Éxodo 38 - La'aqtaqa Ñim Lo'onatac 'Enauacna 2013

Aso nca'atoxonaxalate maye qalapaxalec na bronce

¹ So Besalel nataqa'en ỹo'ot aso nca'atoxonaxalate chegaqaigui na 'epaq acacia da yaqto' qaỹachalec da qaỹavigaxat ana nachetaqtaxanaqte qaỹavigaxatta. Qaq ye lcateueegue asomaye ivi' dos metros y veinticinco centímetros 'enauaque soua laỹel, qataq un metro y veinticinco centímetros ye lshequitcheguema.

² Nache soua cuatro lsheeneqa na pa'asheguem ỹauo'oi soua lcoue, qaq nache ima'a't naqa'en asomaye. Ime, nache lapaxalec so lcat bronce.

³ Qataq ỹo'ot so logoxoshetpi aso nca'atoxonaxalate ndotec naqa'en na bronce, so laỹe' na alo, poqo lo'o, nemaxanaqte, na'araxanaxat, qataq so poqo laỹe'.

⁴ Nataqa'en ỹa'ara't so lcat bronce nache ỹanaua'a na laỹe aso nca'atoxonaxalate.

⁵ Qataq ỹo'o't soua cuatro la'aitel netegueta soua lsheeneqa so qaỹa'ara't lcat da yaqto' tachiviiguilo soua lachoxola'ate.

⁶ Ime, nache ỹo'o't soua 'epaxaye acacia da yaqto' lachoxola'ate aso nca'atoxonaxalate, qataq lapaxaleguete so lcat bronce.

⁷ Ime, nache ỹa'aroiguilo soua la'aitel maye naua'alo soua laỹel aso nca'atoxonaxalate yaqto' ishet da qaỹache. Qaq aso nca'atoxonaxalate ỹasattaigui na lauel.

So nỹoxonaxaqui lcat bronce

⁸ Nache so Besalel ỹo'ot so nỹoxonaxaqui, qataq so lmala' somaye ỹachegoxotaigui so bronce maye ntannaxai so 'alpi maye lo'onataxanaqa' so ñegueuo so npe'l.

So ñegueuo so npe'l

⁹ Qaq so Besalel nataqa'en ỹo'ot so nqasoxoc so npe'l pa'aigue naqa'en da taguiñi, nache ivi' ye cuarenta y cinco metros ye lalogaxa, qaq so lapoxonaxat chegaqaigui na lino.

¹⁰ Qataq veinte soua lauoqtel maye na'attaleguete so lcat bronce, qaq so lemaxaquipi qataq aso la'aitepi chegaqaigui so lcat plata.

¹¹ Qaq so pa'aigue da sheu', nache ivi' cuarenta y cinco metros ye lalogaxa, qataq veinte aso lauoqtepi qataq veite aso na'attalec lcat bronce, qaq so lemaxaquipi qataq aso la'aitepi nache chegaqaigui na lcat plata.

¹² Qaq so lapoxonaxat maye pa'aigue da avit qalaq ivi' ye veintidós metros y medio ye lalogaxa, qataq diez aso lauoqtepi, qataq diez aso na'attalecpi. Qaq aso lemaxaquipi qataq aso la'aitepi chegaqaigui na lcat plata.

¹³ Qaq so napoxonaxat maye pa'aigue da nala' lliguisheguem nataqa'en ivi' ye veintidós metros y medio ye lcateueegue.

¹⁴ Qaq ñi 'oonolec laỹe so napoxonaxat maye netaña so ñegueuo, ivi' siete metros, qataq tres soua lauoqtel, qataq tres soua na'attaleguete.

¹⁵ Qaq so laỹe maye pa'aỹaueegue da lỹa laỹe se'eso ñegueuo, nataqa'en ivi' siete metros so napoxonaxat, qataq tres soua lauoqtel qataq tres soua na'attaleguete.

¹⁶ Qataq 'enauac se'eso napoxonaxat maye ỹapoua'a so nqasoxoc so npe'l 'enauac chegaqaigui na no'on lino.

