Éxodo 9 - La'aqtaqa Ñim Lo'onatac 'Enauacna 2013

Da nhuaxanaguec so 'atetpi

¹ Nache Ñim Nataxala', 'enapega so Moisés, 'eeta': «'Anqo'oneua'a qome ñi faraón, nache qonapega, qoneta': ‹Ñim Nataxala' maye Natamnaxala' na hebreopi da la'aqtac, 'eeta': 'Aua'aqta'a qome da jec na ỹalamaxatpi, da yaqto' aỹem natamnot.

² Cha'aye qom saishet da 'aua'aqta'a da jec qataq nache queta da 'anlletañi,

³ nache Ñim Nataxala' namaq qome da la'añaxac, talec naqa'en na 'ana'atetpi maye huetauga na no'onaxa, nache huo'o qome ca lapiina lta'araic. Nache ileu na caipi, 'ashenapi, nauanaxanaxapi, huacapi qataq ana qaguetapi›.

⁴ Qalaxaye Ñim Nataxala' iỹotauga qome na na'atetpi na Israel le'ecpi qataq na Egipto le'ecpi, da yaqto' saishet da ileu ca 'oonolec na na'atetpi na Israel le'ecpi.»

⁵ Qataq Ñim Nataxala' ỹauo'o so laloqnec, nache 'enapeco': «Qonte', qaq huetoigui da so'ot de'era».

⁶ Qaq so lỹa na'a'q, nache Ñim Nataxala' ỹo'ot de'era. Nache 'enauac so Egipto le'ecpi ileu so na'atetpi, qaq so Israel le'ecpi saishet da huo'o ca 'oonolec so na'atetpi da ileu.

⁷ Nache so faraón damaxasoxoneuga da qaimeten so na'atetpi so Israel le'ecpi, nache ỹa'aalatec da saishet da huo'o ca 'oonolec da ileu. Qalaxaye ñaqaiyeta ỹataqta qaramchigui añi lquiyaqte, nache saishet da ỹashenec da jec so Israel llalaqpi.

Qaiuaxanaxana so nquesaxa

⁸ Nache Ñim Nataxala', 'enapega so Moisés qataq so Aarón, 'eeta': «Qauacoñiỹa qome ca alo, qauachegoxochiỹaigui aca nqatelaxanaxaqui. Ime, nache da Moisés ỹasaxasheguem, ỹauaachigui qome naqa'en ñi faraón.

⁹ Qaq que'eca alo nañigui qome na namoxoỹaxa, nache nlaxattelec 'enauac na 'alhua, yaqto' nasheguem na lquesaxa 'enauac na shiỹaxauapi, qataq nam shiguiỹacpi maye hueta'a ne'ena 'alhua Egipto.»

¹⁰ Nache so Moisés qataq so Aarón, ỹacoora so alo, ỹachegoxotraigui aso nqatelaxanaxaqui. Ime, nache je'c, nqo'ooreua'a so faraón. Huaña, nache so Moisés ỹasaxasheguem so alo, nache so shiỹaxauapi qataq so shiguiỹacpi ỹataqta imoota na lo'oc na lquesaxa.

¹¹ Qaq so 'oiquiaxaipi mashe saishet da dataỹa'aguet so Moisés, cha'aye somayepi nataqa'en imoota na lo'oc na lquesaxa, nache 'eeta'am 'enauac so netaña ye Egipto.

¹² Qalaxaye Ñim Nataxala' ỹo'otec da ỹataqta qaramchigui naqa'en añi lquiyaqte so faraón, da yaqto' saishet da ỹoqocha'a so Moisés qataq so Aarón. Qaq ipacchigui dam la'aqtac co'olloxoche 'eetega so Moisés.

Qaiuaxanaxana aso lache

¹³ Nache Ñim Nataxala' 'enapega so Moisés 'eeta': «'Ano'ottasheguem qonte' nte'etom. Ime, qaq 'anqo'oneua'a ñi faraón, nache qonapega, qoneta': Ñim Nataxala' maye Natamnaxala' na hebreopi da la'aqtac, 'eeta': 'Aua'aqta'a qome da jec na ỹalamaxatpi, da yaqto' aỹem natamnot,

¹⁴ cha'aye nagui aỹem sauotaique da 'am ñamaxa 'enauac na ihuaxanaxanaxatpi qataq na 'artauapi qataq na 'arhuo' le'ecpi, yaqto' 'am 'auaỹateeta da Aỹem qaica ca lỹa sheeta'am 'enauac ana 'alhua.

¹⁵ Qaq ỹoqo'oye 'am sachaxana da ỹa'añaxac da 'am seuaxan qataq na 'arhuo' le'ecpi, qami' seroleguete ca napiina, nache ishet da qami' pa'l ana 'alhua.

¹⁶ Qalaxaye aỹem 'am ñeca'alaxattauec, da yaqto' 'auauaachigui da ỹa'añaxac, qataq aỹem ỹauatton 'enauac na huetalec ana 'alhua.

¹⁷ Qalaq ñaqaiyeta 'am ña 'anqanaxattac na ỹalamaxatpi, qataq saishet da 'auashen da jec.

