Éxodo 20 - La'aqtaqa Ñim Lo'onatac 'Enauacna 2013

Soua diez nqataxaco

¹ Ñim Lo'onatac 'Enauacna detaqa, nache, 'eeta':

² «Aỹem Nachaỹem Nataxala' maye 'anatamnaxala', Aỹem 'am ñeqateeguesop co'ollaxa ye 'alhua Egipto, yem huaña co'ollaq choche 'am nlatac.

³ Saishet qome da 'auauo'o ca ỹaqauga 'anatamnaxala'pi, nachaqaỹemta.

⁴ Saishet qome da 'auauo'o ca 'are'enaqtac 'anatamnaxala' da 'eeta'am na hueto'ot na piguem, huo'otaq ca huetalec ana 'alhua, huo'otaq ca huetaña na pa'aguiñi na 'etaxat.

⁵ Qataq saishet da 'aua'atto'oto naua 'arllecte qataq saishet da 'avio'oxoreetac, cha'aye aỹem Nataxala' Nachaỹem 'Anatamnaxala', Aỹem ca'alaxanaxaic ỹoqo'oye sauo'o da nhuaxanaguec ca shiỹaxaua maye aỹem nquiỹatega, qataq ca llalaqpi qataq ca laualpi qataq na llalaqpi ca laualpi.

⁶ Qalaxaye ỹataqta lta'araic da ỹauotaxanaqtaic ca aỹem ỹauotec qataq ỹalaxaleguete naua iqataxaco, qataq choche tatec da sauotec cam llalaqpi.

⁷ Saishet da qaica ca qaỹa'añiỹaigui da qautaqaiỹa da ỹe'enaxat Aỹem Nataxala' maye Qanatamnaxala'ai, cha'aye Aỹem seshet da so'ot ca nhuaxanaguec ca qaica ca ỹanaigui da ỹe'enaxat.

⁸ Qantooñita'ac qome ye na'a'q mataxaqui, da qauỹochiỹauga da ỹataqta ỹalamaxat.

⁹ Seis caua na'axa'te da qauo'onataxañiitac qataq qaumachiỹaiguilo 'enauac cam huotaique da qauo'oche,

¹⁰ qalaxaye que'eca na'a'q siete maye mataxaqui, camaye qauỹochiỹauga da ỹataqta ỹalamaxat. Saishet da huo'o ca qauacoñiigui no'onatac que'eca na'a'q, nataqa'en ca qaỹa'alquipi qataq aca qaỹa'alliipi, nataqa'en ca qarlataquipi qataq aca qarlataipi, ivira'a ca 'atetpi qataq ca shiỹaxaua chegaqauec maye qami' netaiguilo.

¹¹ Cha'aye Ñim Nataxala' ivi' soua seis na'axa'te co'ollaq ỹo'ot na piguem, 'alhua, auaxai, qataq 'enauac nam huetalec ana 'alhua. Qaq co'ollaq ivita se'eso na'a'q siete nache nmatec. Qaq ỹoqo'oye se'eso na'a'q maye nmataxaqui iỹotauga da ỹataqta lalamaxat.

¹² Huo'o naq 'enec 'anqa'en ca 'arta'a, qataq aca 'arate'e, yaqto' qaỹoqtec da 'anachaalataxac da qouetalec ana 'alhua maye 'am ỹami' Ñim Nataxala' maye 'Anatamnaxala'.

¹³ Saishet da 'aualaataxan.

¹⁴ Saishet da 'arauañi' aca sa 'arhua.

¹⁵ Saishet da 'aucache.

¹⁶ Saishet da 'am tenataxanaxaic da choche 'auo'ot ca lasouaxashet ca 'arỹa.

¹⁷ Saishet da 'auqopitta'a ca lma' ca 'arỹa, qataq saishet da 'auqopitta'a aca lhua ca 'arỹa, huo'otaq ca l-latac, huo'otaq aca l-lata, huo'otaq ca lauegaxanaxala' huaca, nataqa'en ca lalo 'ashena, huo'otaq camachaqca nam logoxoshetpi».

So Israel le'ecpi nomteguet da lcolanaxa Ñim Lo'onatac 'Enauacna

¹⁸ Qaq so Israel le'ecpi co'ollaq hua'aqchigui so nalataxa, qataq na l-lamaxa aso nasheerepi qataq ỹauaachigui so nqashelgaxa, qataq so lmala'q maye imattalec aso qasoxonaxa, nache ỹataqta huo'o da lcolanaxa, nache saishet da nquigueuo.

¹⁹ Huaña, nache 'enapega so Moisés, 'eeta': «Nache 'amta qome qomi' 'autaxaỹapegueto. Ime, qaq 'am salaxasoxoguet. Qalaxaye saishet qome da qomi' detaxaỹapegueto Ñim Lo'onatac 'Enauacna. ¡Ten, qom seleuaq!»

²⁰ Nache so Moisés, 'enapeco': «Saishet qome da qayi'i. Cha'aye Ñim Lo'onatac 'Enauacna anac da choche qami' ỹe'egue'n, yaqto' nache 'eetai' da qayi'iỹai Ñimaye, qataq saishet da qauo'oche ca sa ỹaỹamaxañi.»

²¹ Qaq so shiỹaxauapi co'ollaq ñaq qaỹatauga so hueta'a, nache so Moisés tasheguema so lo'oc maye ỹataqta napalñi, som huetaigui Ñim Lo'onatac 'Enauacna.

Da qalapaxañi lataxac aso nca'atoxonaxalate

²² Ñim Nataxala' 'enapega so Moisés, 'eeta': «'Aua'aqtaxanem qome na Israel le'ecpi qoneta': Qaq qami' mashe Aỹem qauauañiichigui da sooto'ot na piguem da qami' setaqtegueto.

²³ Saishet qome da qauo'oche ca qare'enaqtaqui chegaqaigui na lcat oro huo'otaq na plata da yaqto' qanatamñiitacot da 'eeta'am Aỹem.

²⁴ Qauo'oche qome aca nca'atoxonaxalate 'alhua, nache qauachiỹalec acamaye cam Aỹem qaỹa'añiỹot qarachetaqtaxanaxache qaỹavigaxatta, qataq qanhuaachigui chegaqaigui nam shiguiỹacpi maye qaralamaxache, qagueta, huaca. Nache Aỹem ñanac qome da qami' sanema ca ichoxonnataxanaxa da huaña na 'alhuapi maye huaña da qaiuennate da ỹe'enaxat.

²⁵ Qaq da huo'otaq qauo'oche aca nca'atoxonaxalate na coma', nache saishet da qauauoita'a na maiche no'onatac coma', cha'aye da huo'otaq qairolec nam no'onataxanaxatpi da qaỹo'ot nache acamaye saishet da nateneguet da lataxac aca ỹoqta nca'atoxonaxalate.

²⁶ Qaq ỹoqo'oye aca'aca nca'atoxonaxalate maye ỹalamaqte, saishet qome da huo'o ca taỹasheguema napiaxala'pi, yaqto' da huo'o ca tasheguema da qoñiita nache saishet da yo'oqteua'alo naua logoxoshe'ete.»