Éxodo 39 - La'aqtaqa Ñim Lo'onatac 'Enauacna 2013

Soua alogo so ntaxaỹaxanaxanecpi

¹ Qaq da lo'oxoỹaxa'c soua anogo da qaỹacoolec na no'onatacpi so npe'l, qalaq imalaqalec, tocalec, qataq togaxaraic da lo'oxoỹaxac. Nataqa'en soua alogo so Aarón da ntaxaỹaxanaxanec, qaỹe'enaxatchigui da lamaxasoxonaxac Ñim Nataxala' co'ollaq 'enapega so Moisés.

² Qaq co'ollaq qaỹo'ot so nhuomaigui lomaxaqui le'enaxat efod, nache qaỹo'onataxana so lcat oro, qataq so hualoq laỹe imalaqalec, tocalec, togaxaraic qataq so ỹoqta no'on lino.

³ Qataq qairapaqchen so lcat oro. Ime, nache qanchiguiñi 'eeta'am qanqa'en ca ntetaxanaxat da yaqto' leraxat so hualoq laỹe imalaqalec, tocalec, togaxaraic da lo'oxoỹaxac, qataq so no'on lino.

⁴ Qaq se'eso nhuomaigui lomaxaqui le'enaxat efod, qaỹo'o't soua lallagui'ishe da yaqto' ncoñetta't.

⁵ Qaq so lasot alaxa so nhuomaigui lomaxaqui nataqa'en qaỹachegoxotaigui na oro, qataq na hualoq laỹe imalaqalec, tocalec, togaxaraic qataq na no'on lino, nache qaỹe'enaxatchigui da lamaxasoxonaxac Ñim Nataxala' co'ollaq 'enapega so Moisés.

⁶ Qaq soua coma'ye cornalina maye qoỹanaguilo somaye, nache qalapaxaleguete so lcat oro soua le'enaqa'ate soua llalqa so Israel, 'eeta'am qanqa'en aca na'anaxanaqte.

⁷ Ime, nache so Besalel ỹanaguilo soomaye soua lallagui'ishe so nhuomaigui lomaxaqui le'enaxat efod, da yaqto' saishet da qaicoua'ai soua le'enaqa'ate soua llalqa so Israel, nache qaipacchigui da lamaxasoxonaxac Ñim Nataxala' maye ỹamaxalec co'ollaxa so Moisés.

⁸ Qaq so ntogue lapoxot le'enaxat pectoral, nataqa'en huo'o so leraxat 'eeta'am da no'onataguec so nhuomaigui lomaxaqui maye chegaqaigui na lcat oro, qataq na hualoq laỹe imalaqalec, tocalec, togaxaraic da lo'oxoỹaxac qataq na no'on lino.

⁹ Qataq nalochiguiñi qanqa'en, qataq ivi' veintidós centímetros 'enauaque soua laỹel.

¹⁰ Ime, nache qalapaxalec so ỹataqta no'on da lo'oxoỹaxac coma'piolec, so hua'auchiyiñi hua'axagui, tres soua coma'yolqa qoỹanaguilo inoicchiyiñi qanqa'en. Ñi 'oonolec qalapaxalec na rubí, crisólito, qataq na esmeralda,

¹¹ qaq so lỹa hua'axagui qalapaxalec so 'oonolec granate, zafiro, qataq so jade,

¹² qaq so lỹa hua'axagui qalapaxalec so 'oonolec jacinto, ágata, qataq so amatista,

¹³ qaq so pa'atec hua'axagui, qalapaxalec so 'oonolec topacio, cornalina, qataq so jaspe. Qaq co'ollaq qalapaxañi somayepi nache qalapaxalec na oro,

¹⁴ qaq soua coma'ye ivi' doce, cha'aye nacheye ye lcata soua llalqa so Israel. Qaq ñi 'oonolec se'esoua coma'ye nache qoỹettalec da le'enaxat ñi 'oonolec soua llalqa so Israel 'eeta'am aca na'anaxanaqte.

¹⁵ Nataqa'en se'eso ntogue lapoxot le'enaxat pectoral huo'oi soua lallagui'ishe qaipaxatte', chegaqaiguilo na lcat oro.

¹⁶ Qataq dos soua lapaxasoxola'ate lcat oro, qataq soua dos la'aitel chegaqaigui nataqa'en na lcat oro, nache qoỹanaguilo 'enauaque soua laỹel se'eso ntogue lapoxot le'enaxat pectoral.

¹⁷ Qaq se'esoua qaipaxata'aguelo lcat oro, nache tachiviiguilo qanqa'en se'esoua la'aitel.

¹⁸ Nache se'esoua lsheeneqa soua npaqtaqa qaiqotaxana'agueta soua lallagui'ishe so nhuomaigui lomaxaqui le'enaxat efod.

¹⁹ Nataqa'en qaỹo'o't soua lỹa't dos la'aitel chegaqaigui na oro, nache qoỹanaguilo so pa'aguiñi so ntogue lapoxot da qota'aguet qanqa'en so nhuomaigui lomaxaqui le'enaxat efod.

²⁰ Qataq qaỹo'o't soua lỹa't la'aitel da yaqto' qoỹanagui so dataỹaueegue so ntogue lapoxot, qataq sa qaỹapeque so lasot alaxa.

²¹ Ime, nache qaỹauaxaỹaxana't se'esoua la'aitel so ntogue lapoxot pectoral, qataq soua la'aitel so nhuomaigui lomaxaqui efod, qaỹauota'a so lquet hualoq laỹe imalaqalec, yaqto' se'eso ntogue lapoxot qataq so nhuomaigui lomaxaqui, saishet da huesoguilo. Huaña nache ipacchigui da lamaxasoxonaxac Ñim Nataxala' maye ỹamaxalec co'ollaxa so Moisés.

