Éxodo 33 - La'aqtaqa Ñim Lo'onatac 'Enauacna 2013

So nhuo' le'ecpi taỹa ye 'alhua maye qaỹachaxanapec co'ollaxa

¹ Ñim Nataxala' 'enapega so Moisés, 'eeta': «'Aue, qoca'ai qome ne'ena, nache 'auauec yi'iye nhuo' le'ecpi maye 'anqateeguesop co'ollaxa ye Egipto. Da yaqto' qanqo'oñiỹa ye 'alhua maye sachaxanapecoto co'ollaxa so Abraham, Isaac qataq so Jacob, da sami' ca chegoxogueta soomaye.

² Qaq Aỹem qome, samaq ca ñale da 'am ỹaueca'aguet, qataq samaqauec da ca'ai ye na'alhuapi ye cananeopi, amorreopi, hitiitapi, ferezeopi, heveopi qataq ye jebuseopi.

³ Nache qanqo'oñiỹa ye 'alhua maye sa qoue na nallec. Qalaxaye Aỹem saishet da qami' seca'attaiguilo, ten qom qami' selaxachiguilo, souaxat da ỹataqta sa qaualaqai.»

⁴ Nache se'eso nhuo' le'ecpi co'ollaq hua'aqchigui de'era sansatta na'aqtac, nache daquigoỹa't, huaña nache qaica ca ỹaañi ca no'otaxat lcat,

⁵ cha'aye Ñim Nataxala' 'enapega co'ollaxa so Moisés, 'eeta': «'Aua'aqtaxanem qome na Israel le'ecpi, qoneta': ‹Qami' ỹataqta sa qaualaqai. ¡Ỹoqo'oye da choche cara'acolec taxa da qami' seca'attaiguilo, nache Aỹem qami' selaxachiguilo! Qaq ỹoqo'oye nagui qanqache na qano'otaxachiipi lcat. Ime, qaq selaique ca lataxac ca qami' sheeteque.›»

⁶ Qaq ỹoqo'oye nache chegoqta'a co'ollaq huaña ye Oreb, da so Israel le'ecpi saishet da ỹaañi aso no'otaqtepi lcat.

So npe'l maye huaña da qanauane' Ñim Nataxala'

⁷ So Moisés ỹauo'o co'ollaxa so npe'l, nache ỹanaña so qaỹata'a so nanataqa' maye qanayeuta'a, nache ỹanagui da le'enaxat npe'l maye huaña da qanauane' Ñim Lo'onatac 'Enauacna. Nache da huo'o ca huotaique da ỹaỹaten ca 'eetapeguec Ñim Nataxala', nache taua'a somaye.

⁸ Qataq so Moisés naxa da taua'a se'eso npe'l, nache 'enauac so shiỹaxauapi nachaañi netañalo naua laso'omi so maiche lpe'lpi, qataq da lmeenaxanaxac nache ỹalletegue so Moisés choche ivitta'a da pa'auo somaye.

⁹ Qaq naxa da pa'auo so Moisés, nache anac so lo'oc da ỹapolec so ñegueuo so npe'l da ñaq na'aqtaxaatague' Ñim Nataxala' somaye.

¹⁰ Nache so shiỹaxauapi da ila'a se'eso lo'oc da ỹapolec so ñegueuo se'eso npe'l, nache somayepi ỹa'alyiñi naua l-llecte, netaña na laso'omi so maiche lpe'lpi da yo'oxonnataxan.

¹¹ Nache so Moisés ỹataqta nma'ai' da datata'aguet Ñim Nataxala' da na'aqtaxane', 'eeta'am da na'aqtaxaatague' ca nauochaxaua, qaq da ime naxa, nache so Moisés ỹe'eguelaxauga so nanataqa' maye qanayeuta'a. Qaq so nsoqolec Josué, som llalec so Nun, som ltaua somaye, ỹataqta saq ỹoxouga da ñaq pa'ataua'a so pa'auo so npe'l so Moisés.

Ñim Lo'onatac 'Enauacna ỹachaxan da llo'oxoyec

¹² So Moisés 'enapega Ñim Nataxala', 'eeta': «'Am, maye aỹem 'auamaxalec co'ollaxa ne'ena nhuo' le'ecpi da saueca'aguet, qalaxaye saishet da aỹem 'aua'aqtaxanem da negue't ca aỹem itauan. Nataqa'en qonapec co'ollaxa da aỹem 'auauotec qataq aỹem 'arpe'et.

¹³ Qaq da 'eesa de'era, nache aỹem 'auaỹaanaxanaxanec ca huotaique 'auo'otpi, yaqto' aỹem qome nataqa'en 'am sauotec, qataq qoqueto'ot da nache aỹem 'arpe'et. Qataq saishet da 'aucoua'ai ne'ena nhuo' le'ecpi, cha'aye 'am maye 'aralamaxat namayepi, saishet da aỹem.»

¹⁴ Nache Ñim Lo'onatac 'Enauacna, 'enapeco': «Aỹem, 'am soota'aguet qome qataq 'am sami' ca 'anmataxac».

¹⁵ Nache so Moisés 'enapeco': «Da saishet da qomi' 'annaicapegueto', nache no'on nataqa'en da saishet da qomi' qonapegalo da qolqa'ai ne'ena.

¹⁶ Cha'aye da saishet da qomi' 'annaicapegueto, nache ¿chaq 'eeteco' da aỹem, qataq na nhuo' le'ecpi da ishet da saỹatenaq da qomi' hueta'agueta da 'archoxonnataxanaxa? Da yaqto' saishet da shenaqta'am na laỹe nhuo' le'ecpi ana 'alhua.»

¹⁷ Nache Ñim Lo'onatac 'Enauacna qaltaq, 'eeta': «De'era 'anasaxauec, damaye nataqa'en so'ot qome, cha'aye ỹoqta 'eesa da 'am ỹauotaxat qataq 'am ipe'et.»

¹⁸ Nache so Moisés nachoxonnot Ñim Lo'onatac 'Enauacna, 'eeta': «¡Aỹem 'auachaxana da 'ayo'oxoyec!»

¹⁹ Qalaxaye Ñim Nataxala' 'enapeco': «Aỹem, 'am sachaxana qome 'enauac da ỹoqouagaxanaqtaic, qataq 'am sa'aqtaxanem qome da ỹe'enaxat. Qataq Aỹem sechoxoren ca taalec da sechoxoren, qataq ñeqouaguec cam taalec da ñeqouaguec.

²⁰ Qalaxaye 'am sa'aqtaxaatem da saishet qome da 'aulogui da ỹashiguiỹaxac, cha'aye qaica ca shiỹaxaua da ilogui da ỹashiguiỹaxac, nache queta da nca'altauec.»

²¹ Nataqa'en 'enapeco' Ñim Nataxala': «Qoueta'a qome ne'ena saqaỹapeque na soota'a. 'Auapetalec ne'ena coma'.

²² Qaq qom 'am nlectelec da ỹo'oxoyec, nache 'am soxotoigui qome ñi lauac ana'ana coma'. Ime, nache 'am sapolec sauota'a na ihuaq, nato' qom ime, da aỹem ỹoxogue.

²³ Qaq da ime, nache ñeqatec na ihuaq, nache ishet da 'aula'ague na ilaq, qalaxaye da ỹashiguiỹaxac, qalaq saishet da 'aulogui.»