Filipenses 3 - La'aqtaqa Ñim Lo'onatac 'Enauacna 2013

Da lyac da qaỹauatton So Cristo

¹ Qaq nagui qami' ỹaqaỹarolqa, qantoñiitapeguec qome da qana'ayeetaua'a So Qarataxala'. Qaq aỹem saishet da huo'otaq ñasamtapiguiñi da she'eguelaxattalec de'era maye sogote da shiyiñi co'ollaxa, cha'aye damaye saỹateeta da ỹataqta qarviñiqui.

² Qaq maxatchaxa, qarvichiỹa'aguet qome na shiỹaxauapi maye nqaigaxat, qataq ỹo'otta'ape naua qauema, qataq ipelectac na lo'oc.

³ Cha'aye nam ỹoqta na'añeguishecpi qataq ỹataqta 'eesa, qaq nache qomi' maye chegoqchigui So Saqcha'a La'añaxac Ñim Lo'onatac 'Enauacna maye sho'oxonnaqtac, qataq ỹo'ot da qana'amqaanaxac, cha'aye qomi' lalamaqa'ate So Cristo Jesús, qataq nache saishet da ñaquitaqtega ca choche la'añaxac ca shiỹaxaua.

⁴ Qaq aỹem ye nataqa'en ỹataqta ñaquita'a co'ollaxa namayepi, qaq ỹoqo'oye da huo'o ca lỹa da 'eetega ỹactec da naquittega namayepi, nache aỹem ỹactec da ñaquitaxac namayepi.

⁵ Cha'aye aỹem co'ollaq mashe sevi' soua ocho na'axa'te da ñañiguiñi, nache qaỹauo'o so la'anaxat na ỹo'oc, cha'aye aỹem ỹataqta ỹalamaxat ihuo' na Israel le'ecpi, sachegoxoigui na llalaqpi so Benjamín, aỹem hebreo le'ec, ñapacalec nam ỹataqta qalota maye 'eetega naxa da hebreo le'ecpi. Da ỹataxac aỹem fariseo le'ec, cha'aye shecteguelo naua nqataxaco maye chegoqo'oto so Moisés.

⁶ Qaq ỹataqta huo'o da iuogoxo da sepaqueelec co'ollaxa na namaxasoxonaxacpi, ỹoqo'oye sevira'a da secaatac nam ỹa'amaqten so Jesús. Qaica ca ishet da ỹauo'o ca ỹasouaxashet da 'eetega da sa sepaguelec na namaxasoxonaxacpi.

⁷ Qalaxaye 'enauac ne'enapi maye ỹataqta huo'o naq 'enec ñaqa'en co'ollaxa, nagui qalaq 'eeta'am ñaqa'en da ỹataqta qaica ca naigui, souaxat So Cristo.

⁸ Qaq saishet da nacherata de'era, cha'aye 'enauac nam ishettaxa da ỹalamaxatpi, qalaq 'enauac salat, cha'aye ỹataqta saishet da huo'o ca ivi' ñaqa'en da lyacỹaxac da ỹauattonaxanaxac So Cristo Jesús maye Ỹataxala'. Qaq souaxat So Cristo, nache imauec da deqat ñaqa'en nam ỹalamaxatpi co'ollaxa, qataq 'eeta'am ñaqa'en da ỹataqta qaica ca naigui, cha'aye mashe sauatton Somaye,

⁹ qataq yaqto' aỹem qaila'a da ña'attaua'a So Cristo. Qaq saishet da chegoqchigui da no'on ỹataxac souaxat da salaxaguet na namaxasoxonaxacpi, nacherata da no'on nataxac maye ỹanem Ñim Lo'onatac 'Enauacna cam ỹa'amaqten So Cristo, dam no'on nataxac maye chegoqchigui da npi'iỹaxac.

¹⁰ Qaq ỹoqo'oye dam 'oonolec maye ỹataqta seyaqa'a, damaye sauotaique da ỹataqta sauattoota So Cristo, qataq da ñauane' da la'añaxac co'ollaq nca'aleeguesop da nleuaxa, yaqto' ñeuanaua'a da nque'eenaxac, qataq sevira'a da shena'am Somaye da l-leuaxa.

¹¹ Nache huo'o da ihuataxanaxac da salectoigui qome na leuaxaicpi qom qaltaq qanca'alaxatec.

Da 'añaxataxac da yaqto' qaivira'a ca naloqnec

¹² Qaq aỹem saishet da sheetega da mashe sevi' 'enauac nam sa'axattac, huo'otaq da mashe nalochiguiñi da ỹataxac. Qalaxaye aỹem ashecta, huo'o da ña'añaxataxac da yaqto' sevira'a da nalochiguiñi da ỹataxac, cha'aye nachera da huo'omshe aỹem nca'alaxatec So Cristo Jesús.

¹³ Qami' ỹaqaỹa't, aỹem saỹateeta da saxanaxa da sevi' ye naloqnec, qalaxaye ỹataqta ñaỹateetela't da saishet da ñamatta'a nam mashe semat, nacherata da ña'añaxat, qataq selotelec da so'ottac nam saxanaxa da semat.

¹⁴ Qaq ỹoqo'oye nache ashecta da saỹa'a ca naloqnec, yaqto' saconeguet qome cam ỹachaxanapec Ñim Lo'onatac 'Enauacna, cam huo'omshe qomi' iỹaxanalo chegoqchigui So Cristo Jesús.

¹⁵ Qaq ỹoqo'oye 'enauac da shenaqta maye mashe nalochiguiñi da qarpi'iỹaxac, no'on da nache 'eeta'a't da qarhuennataxa. Qalaxaye da huo'otaq huo'o ca lỹa qarhuennataxaqui, qalaq Ñim Lo'onatac 'Enauacna ishet nataqa'en da qami' itauneque da qauaỹaañi camaye.

¹⁶ Qaq de'era ỹataqta ỹaỹamaqchiguiñi, qataq iuen da nachera qome da qarataxac.

¹⁷ Qami' ỹaqaỹa't, no'on da ỹataqta qoquiitegue da ỹataxac. Qataq qauaỹataxayiñiita nataqa'en nam quetegue da nataxac maye qami' sapaxaguenaxaque.

¹⁸ Qaq mashe qalota da qami' sa'aqtaxaateguema naxa, qalaxaye nagui qaltaq ñeỹeetalec da she'eguelaxalec da qami' sa'aqtaxanema, cha'aye ỹataqta qalota nam dataỹa'aguet da na'aqtaguec da l-leuaxa So Cristo, co'ollaq qaiuaxaneguet so npe'enaxaqui.

¹⁹ Ne'ena shiỹaxauapi namayepi taỹa'a da qaỹasaxaña cam nhuaxanaqa' na 'etaxaloxoicpi. Cha'aye nda'a't da quetague' da ño'oxonnaxac da huo'o ye ỹo'ot, cha'aye da ỹoqta ỹaỹateeta taxa, nache huo'o da la'agaxa. Qataq namayepi nda'a't da iuennatega na qauem maye huetalec ana 'alhua.

²⁰ Qalaxaye qomi' qarma' da piguem, dam chegoxogue Som Qarataxala' maye Qarca'alaxaqui qom ñe'eguelaq.

²¹ Qaq Somaye naralaxat qome da qaro'ocỹaxac maye qaica ca la'añaxac, da yaqto' 'eeta'am naqa'en dam lo'ocỹaxac maye ỹo'oxoraq. Qaq damaye ỹachegoxotchigui da la'añaxac maye nachera da do'onataxana qome da ilo'ogue 'enauacna.