Filipenses 2 - La'aqtaqa Ñim Lo'onatac 'Enauacna 2013

So Cristo qoỹami' da la'amaqchec souaxat da sa na'amaqten

¹ Aỹem saỹateeta da So Cristo qami' ỹanema da na'añaxac da yaqto' qaua'añaqchichi na qaraỹepi. De'era qarsoxoyiqui maye qami' hueto'oto, damaye qami' ỹauegalo da ishet da qaua'añaqchichi ca qarỹai, qataq saỹaten da 'enauac da qoñiita qami' hueto'oto So Saqcha'a Na'añaxac, ỹoqo'oye qami' choxonnataxanaxaiqa.

² Qaq ỹoqo'oye qami' seỹaxanoiguilo 'enauac da qoñiita da qauauo'oi ca lta'araic ñetonaxac, qoviitaigui da qaica ca ỹaqpegueuga da qoñiita qataq ñi 'oonolec ỹataqta ỹauotec ca lỹa. Qataq qanaỹaañeta't da huo'o ca qauennacheetega qataq 'oonolec ca qaryaxayiqui.

³ Qataq da huo'o ca qauo'oche qalaq saishet da qami' ño'oxonnaxaiqa, huo'otaq da choche qancotaitapigui. Nachaqrata da qauroilec da huesota qarataxaqui, qataq saishet da qaica ca qa'añiỹaigui ca qarỹai da qoñiitega saishet da qoñiita'am.

⁴ Qataq saishet qome da huo'o ca ỹa'auaxaañi da nmitaique ca maiche laỹamaxa. Nachaqcata cam nataqa'en ishet da ỹaỹamaxaañi ca lỹa.

⁵ Qataq nataqa'en qoñiita'am qome da lataxac da lhuennataxac So Cristo Jesús:

⁶ Cha'aye So Cristo na'aictaxa co'ollaxa da 'eeta'am da lataxac Ñim Lo'onatac 'Enauacna, qalaxaye saishet da ỹectega da 'eeta'am Ñimaye.

⁷ Nachaqrata da, nqat da lataxac maye 'eeta'am Ñimaye, ime nache ỹe'enaxat da 'ena'ama qomi', qataq ivira'a da ỹacona da lataxac ca choche nlatac.

⁸ Qataq co'ollaq mashe ỹaatañi da lataxac ca shiỹaxaua, nache ỹacona da saishet da huo'o ca la'amaqchec. Qataq souaxat da ỹalaxaguet Ñim Lo'onatac 'Enauacna, nache ivitta'a da qaỹalauat, qaiuaxaneguet so npe'enaxaqui.

⁹ Qaq ỹoqo'oye Ñim Lo'onatac 'Enauacna, ỹanem Somaye da qaica ca 'ena'am la'amaqchec, qataq dam le'enaxat maye napacalec 'enauac na laỹepi da 'enec,

¹⁰ yaqto' 'enauac qome ishet da ỹa'alyiñi naua l-llectel, nam hueto'ot na piguem, qataq nam huetalec ana 'alhua, qataq nam huetaueegue da laỹe na 'alhua,

¹¹ qataq yaqto' 'enauac qaỹauattoota So Jesucristo da nacheso so Nataxala', qataq nache llo'oxoyec Ñim Qarta'a maye Lo'onatac 'Enauacna.

Nam quetague' So Cristo 'eeta'am aca lcoỹaraqte na shiỹaxauapi

¹² Qaq ỹoqo'oye qami' ñauochaxau' ỹaqaỹa't, cha'aye qami' nache 'eetai' naxa da aỹem qaualaqaiguet da qami' soota'agueta, qaq nagui da aỹem qaỹoqtaique, qalaq iuen da ỹactec da aỹem qaualaqaiguet. Ỹataqta qauo'onataxañiilec qome da qarca'alaqai, qataq ỹataqta qaualaqaiguet qataq ỹataqta lta'araic da 'enec qanqa'eñi Ñim Lo'onatac 'Enauacna.

¹³ Cha'aye Ñim Lo'onatac 'Enauacna, nacheñi ñi qami' ỹanema cam ỹaỹamaqchiguiñi maye qoñiitapeguec, qataq qami' itaua'n da ña qaumacheeta 'enauac camaye. Qaq damaye maiche chegoqchigui Ñimaye.

¹⁴ Qaq da huo'o ca qauo'oche, qalaq saishet da qautaqaitac, qataq saishet da qancotaitega't,

¹⁵ yaqto' saishet da huo'o ca qarasouaxashechi, qataq saishet da huo'o ca qami' qaỹasaxaleguete ca qarasouaxashechi. Ana'ana 'alhua nlaqtelec na shiỹaxauapi qauemaicpi, qataq 'etaxaloxoicpi, qami' qalaxaye qami' llalqa Ñim Lo'onatac 'Enauacna. Qaq ỹoqo'oye iuen da qoquiỹa'ai na qauemsat, nache qauachaxañi ca no'on qarataxaqui, qoñiita'am aca huaqaañi da 'ettaigui ye pe.

