Génesis 1 - La'aqtaqa Ñim Lo'onatac 'Enauacna 2013

¹ Ñim Lo'onatac 'Enauacna, co'ollaq cheta'ague da ỹo'otna, nache ỹo'ot na piguem qataq ana 'alhua.

² Qaq ana 'alhua saxanaqca co'ollaxa ca laỹamqa', nda'a't da auaxai maye ỹataqta qaỹoqchiguingui qataq napalñi, qaq so Saqcha'a La'añaxac Ñim Lo'onatac 'Enauacna coleetapeguelec na 'etaxat.

³ Nache Ñim Lo'onatac 'Enauacna 'enapeco': ¡Huo'o ca yo'oqchiguiñi! Nache ipacchigui da yo'oqchiguiñi.

⁴ Qaq Ñim Lo'onatac 'Enauacna co'ollaq ila'a da 'onaxaic na yo'oqchiguiñi, nache iỹoteeguesop na napalaxa,

⁵ nache na yo'oqchiguiñi le'enaxat naqa'en «na'a'q», qaq na napalaxa le'enaxat «pe». Qaq nvi' so pe, ime qataq anac so yo'oxoñi, qaq 'era da 'eetec so la'auaxanec na'a'q.

⁶ Huaña nache Ñim Lo'onatac 'Enauacna, 'enapeco': Huo'o ca pa'asheguem na'atchiguiñi npaxatta'aguet na 'etaxat, da yaqto' dos naua lpa'axaco.

⁷ Nache Ñim Lo'onatac 'Enauacna ỹo'ot so pa'asheguem na'atchiguiñi maye iỹoracache na 'etaxat, nache huo'o na pa'atasheguem 'etaxat qataq huo'o na npa'atañi,

⁸ nache se'eso pa'asheguem na'atchiguiñi le'enaxat naqa'en «piguem.» Qaq nvi' so pe, ime qataq anac so yo'oxoñi, qaq 'era da 'eetec so na'a'q dos.

⁹ Nache Ñim Lo'onatac 'Enauacna 'enapeco': Na npa'atañi 'etaxat huo'o ca laponqa', yaqto' huo'o ca lqaxaỹaxa. Qaq 'era da 'eetec.

¹⁰ Nache Ñim Lo'onatac 'Enauacna na lqaxaỹaxa le'enaxat naqa'en da «'alhua», qaq na laponqa' na 'etaxat le'enaxat naqa'en «auaxai.» Qaq Ñimaye ila'a da 'enauac ỹaỹamaqchiguiñi.

¹¹ Nache Ñim Lo'onatac 'Enauacna 'enapeco': Ñaxaalec 'enauac ana 'alhua ana ỹotta'a't huouepi, qataq ana huouepi maye huo'o ana ala, qataq ana qo'oipaqpi maye ỹotta'a't ana alapi. Qaq 'era da 'eetec.

¹² Huaña nache na 'alhua ñaxaalec ana ỹotta'a't huouepi, qataq ana huouepi maye huo'o ana ala, qataq ana qo'oipaqpi maye huo'o ana ala. Nache Ñim Lo'onatac 'Enauacna ila'a da ỹaỹamaqchiguiñi.

¹³ Qaq nvi' so pe, ime qataq anac so yo'oxoñi, qaq 'era da 'eetec so na'a'q tres.

¹⁴ Nache Ñim Lo'onatac 'Enauacna, 'enapeco': Huo'o aca 'eroiguipi na pa'asheguem na'atchiguiñi, nache ỹaqauga naqa'en na'a'q qataq pe, qataq ỹa'a'n naua laloxoqui' da nqoche'n naua na'axa'te qataq naua vi'iye.

¹⁵ Qaq 'eroigui anamayepi na pa'asheguem maye na'atchiguiñi da yaqto' icoỹarelec ana 'alhua. Qaq 'era da 'eetec.

¹⁶ Ime, nache Ñim Lo'onatac 'Enauacna ỹo'o't naua dos ncoỹaraxanaqte: Aso late'erai icoỹarelec naqa'en na'a'q, qaq aso qapio'ole icoỹarelec pe. Nataqa'en ỹo'ot ana huaqaañipi.