²² Qaq 'enauac se'eso nhuomaigui lomaxaqui chegaqaigui na hualoq laỹe imalaqalec.

²³ Qaq naua laỹel so lqosot se'eso nhuomaigui lomaxaqui, ỹataqta sansatta qanqa'en yaqto' saishet da colaqa'ague.

²⁴ Qaq aso llo'oxoraqtepi soua laỹel se'eso nhuomaigui lomaxaqui, nache qoỹanagui aso ne'enaqta ala ana granada chegaqaigui na hualoq laỹe imalaqalec, tocalec, togaxaraic, qataq na no'on lino.

²⁵ Qataq qaỹo'ot nataqa'en aso latoinapi lcat oro, nache ỹaleeguet aso ne'enaqtapi ala ana granada, nache qoỹanaua'alo soua laỹel

²⁶ se'eso nhuomaigui lomaxaqui, da qaỹacoolec da no'onataxanaxac, qataq qoỹanaguilo soua laỹel somaye aso latoinapi, qataq aso ne'enaqtapi ala ana granda. Nache ipacchigui da lamaxasoxonaxac Ñim Nataxala' maye ỹamaxalec co'ollaxa so Moisés.

²⁷ Qaq aso lapoto so Aarón qataq soua llalqa, chegaqaigui na hualoq lino, qaq soomaye nache lo'onataqa so no'oxonec lo'o,

²⁸ nache 'ena'ama soua lqaic alaxa, qataq na lo'oxoraxa't soomaye qataq naua lpa'axanaqtel soomaye, nache chegaqaigui na no'on lino,

²⁹ qataq so lasot alaxa nataqa'en chegaqaigui na no'on lino, qataq na hualoq laỹe imalaqalec, tocalec, togaxaraic da lo'oxoỹaxac, qataq qantetta so leraxat. Qaq nache qaipacchigui da lamaxasoxonaxac Ñim Nataxala' maye ỹamaxalec co'ollaxa so Moisés.

³⁰ Nataqa'en qaỹo'o't so latapshec lcat oro, maye na'anaxat da ntaxaỹaxanaxanec, qataq qoỹettalec somaye so na'aqtac 'eeta': «Qaiỹotauga da lalamaxat Ñim Nataxala'».

³¹ Ime, nache qoỹanagui so lquet imalaqalec da lo'oxoỹaxac se'eso latapshec, nache qalapaxalec so lqaic alaxa, qaq ipacchigui da lamaxasoxonaxac Ñim Nataxala' maye ỹamaxalec co'ollaxa so Moisés.

Mashe ime da qaỹo'ottac so npe'l

³² Qaq 'era da 'eetec da ime so npe'l maye huaña da qanauane' Ñim Nataxala', qaq so Israel le'ecpi ỹataqta imatta da ỹo'ot 'enauac som damaxasoxoolecpi Ñim Nataxala' maye ỹamaxalec co'ollaxa so Moisés.

³³ Nache qoỹanot co'ollaxa so Moisés 'enauac se'eso no'otaxat so atamnaqa', npe'l, qataq so logoxoshetpi, lemaxaquipi so npe'l, 'epaqpi, la'axasoxola' so l-llecnaxanaxatpi, lauoqtepi, qataq aso no'oxonaxalatepi,

³⁴ qataq so nqo'oilliguishec qagueta lo'oc togaxaraic da lo'oxoỹaxac, maye lapo' so npe'l, qataq so ỹataqta no'on lo'oc na shiguiỹac, qataq so lapoxonaxat aso laỹe' soua nqataxaco.

³⁵ Qataq aso arca maye laỹe' soua nqataxaco, qataq soua lachoxola'ate da qaỹache, qataq so lapoxot asomaye,

³⁶ so nquia'axala' qataq so logoxoshetpi, qataq aso nauolepi maye qoỹanot Ñim Nataxala',

³⁷ qataq aso ncoỹaraxanaxaqui maye siete soua lhua'q maye chegaqaigui na lcat oro, qataq so logoxoshetpi, qataq so aceite maye lca'atoxot,

³⁸ qataq aso nca'atoxonaxalate maye ndotec oro, qataq so ncoraxanaxat aceite, qataq so nchenaxanaxat maye ama da laitaỹaxac, qataq so lapoxot so ñegueuo so npe'l.

³⁹ Qataq aso nca'atoxonaxalate maye chegaqaigui na lcat bronce, qataq so qaỹa'ara't lcat bronce maye naua'alo soua laỹel, qataq soua lachoxola'ate da qaỹache, qataq 'enauac so logoxoshetpi, qataq so nỹoxonaxaqui, qataq so lmala' somaye,

⁴⁰ qataq so lapoxot so qasoxoc, qataq aso lauoqtepi, qataq aso no'oxonaxalatepi, qataq so lapoxot so ñegueuo, qataq so lquetpi, qataq aso qaitoqnañi lashepi aso lauoqtepi so lapoxonaxat so qasoxoc, qataq 'enauac so logoxoshetpi so npe'l maye huaña da qanauane' Ñim Nataxala',

⁴¹ qataq so no'oxonec nogoxot da qaỹacoolec na no'onatacpi so npe'l, qataq soua alogo so ntaxaỹaxanaxanec Aarón, qataq soua alogo soua llalqa.

⁴² Nache so Israel le'ecpi ipacchigui da ỹo'ot da lamaxasoxonaxac Ñim Nataxala' maye ỹamaxalec co'ollaxa so Moisés,

⁴³ qaq so Moisés co'ollaq ila'a de'era 'eetec somayepi, da ipaqueelec da lamaxasoxonaxac Ñim Nataxala', nache ỹanem da no'on llecỹaxac somayepi.