Ezequiel 22 - La'aqtaqa Ñim Lo'onatac 'Enauacna 2013

Na lasouaxashetpi ye Jerusalén

¹ Ñim Nataxala' aỹem 'enapega, nache 'eeta':

² «'Am shiỹaxaua, 'aua'axat qome na lasouaxashet ne'ena huaqta'a't nỹecpi maye laataxanaxaic. Qataq 'auachaxana 'enauac nam qauem, qataq qaiqaiga maye ỹo'ottac,

³ qoneta': Da la'aqtac Ñim Nataxala', 'eeta': 'Am huaqta'a't nỹecpi maye 'aualauattac na 'am hueta'a shiỹaxauapi, qataq 'auo'ottac na nqolacpi da yaqto' 'anshepaxanaqchet da 'arataxac, ¡mashe nayeetai' ca 'araloqo'!

⁴ Qaq souaxat dam 'auo'ot 'aralaataxanaxac nache 'auo'ot da 'arasouaxashet, qataq souaxat na nqolacpi maye 'auo'ot co'ollaxa nache 'anshepaxanaqchet da 'arataxac, nache 'auo'ot da saqaỹaloq da 'am nvita ca 'araloqo', qataq da 'am nvita ca 'oga't. Qaq 'era da 'eetec da 'am so'otec qome da na nhuo' le'ecpi 'am isheuen, qataq da 'enauac na ỹotta'a't shiỹaxauapi 'am ỹe'eetac.

⁵ Qaq nam saqaỹapeque qataq nam qaỹoqta qalaq 'am ỹe'eetac qome, 'am huaqta'a't nỹecpi maye qauem da 'ana'aqtaguec souaxat da 'aua'amaqteetac na 'arqolacpi, qataq da 'arataxac maye qaica ca laỹamaqa'.

⁶ Na nta'alpi na Israel maye 'am netaigui, qalaq do'ogoxona da la'añaxac, qalaxaye nacherata da ỹo'ottac lalaataxanaxac.

⁷ Nam 'am hueta'a shiỹaxauapi, qalaq saishet da huo'o naqa'en ca 'enec ca lalamaxat lta'a, qataq aca late'e, qataq saiyacnapec na ỹaqa'a ca chegaqa'ague, qataq decachiỹot ana pa'aipi qataq na saploqpi.

⁸ Qataq qaica ca naigui naqa'en nam ỹalamaxat atamnaqa'pi, qataq ye na'a'q mataxaqui maye ỹalamaxat.

⁹ Qaq souaxat na latenataxanaxacpi namayepi, nache nam 'am hueta'api, huo'o na ỹasouaxateguet da ileu ñi lỹa, qataq huo'o na ỹalectaua'a na nquia'axacpi maye huaña ana lcomaraxalatepi da qaỹo'oxoren na nqolacpi, qataq ỹo'ot na lataxacpi maye qaiqaiga.

¹⁰ Qataq huo'o na huetapeeguet aca lhua ca lta'a, qataq huo'o na ỹayena'a da hue'eguet ana 'alo, da ñaq huetaigui da na'axac.

¹¹ Qataq huo'o na ncachetague' aca lhua ca lqaỹa, huo'otaq huetapeeguet aca late, qataq ncat aca ỹaqauga lqaỹa.

¹² Qataq nam 'am netaiguipi, huo'o na ỹaỹamaxareeta da qaisheeten da yaqto' ỹalauat ca lỹa. Qataq huo'o na ỹan ana alom da qaỹa'aalaxana, qalaxaye da qaisheeten nache ỹagaqnauec añi iỹaxanaique, qataq nhuo' ca lỹa, qataq sairen ca lqaỹa, nache icoua'ai Aỹem. Qaq 'era da ỹa'aqtac Aỹem Nataxala'.

¹³ Aỹem ỹataqta salemata, souaxat da 'arhuotaxanaxac qataq da 'aralaataxanaxac.

¹⁴ Qaq saishet qome da 'aupettega da 'aushet da aỹem 'auataỹa'aguet, qom 'am sataiguet da 'am ñemit. Qaq 'era da ỹa'aqtac Aỹem Nataxala', qaq damaye sepacchigui qome da so'ot,

¹⁵ so'ot qome da 'aualecta'aguet na ỹotta'a't shiỹaxauapi, qataq so'ot da 'anqo'ona 'enauac nam ỹotta'a't 'alhuapi, nache imauec da seỹouec na 'arshepaxanaxa,

¹⁶ qaq huo'o qome da 'ara'agaxa da 'am ilota'a na ỹotta'a't shiỹaxauapi, qalaxaye huaña qome nache 'auaỹaten da Aỹem nachaỹem Nataxala'.»