¹⁷ Nache Ñimaye ỹano'oto soua ncoỹaraxanaqte na piguem, da icoỹarelec naqa'en ana 'alhua,

¹⁸ qaq ỹo'o't yaqto' ilo'ogue na'a'q qataq pe, da yaqto' na yo'oqchiguiñi iỹoteeguesop na napalaxa. Nache Ñim Lo'onatac 'Enauacna ila'a da ỹaỹamaqchiguiñi.

¹⁹ Qaq nvi' so pe, ime qataq anac so yo'oxoñi, qaq 'era da 'eetec so na'a'q cuatro.

²⁰ Ime, nache Ñim Lo'onatac 'Enauacna 'enapeco': Ñaxatoigui qome na 'etaxat 'enauac na ỹotta'a't 'etaxat le'ec, qataq nataqa'en qome na maỹo maye ishet da huaỹotapeguelec ana 'alhua.

²¹ Nache Ñim Lo'onatac 'Enauacna ỹo'ot na lta'araic nỹaqpi, 'enauac na ỹotta'a't shiguiỹacpi maye lañaxataxaqui qataq huetangui na 'etaxat, qataq 'enauac na ỹotta'a't maỹopi. Nache Ñim Lo'onatac 'Enauacna ila'a da ỹaỹamaqchiguiñi.

²² Nache ỹanem da no'on la'aqtac na shiguiỹacpi maye lo'onatac, 'eeta': Ỹataqta qalota qome na qaỹa'alqui qataq qanlaxachiichigui ana auaxai, qataq ỹataqta qalota qome na maỹo ana 'alhua.

²³ Qaq nvi' so pe, ime qataq anac so yo'oxoñi, qaq 'era da 'eetec so na'a'q cinco.

²⁴ Nache Ñim Lo'onatac 'Enauacna, 'enapeco': Ñaxaalec qome ana 'alhua 'enauac na ỹotta'a't shiguiỹacpi: Nlopi qataq na huauecpi, qataq nam ỹotta'a't hualectapigui'pi. Qaq 'era da 'eetec.

²⁵ Nache Ñimaye ỹo'ot 'enauac ne'ena shiguiỹacpi, nlopi qataq na huauecpi, qataq nam ỹotta'a't hualectapigui'pi. Nache Ñim Lo'onatac 'Enauacna ila'a da ỹaỹamaqchiguiñi.

²⁶ Ime, nache Ñimaye 'enapeco': Nagui so'otaq ca shiỹaxaua, 'eeta'ama qomi'. Qataq huo'o da 'enec da ilo'ogue na nỹaq, maỹo, shiguiỹacpi, nlopi qataq na huauecpi, qataq nam hualectapigui'pi.

²⁷ Nache Ñim Lo'onatac 'Enauacna ỹo'ot so shiỹaxaua, ỹe'enaxatchigui da maiche lataxac Ñimaye, ỹo'o't soua ỹale qataq aso 'alo.

²⁸ Ime, qaq ỹanema da no'on la'aqtac, 'eeta': «Ỹataqta qalota qome ca qaỹa'alquipi, qanlaxacheetelec ana 'alhua qataq qauloỹeegue, nataqa'en qauloỹeegue na nỹaq qataq na maỹo qataq 'enauac na shiguiỹacpi maye hualectapigui'.»

²⁹ Ime, nache Ñim Lo'onatac 'Enauacna, 'enapeco': «Hua', nagui qami' sanema 'enauac ana huouepi maye huo'o ana ala maye ñaxattalec ana 'alhua, qataq ana qo'oipaqpi maye huo'o ana ala. Qaq 'enauac anamaye qollequiitac.

³⁰ Qaq na shiguiỹacpi, qataq na hualectapigui'pi, qataq na maỹopi, qalaq 'enauac namayepi da sanem na 'auaqpi da chectac.» Qaq 'era da 'eetec.

³¹ Qaq co'ollaq imat Ñimaye 'enauac na lo'onatacpi, nache ila'a da ỹataqta ỹaỹamaqchiguiñi. Qaq nvi' so pe, ime qataq anac so yo'oxoñi, qaq 'era da 'eetec so na'a'q seis.