Éxodo 23 - La'aqtaqa Ñim Lo'onatac 'Enauacna 2013

Da qalapaxañi lataxac da qaỹo'ot ca nalochiguiñi lataxac

¹ «Saishet qome da 'aua'axat ca na'aqtaxanaxac saq 'en, qataq saishet da 'auauaxaiguet ca qauemaic da 'autauanaua'a da ỹa'axat ca sa lataxac.

² Saishet qome da 'avi'inaxat na qalota shiỹaxauapi da huotaique ỹo'ot ca sa lataxac. Da ivita da 'auo'ot ca 'ara'aqtaxanaxac, qalaq saishet qome da 'aualecaua'a na qalota shiỹaxauapi, da 'aualecaua'a ca sa lataxac maye qaỹa'axatem ca nta'a,

³ qalaxaye nataqa'en saishet qome da 'ataunaua'a ca 'eetapeguec ca shiỹaxaua choxoraq qom saishet da lataxac.

⁴ Qom huo'otaq 'alalec ca lauegaxanaxala' huaca, huo'otaq ca lalo 'ashena maye daqat ca 'am ipa'agueetac, qalaq 'am 'avi'eguelaxatot qome camaye.

⁵ Saishet da sa 'atauan ca 'am nquiỹatega, da huo'otaq 'auauaachigui ca lalo 'ashena da ipataxañi ca lla'ac. Qalaq 'am 'atauan qome camaye, da yaqto' nqateeguesop ca lla'ac maye ipataxañi ca lalo.

⁶ Saishet da sa 'atauan ca choxoraqpi ca 'arma', da huo'o ca ncotaxac da taua'a ca nta'a.

⁷ Saishet qome da 'aualecaua'a ca na'aqtaxanaxac maye saq 'en, qataq saishet da 'aỹa'aneguet da nalaataguec ca saqca ca ne'enaxac, qataq qaica ca lasouaxashet, cha'aye aỹem saishet da shenapec da qaica ca lasouaxashet cam huo'o ca lasouaxashet.

⁸ Saishet da 'auaconeguet aca 'ansheetenaqte, cha'aye ana nsheetenaxanaqte ishet da 'eco' iqanamaqchet ca shiỹaxaua, qataq ỹo'otec ca qaica ca ỹasouaxat da daqat ca 'eetapeguec lataxac.

⁹ Saishet qome da qavi'iñiỹai' ca chegaqauec, cha'aye qami' nataqa'en qauachigoqoỹauec, qauachegoqỹa'a co'ollaxa ye Egipto, cha'aye qami' mashe qauaỹaañi da qanayeetaña ca ỹaqa'a 'alhua.»

Da qalapaxañi lataxac da mataxac

¹⁰ «Qami' qana'ayiisheguem qome na 'alhua, qataq qanqache na ala na qorañiguishequi ivittrec caua seis vi'iye,

¹¹ qalaxaye ca vi'i siete, nache qauaqaỹa'a da nmatec na 'alhua. Qaq ca maiche ñaxat nañiguishec, qauaqaỹa'a da yaqto' na shiỹaxauapi choxoraq maye netalec ca qana'alhuai, ishet da chec na ala, qataq ca shiguiỹacpi maye huauec, ishet da chec ca no'onañi. Qaq nache 'eetec nataqa'en ana ala aca qorañiguishi uva qataq aca oliva.

¹² Da huo'o ca 'auo'ot, qalaq 'aviraxattrec 'enauaque caua seis na'axa'te, qalaxaye ca na'a'q siete, nache 'anmatec, yaqto' nataqa'en ishet da nmatec ca 'arauegaxanaxala'pi huacapi, qataq ca 'arelopi 'ashenapi, nataqa'en ca 'arlatac, qataq cam chegaqauec.

¹³ Qaupaquiichigui qome 'enauac ne'ena lataxacpi da qauo'oche, qataq saishet qome da huo'o ca iỹaxaatacot ca ỹaqa'a atamnaxala', da iỹaxaataique ca ntaunaguec, qataq saishet da choche nasaqtapeguec da le'enaxat camaye.»

Soua tres lta'al naponaxaqui'

¹⁴ «Qauo'oche' qome caua tres lta'al naponaxaqui' ye 'oonolec vi'i da Aỹem qavio'oxoyiñi.

¹⁵ Qauo'oche qome ca qarquia'axaqui da qollequi ana nauole 'ayiiña maye sa qaỹauo'o aca lalegue maye ỹasheeraxachigui. Qataq qauloitelec qome da ỹa'aqtac maye qami' sanema, da qollequiitac ana'ana nauole 'ayiiña caua siete na'axa'te. Qaq ca na'a'q maye huetoigui damaye, nacheca ca ca'agoxoic le'enaxat Abib, cha'aye nacheso so ca'agoxoic maye huetoigui co'ollaq qoquiỹa'ai ye Egipto. Qaq da qauanaqui da Aỹem qavio'oxoyiñi nache Aỹem qandoiua'a aca qarachetaqtaxanaqche.

¹⁶ Nataqa'en qauo'oche qome ca qaraponaxaqui da ivita da qanqache ca la'auaxanec ala ca qorañiguishequi maye qaỹa'añiilec ca qana'alhuai, qaq nache 'ena'am da ivita da qanqache ca pa'atec ala 'enauac cam qorañiguishequi que'eca vi'i.

