co'ollaxa so ỹa'aqtac Ñim Nataxala', Ñim Lo'onatac 'Enauacna maye Nataỹaña 'enauacna, ñim ỹo'ot co'ollaxa na piguem qataq ana 'alhua,

²³ da aỹem saishet da huo'o ca sacona na 'aralamaxatpi, ivira'a ca lquet ca pela', yaqto' saishet qome da qonapec, da nache 'am da aỹem 'ausallaqchet.

²⁴ Aỹem saishet da huo'o ca sacona, nachaqsota som mashe chec nam ñalleppi. Qalaxaye nachenauate' naua ñenaictapegueto, Aner, Escol, qataq Mamre, naamaye huo'o qome ca ỹocona.»