Éxodo 8 - La'aqtaqa Ñim Lo'onatac 'Enauacna 2013

Qaiuaxanaxana aso miỹo

¹ nache Ñim Nataxala' 'enapego' so Moisés, 'eeta': «'Anqo'oneua'a qome ñi faraón, nache qonapega, qoneta': Ñim Nataxala' da la'aqtac, 'eeta': 'Aua'aqta'a qome da jec na ỹalamaxatpi, da yaqto' Aỹem natamnot.

² Qaq qom saishet da 'aua'aqta'a da jec namayepi nache aỹem seuaxanec qome aca miỹo 'enauac na 'ana'alhua.

³ Nache so tala ỹataqta demalle ñaqa'en qome aca miỹo. Ime, qaq chegoqchiguingui qome somaye aca miỹo da taigui ñi 'arma' lta'araic qataq yem 'aro'ochaqa' qataq nam lma'pi na 'artauapi qataq 'enauac nam 'arhuo' le'ecpi qataq ana nqatelaxanaxaquipi qataq ye ndaqnaxanaqa' da qaỹo'ot ana nauole 'ayiiña.

⁴ Qataq tasheguemec qome ye 'arma' aca miỹo qataq na 'artauapi qataq 'enauac na 'arhuo' le'ecpi.»

⁵ Nache Ñim Nataxala' 'enapego' so Moisés, 'eeta': «Qonapega qome ñi Aarón da ỹachaxaasheguem na lhuaq, naloqteetelec naqa'en ara lashelte so tala qataq na la'auaxacpi qataq na qa'aimpi, yaqto' chegoqchiguingui somaye aca miỹo da nnoxoosheguem, da yaqto' talec 'enauac na 'alhua na Egipto.»

⁶ Nache so Aarón, ỹachaxaasheguem na lhuaq da naloqteetelec 'enauac aso laỹe'pi na 'etaxat ye Egipto, nache 'enauac ye Egipto ỹataqta nlaqtelec ana miỹo maye nnoxoosheguem.

⁷ Qaq som 'oiquiaxaipi nataqa'en ỹo'ot da lo'oiquiaxac, nataqa'en nauegueua'alo naua 'aleu' ye Egipto ana miỹo.

⁸ Nache so faraón damaxasoxoneugalo soua Moisés qataq so Aarón, nache 'enapegalo', 'eeta': «Qanqouagaxauñiỹot qome Ñim Nataxala', da yaqto' nqateeguesop aỹem ana miỹo qataq 'enauac na ihuo' le'ecpi, yaqto' aỹem sasheetec qome da jec na 'arhuo' le'ecpi, da yaqto' ỹo'ot aca lachetaqtaxanaqte da ỹanot Ñim Nataxala'».

⁹ Nache so Moisés, ỹasateguet so faraón, nache 'enapeco': «Ñaq aỹem 'aua'aqtaxanem ¿chaq lagui qaq 'auauotaique da aỹem 'am ñeqouagaxaueelec qataq nam 'artauapi qataq nam 'arhuo' le'ecpi, da yaqto' ana miỹo 'am ca'ai qataq ñi 'arma' lta'araic, nache ndotec so tala da huetangui?»

¹⁰ Nache so faraón 'enapeco': «Qomye qonte'.» Nache so Moisés 'enapeco': «Aja', nache ipacchigui qome de'era 'ara'aqtac, yaqto' 'am 'auaỹateeta da qaica ca 'ena'am Ñim Nataxala' maye Lo'onatac 'Enauacna.

¹¹ Qaq huaña qome nache 'am ca'ai ana miỹo qataq ñim 'arma' lta'araic, qataq na lma' na artauapi qataq na 'arhuo' le'ecpi nache ndotec so tala da huetangui anamaye.»

¹² Nache so Moisés qataq so Aarón, quera'ai so nỹec lta'araic maye lma' so faraón. Qaq co'ollaq ime de'era, nache so Moisés nqouagaxaunot Ñim Nataxala', souaxat aso miỹo maye maiche namaxaua'a Ñimaye so faraón.

¹³ Nache Ñim Nataxala', ỹasateguet da lashelaxanaxac so Moisés. Huaña, qaq ileu aso miỹopi maye huetaiguilo naua nỹaqa qataq na qasoxocpi qataq na no'onaxa.

¹⁴ Nache so shiỹaxauapi natotac aso miỹopi leuaxai, qataq qalapoosheguem, ỹoqo'oye 'enauac yem qanayeuta'a 'alhua ỹataqta sa la'axaic na lchegueraxa.

¹⁵ Qalaxaye so faraón co'ollaq cara'acolec da ila'a da huesapeguelec, nache qaltaq ipactegue da ỹataqta qaramchigui añi lquiyaqte, nache saishet da ỹoqocha'a so Moisés qataq so Aarón. Qaq ipacchigui dam 'enapec co'olloxocheye Ñim Nataxala'.

Qaiuaxanaxana aso 'aỹat

¹⁶ Nache Ñim Nataxala' 'enapega so Moisés, 'eeta': «Qonapega qome ñi Aarón da ỹachaxaasheguem aca lashelte. Ime, qaq iuaxanoigui ca namoxoỹaxa da yaqto' nañigui 'aỹat nache talec 'enauac na Egipto».

¹⁷ Qaq 'era da 'eetrec soomaye. Qaq so Aarón nache ỹachaxaasheguem na lhuaq. Ime, nache iuaxanoigui so namoxoỹaxa, nache 'enauac so namoxoỹaxa ye Egipto nañigui 'aỹat. Nache asomaye ỹataqta sa ỹalemaxat so shiỹaxauapi qataq so shiguiỹacpi.

