Ezequiel 15 - La'aqtaqa Ñim Lo'onatac 'Enauacna 2013

Ye Jerusalén 'eeta'am aca uva lcheyec maye qaica ca naigui

¹ Ñim Nataxala' aỹem 'enapega, 'eeta':

² «'Am shiỹaxaua ¿negue't cam 'onaxaic aca lamo aca uva lcheyec da ishet da qanaloqneguet ca lỹa 'epaq maye qaỹachegoxotaigui ana qo'oipaqpi maye naigui na aviaq?

³ Cha'aye aca'aca lamo acamaye qaica ca naigui, ¡qataq saishet da taiguet da choche nogoxot la'araxaqui!

⁴ Qaq acamaye taiguet da choche lalonaxat ca norec. Qaq ca norec da ỹavigaxa't naua lsheeneqa, qaq na laiñi qalaq nda'a't poqo, qaq ¿peta'a huo'o ca naigui?

⁵ Ye, co'ollaq ñaq neta'a't, nache qaica ca naigui, qaq nagui da mashe ỹavic, nache ¿huo'o peta'a ca naigui?

⁶ Qaq ỹoqo'oye Aỹem Nataxala', shenapec: Qaq de'era 'eetec aso lamo aso uva lcheyec, da qaỹasaxangui ca norec da yaqto' ỹavic, qaq nache 'eetec qome da sasaxangui ca norec na lma' ye Jerusalén.

⁷ Aỹem sataỹa'aguet qome namayepi. Namayepi dataueeguesop qome ca norec qalaxaye ca lỹa norec loxonec qome namayepi. Qaq qom sataỹa'aguet namayepi, nache ỹaỹaten da nachaỹem maye Aỹem Nataxala'.

⁸ Qaq souaxat na lasouaxashetpi namayepi, nache she'eguelaxata qome da toolec na na'alhua namayepi. Qaq 'era da ỹa'aqtac, Aỹem Nataxala'.»