Ezequiel 9 - La'aqtaqa Ñim Lo'onatac 'Enauacna 2013

Qaila'a da nhuaxanaguec ye Jerusalén

¹ Qaq ime, nache sa'axaỹa so ỹataqta alam nvilỹaxac iqaqneuo'ogue na itela lauac, 'eeta': «¡Mashe nvi' nam ỹauo'o ca nhuaxanaguec na huaqta'a't nỹecpi, ñi 'oonolec namayepi nasoqta'a na lo'ogoxonaxat maye delaqtaxan!»

² Qaq huaña nache sela'alo soua seis shiỹaxau' da pa'areuo, tatreua'a ñi lasom lta'araic maye datata'ague da sheu', qaq ñi 'oonolec soomaye nasoqta'a so lo'ogoxonaxat. Qaq nache ỹalectaiguilo soomaye so ỹale maye ỹaatrañi soua alogo chegaqaigui na lino qataq nshettañi so lo'onataxanaxat da deraxan. Qaq soomaye pa'areuo, nache huera'a ye saqaỹapeque aso nca'atoxonaxalate bronce.

³ Qaq huaña nache da llo'oxoyec Ñim Natamnaxala' na Israel le'ecpi, ca'aisalo soua huo'oi naua laua't maye hueta'agueta co'ollaxa, nache taỹa ye ñegueuo aso atamnaxaqui. Nache Ñim Nataxala' iỹaxana so ỹale maye ỹaatrañi soua alogo maye chegaqaigui na lino qataq nshettañi so lo'onataxanaxat da deraxan,

⁴ nache 'enapega, 'eeta': «'Aucoleelec qome ye huaqta'a't nỹecpi ye Jerusalén, nache 'auauo'o ca la'anaxat na latap 'enauac nam huo'o da lta'araic laquicoxo, souaxat 'enauac nam ỹataqta qaiqaiga maye qaỹo'ottac da huaña yemaye.»

⁵ Ime qataq sa'axaỹa da 'enapegalo soua lỹa't ỹale't, 'eeta': «Qauca'acheetaueegue qome somaye da qaucoñeelec na huaqta'a't nỹecpi, nache saishet qome da huo'o ca qauchoxoyeñiitac.

⁶ Qauachegoqoichiguiña qome añi ỹalamaqte atamnaxaqui nache qaualauache na ỹa'axaiquipi, nsoxoppiolec qataq na qa'ampiolec, na ñaqpiolec qataq na 'alpi, nache qaviraxachiỹa'a da qaica ca no'onañi da nca'altauec. Qalaxaye saishet qome da huo'o ca qoñeeta'ac ca huo'o ca na'anaxat. Nache soomaye ỹalauat so ỹa'axaiquipi maye nachatto'ot aso atamnaxaqui.»

⁷ Ime qaltaq 'enapegalo soomaye, 'eeta': «Qanqo'oñiiua'a añi atamnaxaqui, nache qanshepaxanaqcheche, qanlaxacheetelec na leuaxaicpi ye nqasoxoc.» Nache soomaye jec da nqo'ona ye huaqta'a't nỹecpi, nache ỹalauat so shiỹaxauapi.

⁸ Qaq so ñaq ỹo'ottrac de'era soomaye, nache aỹem 'oonolec da ño'onañi. Qaq huaña nache sa'alyiñi naua illecte ñeqollemñi nache seviraxata'aguet na ỹatap na 'alhua, qaq souaxat da aỹem nlaxagui da ñiqui'ic nache sa'alaq, sheeta': «¿'Am Nataxala', peta'a 'aumatalec da 'arayeloxo na Jerusalén, qataq ivira'a da 'aulaxachigui nam saq 'amaqtaq no'onañi na Israel le'ecpi?»

⁹ Nache Ñim Nataxala' aỹem ỹasateguet, 'eeta': «Da lasouaxashet na nhuo' Israel qataq na Judá le'ecpi ỹataqta lta'araic. Ne'ena 'alhua ỹataqta nlaxagui da nalaataxanaxac, ne'ena huaqta'a't nỹecpi ỹataqta nlaxagui da sa nalogoñi lataxac. Namayepi ipettega da mashe sheca'ai ne'ena 'alhua, qataq sa sauangui nam ỹo'ottacpi.

¹⁰ Qaq ỹoqo'oye Aỹem saishet da sechoxoreetac qome namayepi, nacherata da talec ñaqa'en ca naigui dam qauem lataxac.»

¹¹ Qaq huaña nache som ỹale maye ỹaatrañi soua alogo maye chegaqaiguilo na lino qataq nshettañi so lo'onataxanaxat da deraxan ñe'eguelaq nache, 'eeta': «Mashe semat da so'ot som aỹem 'auamaxalec.»