¹⁷ Qaq aso na'attalecpi aso lauoqtepi se'eso napoxonaxat, qaỹauota'a na lcat bronce, qaq so lemaxatpi qataq aso la'aitepi nache chegaqaigui na lcat plata, qataq 'enauac aso lauoqtepi qalapaxalec na lcat plata, qataq asomayepi qaỹauo'o aso la'aitepi lcat plata.

¹⁸ Qaq se'eso napoxonaxat so ñegueuo so nqasoxoc so npe'l, ỹataqta ỹo'oxoraqta so leraxatpi maye qanteelec so hualoq laỹe imalaqalec, tocalec, qataq so togaxaraic qataq na ỹoqta no'on lino. Qataq ivi' nueve metros ye lalogaxa qataq dos metros y veinticinco centímetros ye lshequitcheguema. Nache naloteguet ye lalogaxa so lapoxot so qasoxoc.

¹⁹ Qataq cuatro soua lauoqtel, qataq cuatro soua na'attaleguete bronce, qaq so lemaxaquipi qataq aso la'aitepi ndotec plata, qaq soua lsheeneqa soua lauoqtel qalapaxalec na lcat plata.

²⁰ Qaq aso qaitoqnañi lashepi so lquetpi so npe'l 'enauac chegaqaigui na lcat bronce.

So lcatpi maye qaỹo'onataxana da qaỹo'ot so npe'l

²¹ Qaq so Moisés damaxasoxoolec da qaỹo'ot aso lmalate so lcatpi maye qaỹo'onataxana co'ollaxa da qaỹo'ot so npe'l, nache ipataxalec so Itamar maye llalec so Aarón, som lataxala' so leviitapi.

²² Nache so Besalel, maye llalec so Uri, qataq laual so Hur, som chegoxoguet so Judá.

²³ Somaye ntaune' co'ollaxa so Aholiab, maye llalec so Ajisamac, som chegoxoguet so Dan, som lcat lo'o, qataq ỹaỹaten da ỹo'ot na no'oxonec, qataq na leraxat na hualoq laỹe imalaqalec, tocalec, qataq na togaxaraic, qataq na no'on lino.

²⁴ Qaq so lcat oro maye qaỹo'onataxana, somaye qoỹanot co'ollaxa Ñim Nataxala' da nachetaqtaxanaxat da yaqto' qaỹo'ot so npe'l, somaye ivi' novecientos sesenta y cinco kilos y treinta gramos, maye maiche lashiichiỹaxac da huaña so npe'l.

²⁵ Qaq so lcat plata ivi' tres mil trescientos diecinueve kilos y quinientos veinticinco gramos, maye maiche lashiichiỹaxac da huaña so npe'l.

²⁶ Qaq da ima'a't 'enauac so ñiyiguishecpi, maye napacalec ye veinte vi'iye da llaxa, nache ivi' seiscientos tres mil quinientos cincuenta shiỹaxauapi, nache ñi 'oonolec somayepi ivi' ye seis gramos na ỹaneuo na lcat plata, maye maiche lashiichiỹaxac da huaña so npe'l.

²⁷ Qaq so taigui aso cien na'attalec aso lauoqtepi qataq aso lashepi so napoxonaxat so pa'auo so npe'l, ivi' tres mil kilos so qaỹavigaxat plata, nache añi 'oonole aso na'attalec aso lauoqtepi, ivi' treinta y tres kilos so lcat plata.

²⁸ Qaq so lcat plata maye chegaqaigui se'eso shiỹaxauapi, nache do'onataxana so Besalel da ỹo'ot nataqa'en so lemaxaquipi so npe'l maye netagui aso lauoqtepi, qataq aso la'aitepi somaye.

²⁹ Qaq so lcat bronce maye qoỹanot Ñim Nataxala' ivi' dos mil trescientos treinta y seis kilos y cuatrocientos gramos,

³⁰ nache se'eso lcat bronce taigui da qaỹo'ot so lo'oxonaxala' so ñegueuo so npe'l, qataq aso nca'atoxonaxalate, qataq so npaqtac lcat bronce maye naua'a so laỹe, qataq so laỹe logoxoshetpi asomaye,

³¹ nataqa'en so na'attalec qataq aso qaitoqnañi lashe so lquet so npe'l maye ỹapoua'a se'eso qasoxoc, qataq so ñegueuo so npe'l maye huaña da qanauane' Ñim Nataxala'.