¹⁷ 'Enauac na shiỹaxauapi iuen da tres da ỹe'eguelaxalec, da nachaateua'a Aỹem Nataxala' ye 'oonolec vi'i.

¹⁸ Qom ivita da aỹem qaỹa'añiỹot ca qaỹavigaxat shiguiỹac, qalaq saishet da lỹateuo ca ltago'q, nataqa'en saishet da qaỹa'añiiuo aca nauole 'ayiiña maye huo'o ana lalegue maye ỹasheeraxachigui, qataq saishet da qauaỹamaxache ca lcheta que'eca shiguiỹac da taỹaigui ca lỹa na'a'q.

¹⁹ Qaq ca no'on la'auaxanec ala ca qorañiguishequi, camaye qauroiua'a qome aca atamnaxaqui maye lalamaqte Ñim Nataxala' maye Qanatamnaxala'ai. Qataq saishet qome da qaỹa'añiiuaq ca quetaq llalec da qauallicñiiguet ca lche' aca late'e».

So nale Ñim Nataxala'

²⁰ «Qaq aỹem samaq qome so ñale, da hua'auta'ague na qanqa'aiqui da yaqto' qami' ntela'alo na nqa'aic, qataq qami' ỹauegalo yem 'alhua maye seqataxaatai'.

²¹ Qalaxaye saishet qome da qauỹochiiuec somaye, qataq qaualaqaiguet, cha'aye somaye ỹo'ot ca samaxalec, qataq saishet da ichoxonnai' ca qarasouaxashichi.

²² Qaq qom ỹataqta qaualaqaiguet, qataq qauo'oche 'enauac nam qami' samaxaleguete, nache aỹem ỹataqta ñepa'aguene' qome cam qami' ipa'agueeta'ape, qataq ñeqanaxat cam qami' nqanaxatta'ape.

²³ So ñale, hua'auta'ague qome na qanqa'aiqui, qataq qami' ỹauegalo ye na'alhua ye amorreopi, hitiitapi, ferezeopi, cananeopi, heveopi qataq ye jebuseopi, yem taỹa'a da ñeqat qome.

²⁴ Saishet qome da qaua'ayiỹoto naua qarllectelli' na atamnaxala'pi, qataq saishet da qanatamñiỹot, qataq saishet qome da qoquiigue na qauem no'onataxacpi, nachaqrata da qaulaxachiigui 'enauac na ne'enaqtac atamnaxala'piolec qataq ỹataqta laỹelolqa qanqa'eñi da qanlaxachiiñi na coma'pi maye atamnaqa'pi.

²⁵ Nacherata da Aỹem qanatamñiitacot, Aỹem Nataxala' maye Qanatamnaxala'ai, yaqto' qami' sechoxonneque ca ỹotta'a't nallec qataq ca qaraquipi. Qataq aỹem seỹotauga qome nam nalolaxapi,

²⁶ qataq qami' so'oteque da saishet da huo'o ca ileu da saxanaxa da ivita ca lqueroxo. Qataq qaca qome aca 'alo na'aqñi ca llalec, huo'otaq da sa deco'o da huaña que'eca 'alhua maye qoviita'a.

²⁷ Qaq Aỹem sa'auaxaata qome da ncolanaxa, qataq da nqui'ic na shiỹaxauapi, da qami' hua'aqta'agueta da ivita da huo'o ca qaua'axasoxoñiitelec ca na'alhua, qataq Aỹem so'otec da maiche datauec ca qami' ipa'agueeta'ape.

²⁸ Qataq Aỹem sa'auaxan qome ca ỹo'ot ca lta'araic ncolanaxa, da yaqto' ỹo'orauec ye heveopi, hitiitapi qataq ye cananeopi.

²⁹ Qalaxaye saishet qome da samaqauec yemayepi ca 'oonolec vi'i. Ten, qom toolec yi'iye 'alhua, nache ishet da nquiguec ca shiguiỹacpi maye huauec. Nache qami' itoi'.

³⁰ Qaq ñeqonaxattauec qome da samaqauec yemayepi, nato' qom mashe qalota ca qaỹa'alquipi. Ime, qaq ishet da qauacoñiỹa yi'iye 'alhua da qauauo'oi qarmaye.

³¹ Qaq naua loga'te yem qarmaye sogote da sa'a'n da na'anaguec, 'eeta': Chegoqchiguiña qome aso Auaxai Togaxarai, nache ivitta'a so loigue aso auaxai maye nalotaxaama ye lma' ye filisteopi, qataq chegoqchiguiña ye toolec 'alhua choche ivitta'a so tala Éufrates. Qaq Aỹem qami' sanema ye netalec yi'iye 'alhua da qauloỹiigue. Ime, qaq maiche qauo'oyiỹauec qome yemayepi.

³² Qaq saishet qome da qanaỹamaxache' yemayepi, qataq saishet da qauatailec ye natamnaxala'pi.

³³ Qataq saishet da huo'o ca qano'onaxachiỹañi yemayepi da netalec yi'iye 'alhua, ten qom nataqa'en qami' qanatamñiỹot na natamnaxala'pi, nache huo'o ca qarasouaxashechi, nache ivira'a da deqat da qanachaalataxaqui».