¹⁶ Saishet da qaỹa'axañiiñi da qaua'amaqchiñiitac de'era na'aqtac maye chegaqaigui da nca'alaxa. Yaqto' aỹem ishet da qami' ña'amaqteetaleguete que'eca na'a'q qom ñe'eguelaq So Cristo, qataq saỹateeta de'era ỹo'onataxanaxac, qataq de'era ña'añaxataxac da saishet da saqca ca naigui.

¹⁷ Qami' ỹataqta qaua'amaqchiñi Ñim Lo'onatac 'Enauacna qataq qauo'onataxañiitacot, qaq damaye 'eeta'am aca qarachetaqtaxanaqche. Qaq saiuena'a da aỹem qaỹalauat, nache que'eca ileuaxa ỹalectaigui aca qarachetaqtaxanaqche maye qaỹa'añiỹot Ñim Lo'onatac 'Enauacna. Qaq da sevira'aguet de'era, nache ỹataqta samachiguiñi qataq sauotaique da qami' ñetonaxau'.

¹⁸ Qaq nataqa'en da qoñiita qantoñiitapigui' qome, qataq qanhuañiỹaua'a da ñetonaxac.

So Timoteo qataq so Epafrodito

¹⁹ Qaq So Qarataxala' qom huo'otaq nacheso chegoqchigui, qaq saqaỹaloq qome da qami' samaxalo ñi Timoteo, da yaqto' nataqa'en saconeguet ca ỹa'añaxac qom huo'o ca ỹa'axaỹaxac da qoñiita.

²⁰ Cha'aye qaica ca lỹa da sela'a da ỹataqta 'eeta'am da iuennataxa, nachaqñita ñimaye. Qataq ñimaye nataqa'en ỹataqta iuennatapega da qoñiita.

²¹ Cha'aye 'enauac nam laỹepi ime'eguet da ỹo'ottac nam maiche lalamaxatpi, qaq de'era saishet da nachera da laỹamaxannatac So Jesucristo.

²² Qalaxaye qami' mashe qauaỹaañi da 'eetec da no'on lataxac ñi Timoteo, qataq da 'eetec da ñetaueetague' da sa'axataqtac da na'aqtac, 'eeta'am da maiche ỹalec.

²³ Qaq qom choche saỹaten ca 'eetec dam sootaigui, nache saqaỹaloq da samaq ñimaye, da yaqto' qami' nauaneto,

²⁴ qaq na'aictaxa da aỹem huo'o da ñaquitaxac Ñim Lo'onatac 'Enauacna da aỹem ỹami' da ishet da qami' ñeqo'onalo.

²⁵ Huo'o so na'a'q, nache qami' aỹem qanamaqỹa ñi qarqaỹa Epafrodito da yaqto' aỹem itauan 'enauac na iuenaxanaxa. Ñimaye ỹo'onataxanaxaua qataq iỹa da seloquiaqteguelec de'era na'aqtaxanaxac maye chegaqaigui da no'on na'axaỹaxac. Qaq nagui qalaq iuen da ñimaye qami' ỹe'eguelaxalo,

²⁶ cha'aye ñimaye huo'o da lyaxa da ỹoltaq qami' nauaneto. Ñimaye ỹataqta huo'o da 'eeta, souaxat da qara'axaỹaxaqui co'ollaxa da ñimaye sa no'on.

²⁷ Qaq 'eesa da huo'o so na'a'q da sa no'on ñimaye, hua'c da ỹoqta ileu, qalaxaye Ñim Lo'onatac 'Enauacna ỹataqta ichoxoren ñimaye, qataq nataqa'en aỹem yaqto' saishet da nquigaxatec da ỹaquicoxo.

²⁸ Qaq ỹoqo'oye ỹataqta sa saỹaloxon da qami' samaxalo ñimaye, yaqto' ỹataqta qauamaichiguiñi qom qaltaq qanauañi', qataq yaqto' aỹem saishet da queta da ỹaquicoxo.

²⁹ Qaq ỹataqta lta'araic qome da qantonaxaqui qom qauacoñiiguet ñimaye, qaupagaqñiichigui da lataxac da qaỹaconeguet ca lo'onataxanaxanec So Qarataxala'. Qauauochec qome nataqa'en ca 'eeta'am ñimaye.

³⁰ Cha'aye ñimaye mashe hua'c co'ollaxa da ileu, souaxat da do'onataxaatacot So Cristo. Qataq ỹataqta saishet da iteetega da nachaalataxac da ỹaneguet da lchecỹaxac, da yaqto' ishet da aỹem itaunec cam qami' saishet da aỹem qautauñic, souaxat da qami' qaỹoqtalo.