¹⁷ Ñim Nataxala' aỹem 'enapega, nache, 'eeta':

¹⁸ «Na nhuo' Israel le'ecpi, qalaq 'eeta'am ñaqa'en ca lsoche na cobre, estaño, lcat, qataq na plomo, huo'otaq na lcat plata, maye no'onaigui aca nqatelaxanaxaqui da ime da qanqateltac.

¹⁹ Qaq ỹoqo'oye Aỹem Nataxala', shenapec: Qaq cha'aye qami' qoñeeta'am ca lasogoñi, nache Aỹem qami' llaỹona't qome, nache qami' sachanguilo na laiñi ye Jerusalén.

²⁰ Qaq 'eeta'am ca lcat plata, cobre, lcat, plomo, qataq ca estaño da camayepi qaỹasaxaigui aca nqatelaxanaxaqui, qataq qaỹe'eraxatoigui ca norec da yaqto' qanqatel, qaq nache sheetec qome Aỹem da so'ogoxona dam chaqaic ỹayeloxo da qami' llaỹona't da yaqto' qami' ñeqate'l.

²¹ Aja', Aỹem se'eraxatoigui qome ca norec, maye nachera da ỹayeloxo, nache qami' llaỹona't qome nache qami' sachanguilo na laiñi ye huaqta'a't nỹecpi da qami' ñeqate'l.

²² Qaq 'eeta'am da 'eetec da qanqatel ca lcat plata qaỹachaigui aca nqatelaxanaxaqui, qaq nache 'eetec qome da qami' qanqate'l, qom huangui ye laiñi ye huaqta'a't nỹecpi. Qaq huaña qome nache qauaỹachiñi da Aỹem Nataxala', qami' semataleguete da ỹayeloxo.»

²³ Ñim Nataxala' aỹem 'enapega, nache 'eeta':

²⁴ «'Am shiỹaxaua qonapega na Israel qoneta': 'Am 'alhua, huo'o da 'anhuaxanaguec, qaq qaica da 'am talec auot, qataq 'etaxat,

²⁵ na nta'alpi maye hueta'a ne'ena 'alhua, qalaq 'eeta'am na llonpi da desoqtai', qataq icolaxattac ca loxonec, qataq chec nam shiỹaxauapi da huaña na na'alhua, qataq decachiỹa na no'on logoxoshetpi, qataq da lsallaxa, qataq ỹo'ot da nquiguec ye lcata ana pa'aipi.

²⁶ Qaq na ltaxaỹaxanaxanecpi qalaq ỹashaxaarec naua ỹapaxaguenataxanaxaco, qataq nshepaxanaqchet nam ỹalamaxat ndaqa'pi maye sa qaishetapec, qataq saishet da ỹataqta naqa'en nam saqaishetapec qataq nam nshepaxan, qataq saishet da ỹapaxaguen ca lỹa da yaqto' ỹauatton ca qui'itta qataq ca nshepaxan. Qataq saishet da qochetega ye na'a'q mataxaqui maye ỹalamaxat, qataq saishet da Aỹem ỹo'oxoren.

²⁷ Na nataxala'pi ne'ena 'alhua, qalaq 'eeta'am na qa'alaqpi da icolaxattac ca loxonec, qataq ỹataqta iyaqta'a da lalaataxanaxac, da ỹalauat na shiỹaxauapi da yaqto' desalligui.

²⁸ Na na'aqtaxanaxanecpi qalaq ỹoxooñi da 'eesa lataxac, 'eeta'am ca da'amnaxana ca lapagaxaic da ỹa'amen ca hueque, 'eetega huo'o na lauanaqchecpi, qataq ỹa'axattac nam saq'enpi. Namayepi 'eetega chegoqchigui naqa'en da ỹe'enaxat da da'aqtaxaatac, qamaq saishet da 'eesa da ña'aqtaxaatague'.

²⁹ Nam 'amaqtaqaicpi qalaq nalemaqte' da lcachaxac, qataq qaica ca iren, qataq nhuottalec na choxoraqpi qataq na huo'o da lhuenaxanaxa, qataq saiyacnapec nam ỹaqa'a ca chegaqa'ague, na'aictaxa da qaica ca ỹasouaxat.

³⁰ Aỹem ñimittapigui ne'ena shiỹaxauapi, da huo'otaq huo'o ca iueelec ne'ena 'alhua, huo'otaq da Aỹem iỹaxanot da yaqto' saishet da selaxachigui, qalaxaye Aỹem saishet da sanata.

³¹ Qaq ỹoqo'oye sematalec da ỹayeloxo namayepi, qataq serolec da le'eraxa da inogoxonaxac da selaxachigui, da yaqto' talec namayepi dam qauem maye naigui na ỹo'ottacpi co'ollaxa. Qaq 'era da ỹa'aqtac Aỹem Nataxala'.»