¹⁸ Nache so 'oiquiaxaipi nataqa'en huotaique da nauegueuo ana 'aỹat qalaxaye saỹañoxot. Qaq ỹoqo'oye aso 'aỹat ỹataqta lamaaxa sa ỹauo'o ca ldaqa' so shiỹaxauapi qataq so shiguiỹacpi.

¹⁹ Nache so 'oiquiaxaipi 'enapega so faraón, 'eeta': «Nacheñi Ñim Lo'onatac 'Enauacna ñim ỹo'ottac 'enauac de'era.» Qalaxaye so faraón ñaqaiyeta ỹataqta qaramchigui da lquiyaqteỹaxac, qaq saishet da ỹoqocha'a de'era. Qaq ipacchigui dam 'enapec co'olloxocheye Ñim Nataxala'.

Qaiuaxanaxana aso ncoga

²⁰ Nache Ñim Nataxala' 'enapega so Moisés, 'eeta': «'Ano'ottasheguem qonte' nte'etom. Ime, qaq 'anqo'oneua'a ñi faraón, cha'aye qonte' naxaama so tala ñemaxa. Ime, qaq qonapega, qoneta': Ñim Nataxala' da la'aqtac, 'eeta': 'Aua'aqta'a qome da jec na ỹalamaxatpi, da yaqto' Aỹem natamnot.

²¹ Cha'aye qom saishet da 'auashen da jec namayepi, nache aỹem 'am ñamaxa qome aca ncoga qataq 'enauac na 'artauapi, qataq nam 'arhuo' le'ecpi nataqa'en na 'arma'pi. Qaq ỹataqta nlaqchiguilo qome naua lma'ate na Egipto le'ecpi aca ncoga, ivira'alo naua lapiaqa'ate.

²² Qalaxaye qom ivita da ipacchigui de'era, qaq aỹem qome seỹotauga ye 'alhua Gosén, yem netalec ye ỹalamaxatpi. Yemaye qome saishet da huo'o aca 'oonole ncoga, yaqto' 'am 'auaỹateeta da Aỹem, maye Nataxala', soota'a ne'ena 'alhua.

²³ Qaq aỹem seỹotauga qome na ỹalamaxatpi, nataqa'en nam 'aralamaxatpi. Qaq damaye nache huetoigui qonte'.»

²⁴ Qaq 'era da 'eetec Ñim Nataxala'. Ime, qaq anac aso ỹataqta qalota ncoga, nache taua'a so lma' lta'araic so faraón, qataq so lma'pi so ltauapi qataq 'enauac ye 'alhua Egipto. Qaq souaxat aso ncoga, nache 'enauac ye 'alhua na'aqchet.

²⁵ Nache so faraón damaxasoxoneuga so Moisés qataq so Aarón. Nache 'enapegalo', 'eeta': «Qauesomiỹa qome, qauavigaxache aca qarachetaqtaxanaqche. Ime, qaq qaỹa'añiỹot Ñim Qanatamnaxala'ai, qalaxaye nache qoñiita'a ne'ena 'alhua.»

²⁶ Nache so Moisés 'enapeco': «'A'i, sa ỹaỹamaxañi qome damaxa, cha'aye nam shiguiỹacpi maye sanqot Ñim Nataxala' maye Lo'onatac 'Enauacna, namaye ỹataqta saishetapec na Egipto le'ecpi. Cha'aye na Egipto le'ecpi da huo'otaq qomi' ỹauaachiguilo da savigaxataq ca 'oonolec na shiguiỹacpi maye natameetacot namayepi, qaq yo'oqta da qomi' ỹalaua't, qomi' iroleguete na coma' da qomi' ỹasa'q.

²⁷ Qaq no'on qome da ñeqo'onaxa ye toolec 'alhua, yemaye ivi' naua tres na'axa'te, qaq soviraxa. Huaña qome yemaye, qaq savigaxataq aca qarachetaqtaxanaqte da sanqot Ñim Nataxala' maye Qanatamnaxala', da yaqto' qomi' sepagaqtelec da la'aqtac Ñimaye.»

²⁸ Nache so faraón 'enapeco': «Aỹem qami' sasheetrec da qanqo'oñiỹa ye toolec 'alhua, da yaqto' qauavigaxache aca qarachetaqtaxanaqche da qaỹa'añiỹot Ñim Nataxala' maye Qanatamnaxala'ai. Qalaxaye saishet da ỹapactec qami' qaỹoqteguelo. Qaq nataqa'en aỹem qanqouagaxauñeelec qome».

²⁹ Nache so Moisés 'enapeco': «Qom choche sheca'ai ne'ena, nache aỹem seỹaxanot Ñim Nataxala', da yaqto' nqateeguesop 'am ana ncoga nataqa'en na 'artauapi qataq na 'arhuo' le'ecpi, qalaxaye saishet qome da choche qomi' 'auatenachetta'ape da 'anqanaxattac na Israel le'ecpi, da yaqto' jec da ỹavigaxat aca lachetaqtaxanaqte da ỹanot Ñim Nataxala'».

³⁰ Qaq co'ollaq choche huenoxonec so Moisés, da ca'ai so lma' lta'araic so faraón, nache nqouagaxaunot Ñim Nataxala'.

³¹ Nache Ñim Nataxala' ỹasateguet da lashelaxanaxac so Moisés. Huaña, nache aso ncoga ca'ai so faraón, nataqa'en so ltauapi qataq som lauo' le'ecpi.

³² Qalaxaye so faraón qaltaq ỹe'eguelaxalec da qaramchigui añi lquiyaqte, nache saishet da ỹashenec so Israel le'ecpi.