¹⁸ Qaq ỹoqo'oye qonte' 'eeta'am nagui, nache ñanacot aca qalota lache maye saishet da ỹauanapega da talec 'enauac na Egipto soua hua'au' vi'iye.

¹⁹ Qaq ỹoqo'oye 'auamaxasoxoolec da qaỹaỹamaxatchiguiñi ca lma' na 'ana'atetpi qataq 'enauac na 'aralamaxat maye huetauga na no'onaxa, cha'aye qom naañi aca lache, nache ỹalauat 'enauac na shiỹaxauapi qataq na shiguiỹacpi maye nasattalec qataq saishet da hueto'ot ca nỹec lapo'.»

²⁰ Qaq huo'o so ltauapi so faraón so ñi'iỹa de'era la'aqtac Ñim Nataxala', nache ỹauo'o so lma' so l-latacpi qataq so na'atetpi.

²¹ Qaq som saishet da 'en naqa'en de'era la'aqtac Ñim Nataxala', nache hua'aqta'a so l-latacpi qataq so na'atetpi da nasattalec.

²² Nache Ñim Nataxala' 'enapega so Moisés, 'eeta': «'Auachaxaasheguemec na 'arhuaq na piguem, yaqto' 'enauac na Egipto talec aca lache, qataq na shiỹaxauapi qataq na shiguiỹacpi, qataq ana nañiguishecpi maye huetaleguete naua lanaxanaqa'ate na Egipto le'ecpi».

²³ Nache so Moisés ỹachaxaasheguemec na piguem aso lashelte, nache Ñim Nataxala' namaq so nalataxa, nqashelgaxa qataq aso lache da talec na 'alhua ye Egipto.

²⁴ Nache naañi aso lache ỹataqta qaica ca loga't, ỹalecteguet so nqashelgaxa. Qaq 'enauac da chegoqta'ague ye Egipto, co'ollaq cheta'ague da no'otchiguiñi, ỹataqta sa ỹauanapega da nache 'eetec da huo'otaq naañi aca qalota lache.

²⁵ Nache aso lache ilaxachigui 'enauac som huetalec ye na'alhua na Egipto le'ecpi: ilaxachigui so shiỹaxauapi qataq so shiguiỹacpi qataq 'enauac aso nañiguishepi maye huetaleguete naua nanaxanaqa'ate. Nataqa'en inoxo'n naua lcoue 'enauac aso qo'oipaqpi yem 'alhua Egipto.

²⁶ Qaq nachaqyeta ye 'alhua Gosén, maye netalec som Israel le'ecpi da saishet da talec aca 'oonole lache.

²⁷ Nache so faraón damaxasoxoneuga so Moisés qataq so Aarón, nache 'enapegalo', 'eeta': «Aỹem ñauattootela't da huo'o da ỹasouaxashet. Qaq damaye maiche ỹasouaxashet qataq na ihuo' le'ecpi, qaq saishet da nacheñi Ñim Nataxala'.

²⁸ Qaq cha'aye mashe qalota na nalataxa qataq ana lache maye namaq Ñim Lo'onatac 'Enauacna, qaq nagui saishet qome da qami' ñellerañi. Qalaxaye qauỹaxañiỹot qome Ñimaye da qomi' qanqouagaxauñeeleguete, yaqto' qami' sasheetrec da qoqui.»

²⁹ Nache so Moisés, 'enapeco': «Qom choche senoxoneueegue da laỹe ne'ena nỹecpi, nache sachaxaayishigue'm naua ihua'q da ñeqouagaxaunot Ñim Nataxala', yaqto' vi'iiguet ana lache qataq na nalataxa, yaqto' 'am 'auaỹateeta da ana 'alhua lalamaqte Ñim Nataxala'.

³⁰ Qalaxaye aỹem saỹateeta da 'am qataq na 'artauapi saishet da huo'o ca lcolanaxa Ñim Lo'onatac 'Enauacna maye Nataxala'.»

³¹ Nache soua nanaqa'ate na lino qataq na cebada ỹataqta nlachiyiñi, cha'aye so cebada mashe huo'o co'ollaxa na ala, qaq na lino qalaxaye ñaq ndotec ana lauoxo.

³² Qalaxaye na trigo qataq na centeno qaica cara, cha'aye saxanaxa da ñaxat.

³³ Nache so Moisés co'ollaq mashe inoxoneueegue da laỹe so nỹecpi, co'ollaq mashe ime da detaqtague' so faraón, nache ỹachaxaayishegue'm naua lhua'q da natamnot Ñim Nataxala'. Nache vi'iteguet aso lache, qataq so nalataxa, nataqa'en so auot.

³⁴ Qalaxaye so faraón co'ollaq ila'a da vi'iiguet so auot qataq aso lache qataq so nalataxa, nache qaltaq ỹe'eguelaxalec da ỹauo'o da lasouaxashet. Qaq saishet da nachesota somaye da qaramchigui añi lquiyaqte, nataqa'en so ltauapi.

³⁵ Nache so faraón qaltaq ỹe'eguelaxalec da qaramchigui añi lquiyaqte, nache qaltaq saishet da ỹashenec da jec so Israel le'ecpi. Qaq ipacchigui da la'aqtac Ñim Nataxala' co'ollaq 'eetega so Moisés.